Быг-Быг

Википедиысь материал
Быг-Быг
(гастрофестиваль)
Быг-быг.jpg
Инлыкез калыккуспо
Кивалтӥсез

Жанна Михайловна

Ермолаева
Кутсконэз 2014
Ортчытон интыез
57°12′48″ с. ш. 53°45′44″ в. д.GЯO
Сайт bygbygfest.ru

Йӧскалык сиён-юонъя «Бы́г-Быг» калыккуспо фестиваль (ӟуч: Быг-Быг) —Удмуртиысь гастрофестиваль, кытын пӧртэм кунъёсысь но улосъёсысь сиён пӧрасьёс но кондитеръёс быгатонлыкъёссэс адӟыто. 2014-тӥ арысен Шаркан ёросысь Быгы гуртын ортче. Ужрадлэн ужпумез — финн-угор калыкъёслэн вашкала дырысен лулчеберет удысысь утем узырлыксылы саклык висъян[1].

Фестивальлэн нимыз удм. бы́г-быг кылысь потэмын — буй-буй но небыт — озьы удмуртъёс выль пыжем нянь сярысь вералляло[2].

Историез

«Быг-Быг» фестиваль нырысьсэ 2014-тӥ арын 18-тӥ—19-тӥ пӧсьтолэзе ортчиз — Быгы гурт финн-угор дуннелэн лулчеберетъя шоркарез  [ӟуч] (удм. ним басьтэм бере[3]. Фестивалез радъясьёс куноос понна тунсыко программа дасяллям: пӧртэм калыкъёслэн йылолъёсынызы тодматскон, пӧраськисьёс куспын конкурс, сиён-юон веръян-оскалтон, йӧскалык сиён-юонъёсты лэсьтонъя мастер-классъёс, эмъянын кутӥськись турын-куарез бичан, шулдыръяськон, удмурт шудонъёс, блогеръёсын но журналистъёсын котырес ӝӧк сьӧрын пумиськон но мукет. Гуртын уйзэс палаткаосын ортчытыны мылкыд карисьёс понна нимысьтыз инты дасязы[4]. Нырысетӥ «Быг-Быге», Удмуртиын улӥсьёс сяна, Киров, Марий Эл улосъёсысь, Коми-Пермяк округысь, озьы ик Франциысь но Эстониысь куноос вуылӥзы[5].

Ужрад арлы быдэ радъяське, нош солэн программаез ялан выльдӥське но паськыта. 2015-тӥ арын фестивальлэн аслаз валютаез кылдӥз — быг, со дырысен пӧраськисьёслэсь но вузчиослэсь ӵапак быгыен куноос басьясько. Озьы ик нылпиослы нимысьтыз площадкаос чакламын вал[6].

2016-тӥ арын фестивальлэн географиез паськытаз: ужрадъёс Быгыын гинэ ӧз ортче, Шаркан ёросысь мукет гуртъёсын но ӧръяськизы — Мувырын, Вортчаын, Арланын но ёрос центрын — Шаркан черкогуртын. Озьы ик Быгыын удмурт сиён-юонлы сӥзем музей юрт усьтӥськиз, татын Удмуртиысь пӧртэм ёросъёсысь асьсэ йӧскалык сиёнъёссылы рецептъёсын карта возьматӥзы[7][8].

Ижкарысь шеф-повар ӟырдатэм эгыр вадьсын така сӥль пыже

2019-тӥ арын фестивалез радъясьёс трос выльзэ улонэ пыӵатӥзы. Сиён-юонэз оскалтэм, мастер-классъёсы пыриськем сяна, «Быг-Быглэн» куноосыз творчествоя йӧскалык коллективъёслэн «Быг-быг — эшъяськонъя фестиваль» нимо ӵошатсконазы но туала йӧскалык крезьгурлы сӥзем «Дау́р герӟе́т» фестивале пыриськыны быгатӥзы. Озьы ик нылпиос понна аниматоръёсын но мастер-классъёсын нимысьтыз сэрег радъяськиз[9].

