Анастасия Николаевна

РАН экспертиза

Экспертизаез ортчытӥз
Россиысь Тодосъёсъя Академия

Пыр-поч лыдӟе

Экспертиза РАН

Экспертизаез ортытӥз
Россиысь Тодосъёсъя Академия

Поыр-поч лыдӟе

Материалъёс басьтэмын Б.Н. Ельцин нимо библиотекаысь

Та гожтосын Б.Н. Ельцин нимо Президент библиотекалэн фондысьтыз материалъёс кутэмын

Рос-прос учке

Рувикиын таӵе фамилиен мукет муртъёс сярысь гожтосъёс вань. Учке: Романов.

Анастасия Николаевна
Соослэн Императорской Высочествооссылэн, Быдӟым Княжнаослэн, Росси Императорлэн нылъёсызлэн пичи гербзы.
Император Высочество Быдӟым княжна
1901-тӥ арын 18-тӥ инвожоысен — 1918-тӥ арын 17-тӥ пӧсьтолэзёзь
Вордӥськемын	5‑тӥ (18-тӥ) инвожое 1901 Петергоф[d], Санкт-Петербург губерния[d], Росси империя[d]
Кулэмын	17-тӥ пӧсьтолэзе 1918({{padleft:1918|4|0}}-{{padleft:7|2|0}}-{{padleft:17|2|0}}) (17 лет) Ипатьевлэн юртэз[d], Екатеринбург, Пермь губерния[d], РСФСР
Атаез	Николай II
Анаез	Александра Фёдоровна
Кинюртэмез
Данъетъёсыз
Медиафайлъёс РувикиМедиа пушкын

Анастаси́я Никола́евна (Романова) (5‑тӥ (18-тӥ) инвожое 1901, Петергоф^[d], Санкт-Петербург губерния^[d] — 17-тӥ пӧсьтолэзе 1918, Ипатьевлэн юртэз^[d], Пермь губерния^[d]) — быдӟым княжна, Николай II императорлэн но Александра Фёдоровналэн ньылетӥ нылзы. Эксэй семьяен ӵош Ипатьевлэн юртаз ыбылэмын.

Быремез бере 30 пала нылкышноос асьсэды нималлязы «паймымон утиськем быдӟым княжнаен», но ваньзы вазь-а, бер-а самозванкаос сямен шараямын вал. 2000-тӥ арын гудырикошконэ Ӟуч православной черклэн юбилей Архиерей собораз Россиысь курадӟытыса выль быдтэмъёслы сӥзем черкын анай-атаеныз, апайёсыныз но выныныз ӵош страстотерпец музэн вӧсямын вал. Азьвылгес, 1981-тӥ арын, кунгож сьӧрысь Ӟуч православной черк соосты дун-чылкытъёс радэ пыртӥз. Сӥлы карон нунал — 4-тӥ пӧсьтолэзе юлиан календарья.

Улон сюресэз

Вордӥськемез

Вордӥськиз 1901-тӥ арын 5-тӥ (18-тӥ) инвожое Петергофын. Со вакытлы эксэй семьяын куинь нылзы вал ни — Ольга, Татьяна но Мария. Наследниклэн ӧвӧлтэмез политикая югдурез ӟырдатылӥз: Павел I императорен юнматэм престолэз кутон сярысь Актъя, нылкышно престолэ пуксьыны быгатэ кивалтон династиысь вань пиосмурт гожъёс уретӥськем бере гинэ (ӟуч: полусалической наследование), соин ик наследникен лыдъяськылӥз Николай II императорлэн выныз Михаил Александрович, та тросэзлы ӧз яралля, нырысь ик — Александра Фёдоровна императрицалы. Инмарлэсь пи сюлворыса, та вакытэ со пумен выйиз мистицизм пӧлы. Черногориысь принцессаос Милица Николаевна но Анастасия Николаевна юрттэмен, дворе вуиз ассэ гипнотизёр но лулсэр висёнъёсъя специалистэн ялэм мурт, француз выжыысь кыӵе ке Филипп. Филипп Александра Фёдоровналы ивортӥз, пи ваёз шуыса, но югыт дунне вылэ нылыз вордӥськиз — Анастасия.

Александра Фёдоровна эксэй нылкышно Анастасия Николаевна быдӟым княжнаен, Петергоф, 1901-тӥ ар

Николай аслаз дневниказ гожтӥз:

3 час котырын Аликс зол вӧсь луыны кутскиз. 4 часын султӥ но ас дорам кошки, дӥсяськи. Ӵапак 6 часын ӵукна вордӥськиз Анастасия нылы. Ваньмыз ӝог но йӧнала ортчиз, Инмарлы тау, шуг-адӟонъёстэк. Ваньмыз кутскиз но йылпумъяськиз котыр ваньзы кӧлыку, таин валче кыкнамылы но гань-гань вал, огмылкыдын пачыламы! Отӥяз дуннелэн пӧртэм сэрегъёсаз улӥсь ӵыжы-выжыосмылы ӟеч иворен телеграммаос гожъяны пукси. Ярано коть, Аликс ассэ умой шӧдэ. Пичильтыкмылэн секталаез 11½ фунт, ӝуждалаез 55 см.

Императорлэн дневниказ гожтэмез куд-ог исследовательёслэн верамъёссылы пумит луэ, соос лыдъяллязы, ныл вордскемлы мылкыдзэ уськытэм Николай кема дыр ӵоже дыдызэ но кышнозэ эскерыны ӧз дӥсьты шуыса.

Императорлэн апаез быдӟым княгиня Ксения югдур пумысен пусйылӥз:

Кыӵе шуккет! 4-тӥ ныл! Сое Анастасия нимазы. Анае та сярысь ик мыным телеграмма гожтӥз: «Аликс нош ик ныл вайиз!»

Быдӟым княжналы черногорье принцессалэсь, императрицалэн матысь эшезлэсь Анастасия Николаевналэсь нимзэ сётӥзы. «Гипнотизёр» Филипп, быдэсмымтэ пророчествоез бере ӧз ыштӥськы, соку ик ныллы «паймымон улон но аспӧртэм адӟон» сӥзиз. Маргарет Игер, «Шесть лет при русском императорском дворе» нимо мемуаръёслэн авторзы, тодаз вайылӥз: Анастасия нимамын вал императорлэн алигес бугыръяськонэ пыриськем Санкт-Петербург университетысь студентъёслэсь правооссэс жалямез но выльысь улӟытэмез понна, малы ке шуоно «Анастасия» ним «улонлы берыктэм» шуыса чузъяське, та святоез ӵемысь возьмато шори чигем жильыен.

Пичи дырыз

Анастасия Николаевналэн быдэс титулэз тазьы чузъяськылӥз: «Солэн император высочествоез быдӟым росси княжна Анастасия Николаевна», но та титулэз ӧз кутылэ, официальной луись вераськонын солы нимын-тулын вазиськылӥзы, нош дораз лапег питырес луэмысьтыз (156 см) «пичимы, Настаська, Настя, кубышка» нималлязы, чупрес но олокызьы но йыртэмамез понна — «швыбзик».

