Блинов, Павел Фёдорович

Павел Фёдорович Блинов
Павел Фёдорович Блинов
Вордӥськем дырыз	20-тӥ куарусёнэ 1919
Вордӥськем интыез	Вязовка черкогурт, Вольск уезд, Саратов губерния, РСФСР
Кулэм дырыз	16-тӥ пӧсьтолэзе 1998 (78 арес)
Кулэм интыез	Алма-Ата, Казахстан
Кунмуртлыкез	СССР → Казахстан
Званиез
Ожмаськонъёс/ожъёс	Быдӟым Атыкай ож

Павел Фёдорович Блино́в (20-тӥ куарусёнэ 1919-тӥ ар, Вязовка черкогурт, Вольск уезд, Саратов губерния, РСФСР — 16-тӥ пӧсьтолэзе 1998-тӥ ар, Алма-Ата, Казахстан) — ожгар лётчик, 1-тӥ Украин фронтысь 2-тӥ воздушной армилэн 1-тӥ гвардейской штурмовой авиационной корпуслэн 9-тӥ гвардейской штурмовой авиационной дивизиезлэн 141-тӥ гвардейской штурмовой авиационной полкезлэн звеноезлэн командирез, старшой лейтенант. Совето Союзлэн Героез.

Улон сюресэз

Вордӥськиз 1919-тӥ арын 20-тӥ куарусёнэ Саратов губерниысь Вольск уездысь Вязовка черкогуртын (али — Саратов улосысь Базарно-Карабулакской ёрос) крестьян семьяын.

1928-тӥ арын Вязовысь школае дышетскыны мынӥз. Семьез Вольск каре улыны выжемен, 10 классэз отын йылпумъяз. Школаын дышетскыкуз огвакытэ Вольскысь аэроклубын дышетскиз. 1940-тӥ арын 22-тӥ куартолэзе школаез йылпумъямез бере, Энгельсысь пилотъёсты дасянъя военной авиационной школае дышетскыны пыриз, сое 1941-тӥ арын йылпумъяз.

1941-тӥ арысен 1942-тӥ арозь Ижкарысь военной авиационной школаын лётчик-инструктор луыса служить кариз. 1943-тӥ арын южтолэзьысен Украин фронтын 5-тӥ но 2-тӥ воздушной армиослэн пушпӧлазы ожмаськиз. Нырысетӥ ожаз Калин фронтын Ил-2 легендарной штурмовикеныз пыриськиз. Собере Курск ожмаськонэ, Украинаез, Молдавиез, Румыниез, Польшаез, Чехословакиез мозмытонэ пыриськиз но тушмонэн Герман музъем вылын ожмаськиз. 1943-тӥ арын 15-тӥ толсуре секыт сӧсырмыны шедиз. Сандомирск плацдармын боевой заданиосты ӟеч быдэсъямез но сэзь ожмаськемез понна П. Ф. Блиновлы 1944-тӥ арын 10-тӥ оштолэзе Совето Союзлэн Героез дано ним сётэмын. Берлин но Прага вадьсын Блинов Совето Союзлэн Героез нимын штурмовой авиационной полклэн штурманэз луыса лобаз ини.

Быдӟым Атыкай ож аръёсы трос пол ожгар лобанъёсы потаса, групповой но одиночной ожмаськонъёсын омырын вить фашист самолётэз пушкытӥз, музъем вылысь ог дасо самолётэз но боеприпасъёсын ньыль магазеез, горючеен куинь магазей но укмыс цистерна, 24 танк, пехотаен но грузъёсын 198 машина, 30 повозка, 350 фашист солдат- офицерез, шур вамен потон выжез но вить дзотэз пушкытыса сутӥз.

Война бырем бере подполковник П. Ф. Блинов службазэ азьланьтӥз Совето Армиын, собере Кунпуш ужъёсъя министерстволэн ёзэтъёсаз выжиз.

Пенсие потыса, подполковник Блинов Алма-Ата карын улӥз. Улонысь кошкиз 1998-тӥ арын 16-тӥ пӧсьтолэзе. Ватэмын Алма-Атаысь Шор шайвылын^[1].

Буре ваён

Блиновлэн нимынызз Вольскысь одӥгез урам нимамын, отын ик «геройёслэн школазы» вӧзысь синпелетын солы сӥзем буре ваён пул юнматэмын.
2005-тӥ арын оштолэзе Алма-Ата карын Наурызбай-батыр нимо урамын буре ваён пул юнматэмын.
2005-тӥ арын куартолэзе Базарной Карабулакын Геройёслэн Аллеяязы Блиновлэн бюстэз пуктэмын.
2018-тӥ арын Ижкарысь Моторной урамлэн бадӟым люкетэз Блиновлэн нимыныз нимамын, озьы ик Геройлэн нимыз 76-тӥ номеро школалы сётэмын^[2]. 2024-тӥ арын 76-тӥ номеро школа азьын СССР-ысь Геройлэн бюстэз усьтэмын^[3].

Данъетъёсыз

«Зарни Кизили» медаль
Ленин орден
Горд Знамялэн кык орденэз
Быдӟым Атыкай ожлэн I степенё орденэз
Александр Невскийлэн орденэз,
медальёс, соос пӧлын «Берлинэз басьтэм понна» но «Прагаез мозмытэм понна».

Валэктонъёс

↑ Алматы
↑ Бобров И. Часть улицы в Ижевске переименуют в честь Героя Советского Союза Эскеремын 2018-09-29 арын
↑ Игорь Бобров. Бюст Героя Советского Союза Павла Блинова установили у школы в Ижевске, Ижлайф (21.09.2024). Эскеремын: 23 куарусёнэ 2024 арын.

Чӧлсконъёс

Павел Фёдорович Блинов [ӟуч] «Герои страны» сайт.

[1] Алматы

[2] Бобров И. Часть улицы в Ижевске переименуют в честь Героя Советского Союза Эскеремын 2018-09-29 арын

[3] Игорь Бобров. Бюст Героя Советского Союза Павла Блинова установили у школы в Ижевске, Ижлайф (21.09.2024). Эскеремын: 23 куарусёнэ 2024 арын.

[1]

[2]

[3]