«Царамис» пор ансамбль «Быг-Быг» фестивальын. 2017-тӥ ар

2022-тӥ арын фестивальын рекорд пуктэмын — пӧсь табаньёслэсь метр ӝужда башня ӝутэмын вал[10]. 2023-тӥ арын нырысьсэ творчествоя «Турын-куарез эмъяськонын но пелляськонын кутон» лаборатория усьтӥськиз, озьы ик нырысьсэ чеберлыкъя «Мисс Быг-Быг» ӵошатскон ортчиз. Нош 5—13 аресъем пиналъёс «Пичи шеф» нимо ӵошатсконын пӧраськыны быгатонлыкъёссэс адӟытӥзы. Куд-огез асьсэ коже пӧраськизы, нош мукетъёсыз командае огазеяськизы[3][11].

Фестивале пыриськисьёс но куноос

2014-тӥ— 2023-тӥ аръёсы фестивале Удмуртиысь пӧртэм ёросъёсысь но каръёсысь пӧраськисьёс пыриськизы, озьы ик Марий Эл, Карелия, Татарстан, Пермь, Киров Ленинград улосъёсысь, Ямало-Ненецк автоном округысь, Мускоысь, Эстониысь, Венгриысь, Финляндиысь, Франциысь, Румыниысь куноос но усточиос вуылӥзы[9][3]. Соос коми-пермяк посикунчикъёсты, бесерман саламатэз, венгер токанез, пор подкогыльоез, эстон бӧдёноез, сырез но трос мукетсэ пӧразы[1]. Но шулдыръяськонын тужгес трос удмурт йӧскалык сиён-юон. Сое ульчаысь гуръёсын ик пӧраллязы, 2023-тӥ арын фестиваль дыръя возь вылын 20 гур пуктэмын ни вал. Соку «Быг-Быгын» куноос понна 10 сюрс перепеч но табань пыжемын вал. Та понна ог 500 литр йӧл но 3 ведра курегпуз кулэ луиз[3].

Арлы быдэ фестивале пыриськись куноослэн лыдзы йылэ: 2014-тӥ арын ужрадэ 700 мурт вуылӥз[12], 2018-тӥ арын — 4 сюрс[13], 2022-тӥ арын — 6,5 сюрс, 2023-тӥ арын — ог 8 сюрс[3].

Нырысь аръёсаз фестивале пырон вань мылкыд карисьёс понна дунтэк вал, но бератаз дунын луиз[12]. Йӧскалык дӥськутэн лыктэм куноосты гинэ билеттэк пырто[1].

Ужрадъёс

Фестивальлэн программаез арлы быдэ паськыта. Дышем сямъя таӵе мастер-классъёс ортчо: вӧй шуккон, сезьпы́зь лэсьтон, сяртчыня́нь пыжон но ва́рсь пӧран[14]. Озьы ик арлы быдэ концертъёс но ӵошатсконъёс ортчо:

Милям ческытгес!

Конкурсэ одӥг нуналлы «ресторанзэс» усьтыны мылкыд карись командаос пырисько. Соос азьло ик быръё фестивальын возьматоно выжы калыклэсь сиён-юонзэ, ужрадэ пӧраськыны кулэ луись вань котырез ваё. Татын ни сиён лэсьто но сое вузало. Вормисе тужгес трос быгы (уксё) поттэм команда ворме[9].

Пӧраськисьёслэн вожмаськонзы

Егитъёслэн командаоссы пӧлын радъям ӵошатскон: кӧня ке дыр куспын но одӥг кадь арбериослэсь (таос азьвыл ик тодмо ӧвӧл) сиён пӧраны кулэ. Плита интые пыриськисьёслы ӟуч гур, буржуйка яке тылскем сётӥське. Дась сиёнъёсты конкурсантъёс люкаськемъёс азьын возьмато, соос зэмос дунъясьёсын ӵош вормисез куара сётон пыр быръё[9].