Быдӟым княжна Анастасия куинь аресказ

Современникъёслэн чакламзыя, императорлэсь нылпиоссэ узырлыкен ӧз эркиялэ. Анастасия Мария апаеныз одӥг висъетын улӥзы. Комнатаысь борддоръёс пурысесь, вӧлдэтэз суредам бубылиосын чеберъямын вал. Борддоръёсын — мудоръёс но туспуктэмъёс. Мебель тӧдьы но вож буёло лэсьтэмын, котыр югдур спартанской шуыны луэ, пужыятэм миндэръёсын кушетка но армейской койка, кудаз быдӟым княжна аръёсын кӧлаз. Та койкаез комнатаысь пӧртэм сэрегъёсы пуктылӥзы: толалтэ висъетлэн югытгес но шунытгес палаз интыяллязы, нош гужем куддыръя балконэ но поттылӥзы, ӝокыт но пӧсь куазьлэсь шутэтскыны мед луоз шуыса. Та койкаез ик сьӧразы каникулъёсы Ливадиысь дворецэ но кутылӥзы, отын ик быдӟым княжна сибирь ссылкае келян дыръяз но кӧлалляз. Артэ интыяськем одӥг бадӟым висъет, занавескаен шори люкыса, бадӟым княжнаослы огъя будуар но ванна чот вал.

Быдӟым княгиняослэн улонзы огсыр вал. Ӵукназэ сиськон — 9 часын, кыкетӥзэ — 13 часын яке арнянуналъёсы 12 час 30 минутэ. Вить часын — чай, тямыс часын — огъя ӝыт сиськон, нялтас пусйыса, сиён-юон но туж огшоры но бадӟым куронъёстэк вал вал. Ӝытъёсы нылъёс мадиськонъёсты тодылӥзы но пужыятӥськылӥзы, со дыре ик атайзы соослы шара лыдӟиськылӥз.

Вазь ӵукна сямъя кезьыт ваннае пырылӥз, ӝыт — кӧня ке шапык духиен суро шунытаз ваннае, нялтас пусйыса, Анастасия фиалка зыно Коти духиосты яратылӥз. Та сям Екатерина I императрица вакытысен утиськиз. Нылъёс пичиесь дыръя ваннае вуэн ведраосты ляльчи нуллӥз, бадӟым будэмзы бере та уж асьсэлы ик оскемын вал. Ваннаос кык вал — нырысетӥез бадӟым, Николай I эксэй вакытысь кылем маке (дышем сямъя отын пыласькемъёс ваньзы дураз кинюртэмзэс кельтылӥзы), мукетыз — пичиез — нылпиослы чакламын вал.

Арнянуналъёсты чидатэк витьылӥзы — та нуналэ быдӟым княжнаос нылпи балъёсы Ольга Александровна апайзы дӥне ветлӥзы. Тужгес но тунсыко вал Анастасиялы егит офицеръёсын эктыны лэзем ӝыт.

Нылъёс котькуд минутлы шумпотылӥзы, — тодаз вайылӥз быдӟым княгиня Ольга Александровна. — Тужгес шумпотылӥз мусо кутэм нылы Анастасия, оске, али ке но кылӥсько комнатаосысь солэсь чузъяськись серекъям куаразэ. Эктонъёс, крезьгур, мадиськонъёс — йырыныз соос пӧлы выйылӥз.

Быдӟым княжна Анастасиялэн двоюродной агаезлы Диклы гожтэтэз: «17-тӥ куартолэзе 1910. Дуно Дике. Мынам тонэн адӟиськеме потэ. Кыӵе тӥляд али куазьды? Тон али Лондонын воксё огнад? Ку быгатод апайёсыныд пумиськыны?»

Императорлэн мукет нылпиосыз музэн ик Анастасия дораз образование басьтӥз. Дышетон тямыс аресказ кутскиз, программае пыризы француз, англи но немец кылъёс, история, география, Божий закон, естественной наукаос, суредаськон, грамматика, арифметика, озьы ик эктон но крезьгур. Визь люканы тыршеменыз Анастасия ӧз висъяськы, грамматикаез ӧз яратылы, бадӟым янгышъёсын гожъяськылӥз, нош арифметикаез нылпи сямъя «парьслык» шуыса нималляз. Англи кылъя дышетӥсез Сидней Гиббс тодаз вайылӥз, кызьы быдӟым княжна отметказэ ӝутон вылысь одӥг пол сое сяська керттэтэн ас палаз берыктыны выриз, пумит луэмзы бере та сяськаосты ӟуч кылъя дышетӥсьлы Пётр Васильевич Петровлы сётӥз.

Ӵемысь семья улӥз Александровской дворецын, кӧня ке дасо комнатаослэсь оглюкетсэ гинэ басьтыса. Куддыръя Зимний двореце выжылӥзы, со укыр бадӟым но кезьыт ке но вал, Татьяна но Анастасия нылъёс татын ӵем висьылӥзы.

Инвожо шорын семья «Штандарт» император яхтаын дуннеез котыръяны поталлязы, ӵемысь — финн шхеръёс кузя, вакчи экскурсиен куддыръя шормуӵъёсы дугдылыса. Император семьялы тужгес яраз Штандартлэн Бухтаез нимам пичи бухта. Отын пикникъёс радъяллязы яке кортын теннисэн шудылӥзы, сое император ас киыныз лэсьтӥз.

Ливадиысь дворецын но шутэтскылӥзы. Валтӥсь висъетъёсын интыяськылӥз император семья, пристройёсын — кӧня ке придворнойёс, утисьёс но ляльчиос. Шуныт зарезьын пыласькизы, луолэсь крепостьёс но башняос пуктылӥзы, ульчаостӥ коляскаен ворттылон но магазинъёсысь басьяськон вылысь куддыр каре поталлязы. Петербургын ваньзэ тае быдэстыны ӧз пӧрмылы, малы ке шуоно, эксэй семьяез адӟыса, калык лачак люкаськылӥз но уӵертылӥз.

Одӥг ог эксэй семьялэн луись польша поместьяосы но вуылӥзы, татын Николай пӧйшураны яратылӥз.

Григорий Распутин

Валтӥсь статья: Распутин, Григорий Ефимович

Кызьы тодмо, Григорий Распутинэз императрица Александра Фёдоровналы адӟытӥзы-тодматӥзы 1905-тӥ арын 1-тӥ шуркынмонэ. Цесаревичлэсь висемзэ лушкем возизы, соин ик дворын бадӟым инты басьтэм «мужик» кылдэмен валче пӧртэм супыльтонъёс бугырскизы. Анайлэн ас палаз берыктэменыз ик вить нылпиос «святой пересьлы» быдэсак оскыны но асьсэлэсь сюлэмшугъяськонъёссэс но малпанъёссэс солы усьтыны дышизы.

Ольга Александровна тодаз вайылӥз, кызьы огпол эксэен ӵош нылпи кӧлан висъетэ пыризы, татын Распутин тӧдьы ул дэремен дӥсяськем быдӟым княжнаослы кӧлыны бакель сётъялляз.

Вань нылпиос бордаз бурмемын кадь йӧтӥз, — пусйылӥз быдӟым княгиня. — Соос солы быдэсак оскылӥзы.

Сыӵе ик ог-огедлы оскон но синмаськон мылкыд шӧдӥське «Григорий старецлэн» император фамилилы ыстэм гожтэтъёсаз. Тани 1909-тӥ арысь одӥг гожтэтысьтыз чуръёсыз:

Пичи пиналъёс! Тау тодэ ваемдылы, ческыт кылъёстылы, чылкыт сюлэмдылы но Инмар адямиосты яратэмдылы. Яратэ Инмарлэсь инкуазьзэ, Солэсь вань кылдытэмзэ, тужгес но югытсэ. Инмар Анай ялан сяськаосын но киужен выриз.

Анастасия Распутинлы гожъялляз:

Мынам яратоно, дуно, одӥг гинэ эше.

Кыӵе мынам тӥледын выльысь пумиськеме потэ. Туннэ мон тӥледыз уйвӧтам адӟи. Анаелэсь котьку тодо, ку тӥ вуылоды ми доры, мон шудо, та ӟечкыланэз тӥледлы келяны луонлыке вань шуыса. Ӟечкыласько тӥледыз Выль арен, со тӥледлы тазалык но шудбур мед ваёз.

Мон котьку тодам возисько тӥледыз, гажано эше, малы ке шуоно тӥ котьку но монэн ӟеч вал. Тӥледыз кемалась ӧй адӟылы ни, но котькуд ӝыт тӥледыз одно ик тодам вайылӥ.

Мон тӥледлы ваньзэ умойзэ сӥзисько. Анай кылзэ сётэ: тӥ выльысь лыктӥды ке, ми одно Аня дорын пумиськом. Та малпан монэ шумпотонэн тырмытэ.

Тӥляд Анастасияды.

Быдӟым княжна Анастасия, 1912-тӥ аръёс

А. А. Мордвинов тодаз вайылӥз, кызьы Распутинэз виемзы бере ньыль быдӟым княжнаос огаз кӧлан висъетысь диван вылын «ог-огзы борды тып-тып ӝиптӥськыса пукизы, чусомизы но шӧдскымон ӝожомизы», валаса кадь, Россия бугырскиз, сое ӝоген дугдытыны уз луы шуыса. Распутинлэн гадь вылаз императорлэн, императрицалэн но вань вить пиналъёслэн кинюртэменыз мудор понӥзы. Вань император фамилиен валче 1916-тӥ арын 21-тӥ толсуре Анастасия берпум сюресаз келянэ (ӟуч: отпевание) пыриськиз. «Святой старецлэн» шайгу вылаз часовня ӝутыны кенешемын вал, но пуромем учыръёсын валче та малпанэз быдэстыны ӧз кылды.

Нырысетӥ дунневыл ож

Современникъёслэн тодэ ваёнъёссыя, анаеныз но апайёсыныз ӵош Нырысетӥ дунневыл ож кутскем сярысь ялон нуналэ Анастасия зол бӧрдӥз.

Мария но Анастасия Царское Селоысь госпитальын

Ольга, Татьяна но Анастасия Николаевнаос Могилёвын крестьян нылпиосын, 1916-тӥ арын тулыс

Дышем сямъя, дас ньыль арес тырмон нуналазы императорлэн котькуд нылыз одӥг росси полклэн дано командирез луэ вал. 1901-тӥ арын, вордскем нуналыз бере, Вӧсьлыко Анастасия Узоразрешительница нимын, княжнаез сӥлы карыса, пусйизы 148-тӥ Каспийской пехотаен полкез. Полк праздниксэ со 22-тӥ толсуре, дун-чылкыт Анастасиялэн нуналаз, пусйыны кутскиз. Полк черкез Петергофе ӝутӥз архитектор Михаил Фёдорович Вержбицкий. 14 аресказ императорлэн покчи нылыз солэн дано командирез (полковникез) луиз, та сярысь Николай аслаз дневниказ но гожтӥз. Со дырысен полк нимаськыны кутскиз Император высочестволэн быдӟым княжнаез Анастасия нимо 148-тӥ Каспийской пехотаен полк.

Ож вакытэ императрица госпитальлы дворецысь троссэ висъетъёсты сётӥз. Апайёсыз Ольга но Татьяна анаенызы ӵош эмсузэръёс луизы; секыт ужъёслы пичиесь Мария но Анастасия госпитальысь патронессаос кариськизы. Кыкез но апайёс эмъюм басьтыны асьсэ люкам коньдонзэс сётӥзы, сӧсырмемъёслы шара лыдӟиськылӥзы, соослы дӥсь керттылӥзы, картаен но шашкиен шудӥзы, гуртазы верамзыя гожтэт гожъязы, нош ӝытъёсы телефонэн вераськылӥзы, вуриськылӥзы, бинтъёс но корпия дасяллязы.

Быдӟым княжна Анастасия (1916)

Туннэ мон асьме солдатэн артэ пуки но сое лыдӟиськыны дышетӥ, солы та туж яраз, — пусйылӥз Анастасия Николаевна. — Татын, госпитальын, со лыдӟиськыны но гожъяськыны дышетскыны кутскиз. Кыкез мискиньёс кулӥзы, нош толон ӝыт гинэ ай ми соосын артэ пуким.

Мария но Анастасия сӧсыръёслы концертъёс возьматъязы но вань кужмысь тыршизы секыт малпанъёссылэсь мозмытыны. Быдэс нуналъёсын соос госпитальын улӥзы, урокъёсы ужысь мылзы потытэк кошкылӥзы. Анастасия кулытозяз тодаз вайылӥз та нуналъёсты:

Тодам лыктэ кемалась госпитале ветлэммы. Оскисько, вань сӧсыръёс бератаз улэп кылизы. Бӧрысь ваньзэс сямен Царской селоысь нуизы. Тон тодӥськод на-а Лукановез? Со сыӵе шудтэм, огдыре ик туж мусо, котьку но пинал кадь шудэ вал суйпоскесъёсынымы. Солэн визитной карточкаез альбомам утиськиз, но альбоме, жаляса верано, Царское кылиз. Али мон кӧлан висъетам, ӝӧк вылын гожъяськисько, нош отын яратоно госпитальмылэн туспуктэмъёсыз сыло. Тодӥськод-а, госпитале вуылон дырмы — со туж паймымон умой вакыт вал. Та сярысь ми ӵемысь тодамы вайылӥськом, телефон пыр ӝыт вераськонъёсмес но мукетсэ…

Коркась пытсэт улын

Александра Фёдоровналэн матысь эшезлэн Лили Денлэн (Юлия Александровна фон Ден) тодэ ваёнъёсызъя, 1917-тӥ арын тулыспалэ, революция зол пуромем вакытэ, нылпиос ог-огзы бӧрсьы кызамакен (ӟуч: корь) висизы. Берпуметӥез черласа пограмъёс пӧлысь Анастасия вал, со вакытэ царскосельской дворецез ӝутскем войскоос котырто ни вал. Эксэй со дыре главнокомандующийлэн ставкаяз, Могилёвын вал, двореце нылпиосын императрица гинэ кылизы.