Даур герӟет

Туала кырӟасьёслэн концертсы: вокалъя но инструментъёсын шудонъя йӧскалык ансамбльёс, рок- но реп-группаос, реп- но R&B-быдэстӥсьёс пырисько[15].

2025-тӥ арын

2025-тӥ арын куноосты 28-тӥ-29-тӥ инвожое Быгыын пумитаны дасясько.

Йӧскалык сиён-юонъя фестиваль дыръя 10 пурты чорыг лым пӧзьтыны ӧдъяло. Шулдыръяськонын озьы ик «Вунэтэм удмурт сиёнъёс» сэрег чакламын. Отын Шаркан ёросысь арлыдоос вашкала рецептъёсъя лэсьтэм сиёнэн куноятыны дасясько. Со сяна, вань мылкыд карисьёс грильын но «сезьпызь» ведра пушкын пыжем курегез, дуско вылын ӵынатэм чорыгез но трос мукетсэ веръяны быгатозы. Озьы ик куноослы пӧраськонъя вожвылъяськонъёсы, удмурт шудонъёсы пыриськыны, мотоблокъёсын ворттылыны, тылскем дурын кырӟаны но трос мукетсэ эскерыны луонлык сётӥськоз[16].

Валэктонъёс

  1. ↑ 1 2 3 На фестивале финно-угорской кухни «Быг-Быг» в Удмуртии своя валюта - «быг» udm-info.ru.
  2. ↑ Международный фестиваль финно-угорской кухни «Быг-быг» eventsinrussia.com.
  3. ↑ 1 2 3 4 5 Международный гастрономический фестиваль «Быг-быг» в Шарканском районе Удмуртии посетили порядка 8 тысяч человек Государственный Совет УР.
  4. ↑ Быгыын финн-угор сиёнъёсъя фестиваль ортчоз [удм.] Удмурт дунне.
  5. ↑ Мария Векшина Бӧдёно сиён но варсь пӧзьтон [удм.] Удмурт дунне.
  6. ↑ Надежда Максимова Мильым дунъяськиз быген. Кызьы ортчиз пӧраськонъя "Быг-быг" фестиваль [удм.] Удмурт дунне.
  7. ↑ Мария Векшина Пересьмон, кӧртчал но саламат. Шаркан ёросын ортчиз сиён-юонлы сӥзем фестиваль [удм.] Удмурт дунне.
  8. ↑ "Быг-быг": Кӧт тыр - улон майбыр [удм.] Удмурт дунне.
  9. ↑ 1 2 3 4 VI Международный фестиваль финно-угорской кухни «Быг-Быг» пройдет в Удмуртии Министерство национальной политики УР.
  10. ↑ IX Международный фестиваль финно-угорской кухни «Быг-Быг» АНО «Центр развития туризма Удмуртской Республики».
  11. ↑ Гастрофестиваль «Быг-быг» стал настоящим праздником мировой кухни АНО «Центр развития туризма Удмуртской Республики».
  12. ↑ 1 2 Все каких-то бешеных денег стоит: Жители Удмуртии о фестивале «Быг-Быг» udm-info.ru.
  13. ↑ Фестиваль финно-угорской кухни «Быг-Быг-2019» пройдет в Удмуртии 5-7 июля udm-info.ru.
  14. ↑ Кулинарный конкурс и этнодискотека: фестиваль "Быг-Быг" пройдет в Удмуртии Национальный акцент.
  15. ↑ Положение о проведении V Международного Фестиваля финно-угорской кухни «Быг-Быг» - 2018 Официальный сайт Администрации города Ижевска.
  16. ↑ Екатерина Сентемова (26 июня 2025) Во время фестиваля «Быг-быг» в Удмуртии сварят 10 котлов ухи [ӟуч] Susanin.news. Эскеремын 2025-06-27 арын

Чӧлсконъёс

«https://udm.ruwiki.ru/w/index.php?title=Быг-Быг&oldid=507802»-ысь басьтэмын