Татьяна но Анастасия Ортино пуныен. Царскосельской парк (1917-тӥ арын тулыс)

1917-тӥ арын 2-тӥ южтолэзе выжон уе Лили Ден двореце, Малиновой комнатае, быдӟым княжна Анастасияен ӵош кӧлыны кылиз. Нылпиос медаз куалектэ шуыса, валэктӥзы: дворецез котыртэм войскоос но кыдёкысь ыбылӥськонъёс — ортчись учениослэн бервылзы. Александра Фёдоровна малпа вал «соослэсь зэмлыкез быгатэмезъя кема ватыса возьыны». 2-тӥ южтолэзе 9 часын эксэйлэн престоллэсь куштӥськемез сярысь тодӥзы.

Вирнуналэ, 8-тӥ южтолэзе, двореце вуиз граф Павел Бенкендорф, со ивортӥз, Огдырлы кылдытэм правительство император семьяез Царское селое коркась пытсэт улэ ворсан сярысь пуктэт кутӥз шуыса. Соосын кыльыны мылкыд карисьёслэсь список лэсьтыны ӵектэмын вал. Лили Ден соку ик аслэсьтыз юрттэтсэ дэмлаз.

9-тӥ южтолэзе нылпиослы ивортӥзы атайзылэсь император луэмлэсь куштӥськемез сярысь. Кӧня ке нунал ортчыса бертӥз Николай. Доразы пытсэт сьӧрын улон чидантэм ӧй вал. Сотэк но йыркуръяськись адямиослы бугыръяськыны мултэс муг сётонтэм вылысь нуназеян вакытэ сиёнлэсь лыдзэ кулэстоно луиз, угось эксэй семьялэн менюез дырын-дырын калык азьын шараяськылӥз. Тунсыкъяськисьёс ӵемысь кенер пыр учкылӥзы, кызьы семья паркын калге, куддыръя сое шуласа но тышкаськыса пумиталлязы, озьы юмшанэз кулэстоно луиз.

1917-тӥ арын 22-тӥ инвожое нылъёслэсь йырзэс гольык ӵышкыны огкылысь кенешизы, угось кужмо эмъюмъёслэсь но кема возиськись бадӟым температуралэсь йырсизы усьыны кутскиз. Алексей сое но ӵышкыны косӥз, таин сэрен анаез йыркуръяськиз.

Номыр шоры учкытэк, нылпиослы тодон-валан сётонэз азинтӥзы. Дышетонэз радъяз француз кыллы дышетӥсь Пьер Жильяр; ачиз Николай нылпиосты географилы но историлы нодъяз; баронесса Буксгевден англи кылъя но крезьгуръя урокъёсты нуиз; мадемуазель Шнайдер арифметикаез валэктӥз; графиня Анастасия Гендрикова суредаськыны визьнодаз; эмчи Евгений Сергеевич Боткин — ӟуч кыллы; Александра Фёдоровна — Божий Законлы. Образование басьтэм бадӟымез Ольга но урокъёсы ӵемысь пыриськылӥз, трос лыдӟиськиз, азьвыл тодон-валанъёссэ юнматылӥз.

Анастасия, Ольга, Алексей, Мария но Татьяна кызамакен висемзы бере (1917-тӥ арын инвожое)

Со вакытэ азьвыл эксэй семьялэн кунгож сьӧры кошкыны осконъёсыз вал на; но подданойёсыз азьын данзэ ӝог ыштӥсь Георг V югдурлэсь палэнскиз, эксэй семьяез курбон сётыны мылкыд кариз, соин сэрен министръёсызлэн кабинетазы шок-пуль луиз.

Озьы Огдырлы кылдытэм правительство азьвыл эксэйлэсь семьязэ Тобольске келян пумысен пуктэт кутӥз. Кошкемзылэсь азьвыл берпуметӥ нуналаз соос ляльчиосынызы люкиськизы, паркысь яратоно интыосазы, ӵыпетъёсы, шормуӵъёсы вуылӥзы. Алексей дневниказ гожтӥз, та нуналэ Ольга апайзэ вуэ донгыны вуттӥз шуыса. 1917-тӥ арын 12-тӥ гудырикошконэ Японилэн куншетэз улсын поезд Горд Кирослэн миссиез чотын запасной путьысен лушкем кошкиз.

Тобольск

26-тӥ гудырикошконэ «Русь» пароходэн император семья Тобольске вуиз. Соослы чаклам юрт дась ӧй вал на, соин ик нырысетӥ тямыс нуналзэ соос пароходын улӥзы.

Паллянысен буре — Ольга, Николай, Анастасия, Татьяна. Тобольск (1917-тӥ—1918-тӥ аръёсысь толалтэ)

Бератаз конвой улсын император семьяез губернаторлэн улыно-вылыно особняказ вуттӥзы, татын соослы та дырысен улоно луиз. Нылъёслы кыкетӥ этажысь сэргысь кӧлан инты висъязы, отын соос ваньзы Александровской дворецысь кутэм армейской койкаос вылэ ик интыяськизы. Анастасия аслэсьтыз сэрегзэ ватсаса чеберъяз яратоно туспуктэмъёсыныз но суредъёсыныз.

Губернаторлэн особняказ улон огвыллемгес вал; тужгес шулдырез — укноетӥ мынӥсь-ветлӥсьёсты чаклан. 9 часысен 11 часозь — урокъёс. Атаенызы ӵош юмшаны одӥг час вис. 12-ен 13 часозь выльысь урокъёс. Нуназеян. 14-ен 16 часозь юмшан вакыт но гурт спектакльёс пуктон выллем пӧртэм шулдыръяськонъёс яке толалтэ ас киынызы ӝутэм гурезьысь нискыланъёс. Анастасия, аслаз верамезъя, мылысь-кыдысь пу дасялляз но вуриськылӥз. Отӥяз расписаниея ӝыт службае пыриськылӥзы но кӧлыны выдылӥзы.

Куарусёнэ соосты лэзизы матысь черке ӵукна службае ветлыны. Солдатъёс черк ӧсъёс дорозь ик улэп коридор кылдытъязы. Татын улӥсьёслэн эксэй семья шоры учконзы ӟеч мылкыдогес вал.

Шӧдтэк-шорысь Анастасия тазамыны ӧдъяз, со зол син шоры йӧтӥз, императрица та пумысен сюлэм шуген эшезлы гожтӥз:

Куректонэ усем Анастасия питырскиз, аслаз тусыныз кӧня ке ар талэсь азьвыл сямен Марияез тодэ вайытэ — сыӵе ик паськыт кускыз но вакчи пыдъёсыз… Оскем потэ, арлыд люкамъяз, та ортчоз шуыса…

Паскалы иконостасэз ӟеч лэсьтӥзы, татын дышем сямъя ваньмыз кызъёсын но сяськаосын чеберъямын. Туспуксимы, оскисько, адӟомы. Мон суредаськонме азинтӥсько, верамзыя, урод ӧвӧл — озьы верамзылэсь сюлэм шумпотэ. Ӟечыранъёсын лейкамы, усьыкум сыӵе умой лобӟи!.. эх ма! Ӝыт апайёслы сомында пол мадиськи, соослы акыльтӥз ни, но мон эшшо уно пол вераны быгато на, но нокинлы. Тӥледлы но тыныд вагон тыр верано ивортонъёсы вань. Джиммие сайказ но кызэ, соин ик коркан пуке, йыбырттӥськом. Вот куазь вал! Сюлэм тымиськемен кесяськем ик потылӥз. Паймоно кадь, мон ваньзылэсь зол ӝуай, акробатка кадь! Нош та нуналъёс мӧзмытэсь но шушесь, кезьытэсь, ми туннэ ӵукна кынмим, озьы но корка пырыны ӧм дыртэ… Вождэс эн вае, вунэтӥ Ваньдэсты яратоноосы праздникъёсын ӟечкыланы, куинь пол гинэ уг чупаськы — ваньдэсты огсуземен лачак. Гожтэтэд понна ваньзы тыныд душка тау каро.

 — гожъяз со Мария апаезлы 1917-тӥ арын паска арняе.

«Букет». Быдӟым княжналэн акварель суредэз

Та нуналъёсы милям ялан шунды пиштэ, шунтыны кутске ни, сыӵе шумпотымон! Соин ик ӵемысь инкуазьын улыны тыршиськомы. — Гурезьысь ми ум нискылаське ни (со сылэ на ке но), угось отчы ми медам ветлэ ни шуыса, сое сӧризы но вамен канава гудӥзы, ну, и мед; таин буйгазы кадь, угось со кемалась ни муртъёслэн син шоразы йӧтылӥз. Туж шузи но ляб, зэм. — Табере ми асьмелы выль уж шедьтӥм. Пу вандӥськом, кораськом но пильылӥськом, со пайдаё но туж шулдыр. Умой пӧрме ни. Тазьы ми тросэзлы юрттӥськом на, нош милемлы со шулдыръяськон. Сюресъёсты но подъездэз сузяськомы на, дворникъёслы пӧрмимы. — Мон слонлы ӧй пӧрмытскы на, но ӝоген озьы луыны быгатоз, уг ни валаськы малы сыӵе шуак, оло, ӧжытгес ветлӥсько. — Вождэс эн вае шимес почерке понна, малы ке киме вырытыны секыт. Ми ваньмы таяз арняе исповедь но причастие басьтон азьын пост возиськом, вӧсяськиськом, асьмеос гуртамы кырӟаськом. Наконец черке ветлӥм. Отын причастие но басьтыны луоз. — Нош кызьы тӥ ялан улӥськоды но мар кариськоды. Гожтоно кадь номыр пусйымонэз милям ӧвӧл. Таин йылпумъясько, угось али ми азбарамы потом, ужалом но мукет. — Ваньзы Тонэ юн ӟыгыръяло, мон но, мукетъёссэ но. Ӟеч луэ, мусо кенак.

 — та Ксения Александровна быдӟым княгинялы ыстэм мукет гожтэтысь чуръёс.

Екатеринбург

1918-тӥ арын оштолэзе Россиысь Шоретӥ быдэсъясь комитетлэн ньылетӥ ӧтчамысь Президиумез азьвыл эксэез суд ортчытон вылысь Муское келян пумысен пуктэт юнматӥз. Кема тулкымъяськемез бере Александра «юрттон вылысь» кузпалыз сьӧры мыноно кариськиз, бордаз Мария но итӥськыны кулэ вал.

Мукетъёсыз соосты Тобольскын витьыны кулэ вал; Ольгалы оскизы висись агаез сярысь сюлмаськыны, Татьяналы — юртъерез кутыны, Анастасиялы — «ваньзэсты шулдыртыны». Нырысь-валысь шулдыръяськонэн секыт вал, кошкон азязы берпуметӥ уе нокин синзэ ӧз кыньы, ӵукна ӧс доры крестьян эксэйлы, эксэй кышнолы но соосты келясьёслы подводъёс вуттэмзы бере, куинь нылъёс — «пурысь дӥсен куинь фигураос» — капка дорозь ик кошкисьёсты синвуаськыса келязы.

Бушам коркан улон каллен но мӧзмыт кыстӥськиз. Книгаосъя тунаськизы, ог-огзылы шара лыдӟиськизы, юмшазы. Анастасия азьвыл сямен ик ӟечыранъёсын лэйкалляз, висись выныныз суредаськылӥз но шудӥз. Эксэй семьяен ӵош бырем лейб-медиклэн пиезлэн Глеб Боткинлэн тодэ ваёнъёсызъя, огпол со Анастасияез укнотӥ адӟиз но солы йыбырттӥз, нош утисьёс сое соку ик уллязы, эшшо огпол матэктыны дӥсьтӥз ке, ыбылозы шуыса кышкатыса.

1918-тӥ арын 3-тӥ куартолэзе валамон луиз: кыӵе ке мугъёсын сэрен азьвыл эксэез Муское вуттон уретӥськиз, таин валче Николай, Александра но Мария Екатеринбургысь инженер Ипатьевлэн юртаз дугдоно луизы, выль власть сое эксэй фамилиез интыян вылысь юромо кужмысь талаз. Та нуналэн пусъем гожтэтын императрица нылъёссэ курылӥз «эмъюмъёсты быгатыса кутыны» — та кылъёс пушкы ватэмын вал сьӧразы кутэм но утем дуно чеберъяськон арбериос. Бадӟым апайзы Татьяна кивалтэм улсын Анастасия кылем кильтыръяськон арбериосты дэремезлэн корсетаз вуриз — умой ласянь кылдэм югдурын соос чотын асьсэлы утиськыны сюрес усьтӥськоз малпаллязы.

19-тӥ куартолэзе огкылэ вуэмын вал: Тобольске кылем нылъёс но отчыозь юнмам Алексей, итӥськозы Екатеринбургысь Ипатьевлэн юртаз анай-атаез но Мария борды. Ӵуказеяз, 20-тӥ куартолэзе, ньыльназы ик «Русь» пароходэ выльысь пуксизы, соосты со Тюмене вуттӥз. Адӟисьёслэн тодэ ваёнъёссыя, нылъёсты тунгонэн пытсам каютаосын нуизы, Алексей Нагорный фамилиен денщикеныз ӵош мынӥз, со доры каютае пырыны эмчилы но юн алэмын вал.

22-тӥ куартолэзе пароход Тюмене вуиз, отысен нимысьтыз поездэн ньыль пиналъёсты Екатеринбурге вайизы. Анастасия капчи мылкыдо вал, мынонзы сярысь гожтэтаз серекъяны но выриз:

Мынам дуно эше,

Верало тыныд, кызьы ми мынӥм. Вазь ӵукна потӥм, собере поездэ пуксим но мон умме уси, нош мон бӧрсьы вань мукетъёсыз. Ми ваньмы туж жадим, малы ке шуоно отчыозь быдэс уй ӧм изе. Нырысетӥ нуналаз туж ӝокыт но тузон вал, милемыз нокин медаз адӟыны шуыса, котькуд станциын катанчиосты золъяно луылӥз. Огпол ӝытазе станцилэсь палэнэ пичи корка доры дугдэммы бере котыр учкыны яра вал. Дорам пичи пияш лыктӥз но куриз: «Дядяй, газеттэ сёт, тынад вань ке». Вази: «Мон дядяй ӧвӧл — кенак, газетэ но ӧвӧл». Нырысь ӧй вала, малы монэ «дядяй» малпам, отӥяз тодам лыктӥз, йырсие вакчи ӵышкемын шуыса, милемыз келясь солдатъёсын ӵош кема серекъямы та учырез. Оглом, сюрес вылын трос тумошоез вал, дыр луиз ке, мон тыныд мынэм-ветлэммы сярысь кутсконысеныз пумозяз мадё. Ӟеч лу, эн вунэты монэ. Ваньзы тонэ чупало.

Тынад Анастасияед.

23-тӥ куартолэзе 9 часын ӵукна поезд Екатеринбурге вуиз. Татын нылпиослэсь люкизы сьӧразы лыктэм Жильяр француз кыллы дышетӥсез, Нагорный матросэз но фрейлинаосты. Поезд доры экипажъёсты вуттӥзы но 11 часын ӵукна Ольга, Татьяна, Анастасия но Алексей инженер Ипатьевлэн юртаз ваемын вал.

«Нимысьтыз назначениея юртын» улон огпорма, мӧзмыт вал — мукет номырин ӧз висъяськылы. 9 часын султоно, сиськоно. 2 час 30 минутэ — нуназеян, 5 часын — нуназе чай юон но 8 часын ӝыт сиськон. Семья 10 час 30 минутэ кӧлыны выдэ вал. Анастасия апайёсыныз ӵош вуриськиз, садэтӥ юмшаз, картаен шудӥз но анаезлы духовной изданиосты шара лыдӟылӥз. Кӧня ке бергес нылъёсты нянь пыжыны дышетӥзы, соос мылысь-кыдысь та ужен выризы.

1918-тӥ арын 18-тӥ инвожое, пуксёнэ, Анастасия аслэсьтыз берпуметӥ 17-тӥ вордӥськем нуналзэ пусйиз. Со нуналэ куазь туж умой вал, ӝыт пал гинэ кӧня ке гудыръяз. Сяськаязы сирень но медуница. Нылъёс нянь пыжизы, отӥяз Алексеез садэ поттӥзы но, быдэс семьязы бордазы итӥськиз. 8 часын ӝыт понна сиськизы, кӧня ке партия картаен шудӥзы. Изьыны выдӥзы огшоры вакытэ, ӝыт 10 час 30 минутэ.

Ыбылон

Валтӥсь статья: Эксэй семьяез ыбылон

Официально лыдъяське: эксэй семьяез ыбон сярысь пумкыл кутӥз Урал совет 16-тӥ пӧсьтолэзе карез белогвардейской войскоослы сётыны кышкытлык кылдэмен но эксэй семьяез утён сярысь шараяськем заговорен сэрен. 16-тӥысь 17-тӥ пӧсьтолэзе выжон уе 23 час 30 минутэ Урал советысь кык нимысьтыз уполномоченнойёс ыбылон сярысь гожтэм приказ сётӥзы охраналэн отрядэзлэн командирезлы П. З. Ермаковлы но юртысь комендантлы, Чрезвычайной следствиея комиссилэн комиссарезлы Я. М. Юровскийлы. Казнез быдэстон сярысь вакчи эчешемзы бере эксэй семьяез сайкатӥзы, ыбылӥськонъёс луыны быгатозы шуыса, борддоръёс бордысь палдэм пуляослэсь быронтэм вылысь сэргысь гулбечысь висъетэ васькыны ӵектӥзы.

Ипатьев коркалэн гулбечез. Туспуктэмез эксэй семьяез быдтон учырез эскерон вакытэ лэсьтӥз следователь Соколов

Яков Юровскийлэн отчётэзъя, Романовъёс берпуметӥ минутозь номыре ӧз валалэ. Гулбече Я. М. Юровский куремъя пуконъёс васькытэмын вал, отчы пуксизы императрица но киосаз кутэм пиеныз Николай. Анастасия апайёсыныз ӵош мышказы султӥзы. Сузэръёс сьӧразы кӧня ке сумкаосты кутӥзы, Анастасия ссылка дыръя ялан бордаз возиськем яратоно Джимми пунызэ но васькытӥз.

Куд-ог ивортонъёсъя, нырысетӥ залп бере Татьяна, Мария но Анастасия улэп кылизы, соосты корсетъёсазы вурем дуно чеберъяськон арбериос утизы. Бератаз Соколов следователен юалляськем адӟисьёс веразы, эксэй нылъёс пӧлысь кулонлы тужгес кема Анастасия пумитъяськиз, сӧсыртэм муртэ штыкъёсын но прикладъёсын «быдтоно луиз». Эдвард Радзинский историкен шараям материалъёсъя, ваньмызлэсь кемагес улэп возиськиз Александралэн ляльчиез Анна Демидова, со ассэ дуно чеберъяськонъёсын тырмытэм миндэрен ватӥз.

Бырем выжыосынызы ӵош Анастасиялэсь мугорзэ быдӟым княжнаослэн валесъёсысьтызы кыскем шобретэ бинялтӥзы но ватон вылысь Ньыль вынъёс урочищее (Ганина яма) поттӥзы. Отын лысьӧмъёсты, воксё тодманы луонтэм вылысь прикладъёсын йыгаса но сера кислотаен пазяса, огаз вуж шахтае куштӥзы. Бератаз следователь Соколов татысь шараяз Ортино пунылэсь лысьӧмзэ. Ыбылэмзы бере быдӟым княжнаослэн комнатаысьтызы шедьтӥзы Анастасияен быдэстэм суредэз — кык кызьпуос вискысь ӟечыранэз.

Сямыз. Анастасия сярысь тодэ ваёнъёсысь

Тодэ ваёнъёссыя, Анастасия пичи но тып-тып мугоро, нап-ӵуж пыръем югыт курень йырсиё, атаезлэн сямен ик бадӟымесь чагыр синмо вал.

Мария апаезлэн сямен ик, Анастасиялэн мугорыз юн вал. Анаезлэн выжыезъя со паськыт макесо, веськрес кусо но ӟеч гадё вал. Анастасия лапег гинэ, музъем вылэ юн пуктэм, но со дыре ик туж капчи адскылӥз. Веськрес Ольгаен но лябыт Татьянаен ӵошатыса, ымнырын но мугорын огшоры вал. Анастасия огназ ымныр тусын атаез выжые мынӥз — ӧжытак кузялэс, бам вылаз мычиськем быгытъёсын но паськыт кымесын. Со бубизлы туж кельшылӥз. Бадӟым ымныр тусо — бадӟым синъёсын, бадӟым нырын, небыт ымдуръёсын Анастасия укшалляз пинал Мария Фёдоровналы — аслаз песянаезлы. Анастасиялэн тулкымъяськись но чурытгес йырсиез вал.

Анастасия эшшо огаз мимикая сценкаын

Ӝог но умой вераськиз. Куараез векчи, мур. Дышем сямъя зол серекъялляз.

Нылаш капчи сямыныз но улонлы шумпотыны быгатэменыз висъяськылӥз, лаптаен, фантыен, серсоен шудыны яратылӥз, чималиен шудыса, часъёсын дворецетӥ бызьылыны быгатылӥз. Писпуосы капчиен тубалляз, ӵем дыръя йыртэман понна гинэ музъем вылэ васькыны пумит луылӥз. Ялан оломар но малпалляз, кылсярысь, яратылӥз апайёсызлэсь, вынызлэсь но егит фрейлинаослэсь бамъёссэс но ныръёссэс ческыт зыно карминэн но боры вуэн буяны. Солэн капчи киыныз модае пыриз йырсие сяськаос но лентаос пуныны, таин пичи Анастасия туж данъяськылӥз. Бадӟыменыз Мария апаеныз люконтэм вал, агайзэ туж яратӥз, Алексеез кыче ке висён погыртыку, валес котыраз сое часъёсын шулдыртылӥз. Анна Вырубова тодаз вайылӥз: «Анастасия, мугорлэсь но вирлэсь интые, ртутьлэсь лэсьтэмын вал кадь». Одӥг пол, чылкак пичи дыръяз, куинь яке ньыль аресказ, Кронштадтысь сиё-дано ужрадын, пуны кариськыса, со ӝӧк улэ пыриз но куноослэсь пыдъёссэс чепылляны кутскиз — та понна атаез соку ик чурыт кылзэ вераз.

Озьы ик со комической актрисалэн яркыт талантэныз висъяськылӥз но котырысьтыз адямиос кадь кариськыны но соосты пышкылыны яратылӥз, та ужез туж быгатыса но серемес быдэстылӥз. Одӥг пол Алексей солы вераз:

Анастасия, тыныд театрын шудоно, туж тумошо луоз, оскы!

Талы пумит витёнтэм шорысь валэктон кылӥз, быдӟым княжна театрын шудыны уг быгаты, солы мукет ужъёсыз вань шуыса.

Куддыръя маскаръяськонъёсыз умойтэме вуттылӥзы. Озьы со жадёнэз валатэк апайёссэ исалляз, огпол Татьянаен лымыен лэзьяськыса шудыкуз, солэн ымныраз сокем зол йӧттӥз, апаез пыд йылаз возиськыны ӧз быгаты ни; ачиз янгыше усем нылаш, юн куалектэменыз, анаезлэн ки вылаз кема бӧрдӥз. Быдӟым княгиня Нина Георгиевна берлогес тодаз вайылӥз: ӝужыт мугоро луэмез понна пичи Анастасия нокызьы но простить карыны ӧз быгаты, шудыкузы но кескичъяськылӥз, пыд пуктыны, вожвылъяськисьсэ ӵабъяны но выриз.

Татьянаен но Марияен (1908)

Серекъян-маскаръяськон сямен со, эсэпсэ валатэк, кышкыт гожозь ялын вуылӥз, — тодаз вайылӥз Глеб Боткин, эксэй семьяен ӵош быдтэм лейб-медиклэн пиез. — Со ялан кылзэ чурыт юанозь югдурез вуттылӥз.

Ӝикыт луэменыз но чылкытлыкез яратэменыз но пичи Анастасия ӧз висъяськылы, берпуметӥ императорлэн дворецаз аккредитация пыр поттэм американ дипломатлэн Хэлли Ривз кышноез вералляз, кызьы Анастасия театрын, тӧдьы кузь перчаткиоссэ куштытэк, шоколад сииз, аслэсьтыз киоссэ но ымнырзэ саптаз. Кисыосыз котьку шоколадэн «Крем-брюле» кампетэн тырмытэмын вал, соосты но жалятэк котырысь адямиослы люкылӥз. Пушмульылэсь аллергиен курадӟылӥз.

Озьы ик яратылӥз животъёсты. Нырысь-валысь дораз Швыбзик нимо шпиц улӥз, соин герӟаськем учыръёсыз но трос. Озьы быдӟым княжна, пуныез бордаз выдытэк, кӧлыны пумит луылӥз, нош одӥг пол, яратоно вордоссэ ыштыса, сое утыса ӧтьыны ӧдъяз — Швыбзик диван улысь шедиз. Шпиц инфекцилэсь 1915-тӥ арын кулэм бере, кӧня ке арня ӵоже куректӥз. Апайёсыныз но выныныз ӵош сое, берпум сюресаз келяса, отпевание ортчытӥзы но Петергофысь Нылпи шормуӵе ватӥзы. Собере бордаз Джимми нимо пуны улӥз.

Со яратылӥз суредаськыны, быгатылӥз но, мылысь-кыдысь шудылӥз агаеныз гитараен яке балалайкаен, керттӥськиз, вуриськиз, кинофильмъёсты учкылӥз, со вакытэ модае пырем туспуктонэн выриз, аслаз туспуктэмъёсын альбомез вал, яратылӥз телефонэн вераськыны, лыдӟиськыны яке валесын огшоры кылльыны. Ож вакытэ тамак кыскыны ӧдъяз, та ужын солы эш луизы апайёсыз.

Быдӟым княжналэн тазалыкез ляб вал. Пичи дырысеныз висись пыдпыдэсыныз курадӟылӥз — бадӟым чиньыосыз вордскемез дырысен кырыжамен сэрен, сое лат. hallux valgus синдром нималлязы, ӵапак та тодметъя отӥяз огез самозванка Анна Андерсон ассэ Анастасия нимаса пӧяны ӧдъяз. Тыбырыз ляб вал, быгытъёссэ юнматон вылысь массаж лэсьтӥсьлэсь со буфетэ яке валес улэ пегалляз. Пичи вандӥськыкуз но, вирез кема ӧз дугдылы, таин валче эмчиос йылпумъян лэсьтӥзы: анаез сямен ик Анастасия гемофилия висёнэз нуллӥсь луэ.

Эксэй семьяез быдтонъя ужез эскеронэ пыриськем генерал М. К. Дитерихспусйылӥз:

Быдӟым княжна Анастасиялэн суредэз

Быдӟым княжна Анастасия Николаевна, дас сизьым аресэз шоры учкытэк, воксё пинал кадь вал. Озьы малпан кылдылӥз, вылтусыныз но шулдыр сямыз шоры учкыса. Со лапег, лач-лач мугоро вал — «кубышка» исаллязы сое апайёсыз. Адямиослэсь ляб палъёссэс синйылтыны но соосты быгатыса имитация пыр адӟытыны быгатэменыз висъяськылӥз. Со инкуазен сётэм, быгатӥсь комик вал. Котьку но ваньзэсты серекъятылӥз, рос-прос тусбуйзэ утьыса.

Фридрих Шиллерлэсь но Иоганн Вольфганг фон Гётелэсь пьесаоссэс лыдӟылӥз, Гектор Малоез но Мольерез, Чарльз Диккенсэз но Шарлотта Бронтеез яратылӥз. Роялен ӟеч шудылӥз, анаеныз ӵош ньыль киын мыло-кыдо быдэстылӥз Фредерик Шопенлэсь, Эдвард Григлэсь, Сергей Рахманиновлэсь, Пётр Чайковскийлэсь пьесаоссэс.

Француз кыллы дышетӥсез Жильяр со сярысь тазьы тодаз вайылӥз:

Эркиям мурт вал со — аръёс ортчемъя та сямзэ тупатӥз. Туж азьтэм, кызьы луэ куддыръя туж быгатӥсь нылпиосын, со француз кылын умой вераськылӥз но пичи театр сценаосты быгатыса шудылӥз. Со туж шулдыр вал, урод мылкыдо адямиосты серекъятыны пӧрмытылӥз, таин валче куд-огез котырысьтыз адямиос, англи дворецысь анаезлы сётэм кушем нимзэ тодазы вайыса, сое «Шунды си» шуыны кутскизы.

Лысьӧмъёсты шараян

«Ньыль вынъёс» урочище Коптяки гуртлэсь кӧня ке иськемын интыяськемын, Екатеринбурглэсь кыдёкын ӧвӧл. Огзэ гуэз Юровскийлэн командаез эксэй семьялэсь но ляльчиосызлэсь лысьӧмъёссэс ватон вылысь бырйиз.

Ганина яма вадьсысь кирос

Интыез лушкем возьыны ӧз кылды, угось урочищеен артэ ик Екатеринбурге нуись сюрес ортчылӥз, вазь ӵукна процессиез адӟиз Коптяки черкогуртысь крестьян Наталья Зыкова, собере эшшо кӧня ке мурт. Красноармеецъёс, ожтӥрлыкен кышкатъяса, соосты палэнэ уллязы.

Отӥяз со нуналэ ик урочищеын гранатаос пуштылэм куараос кылӥськизы. Югдурен тунсыкъяськись котыр улӥсьёс, солдатъёс котыртэмысь кошкем бере кӧня ке нунал ортчыса, урочищее вуизы но кӧня ке дуно арбериосты шедьтӥзы (эксэй семьялэсь), дыртыса ужась палачъёс соосты ӧз синйылтэ.

1919-тӥ арын 23-тӥ куартолэзьысен 17-тӥ инвожоысен следователь Соколов интыез котыр эскериз но гуртын улӥсьёслэсь юалляськиз.

6-тӥ инвожоысен 10-тӥ пӧсьтолэзёзь адмирал Колчаклэн приказэзъя Ганина ямаез бугыръяны-гудыны ӧдъязы, но тӧдьыос карысь чигнаны кутскемен, ужъёс дугдытэмын вал.

1991-тӥ арын 11-тӥ пӧсьтолэзе Екатеринбург вӧзысь Парсьпи нимо нюкын одӥг метр мурдалаысь лысьӧмъёсты шедьтӥзы, соосты эксэй семьялэн но ляльчиоссылэн лыдъязы. Анастасиялэн чот мугорыз 6 номерен пусъемын вал. Со пумысен шугъяськонъёс кылдӥзы —ымнырызлэн паллян палыз быдэсак юдэсэн-юдэсэн пыргытэмын вал; росси антропологъёс шедьтэм юдэсъёсты огазеяны выризы, тырмисьтэм ымныр люкетсэ радъяны вырыса. Тыршыса ужамзылэн емышез осконтэм вал. Ӟуч эскерисьёс шедьтэм лысьӧмлэсь ӝуждалазэ чаклаллязы, озьы ке но шайгуысь шедьтэм йыркобыосты туспуктэмъёсъя но компьютер модельёсъя ӵошатыса мертазы, но та амаллэсь шонерлыксэ американ ӧнерчиос умойтэмен лыдъязы.

Америкаысь тодосчиос лыдъяллязы, ышем мугор Анастасиялэн шуыса, угось шараям нылкышно лысьӧмъёс пӧлысь огез но быдэ вуымтэ муртлэн кадь ӧй вал: сыӵе тодметъёс пӧлын ӧй вал юнмамтэ сюрлы но карнанлы (ӟуч: ключица), будымтэ йырпинь, ӵапак соосты шараяны медо вал бырем дас сизьым аресъем ныллэн мугорысьтыз.

1998-тӥ арын, император семьялэсь лысьӧмъёссэ музъеме ватыкузы, 5’7" (170 см) кузьдалаем мугорез Анастасия нимын пусйизы. Быдтэмзылэсь ӝыны ар азьвыл апайёсыныз ӵош лэсьтэм туспуктэмын адӟиське: Анастасия соослэсь кӧня ке дюймлы лапеггес вал. Ыбылэмзылэсь сизьым толэзь азьвыл императрица дас куать аресъем нылызлэн мугорыз сярысь Анна Вырубовалы гожтэтаз пусйылӥз: «Куректонэ усем Анастасия питырскиз, аслаз тусыныз кӧня ке ар талэсь азьвыл сямен Марияез тодэ вайытэ — сыӵе ик паськыт кускыз но вакчи пыдъёсыз… Оскем потэ, арлыд люкамъяз, та ортчоз шуыса…». Тодосчиос уг оско, берпум толэзьёсаз со ӝог будӥз шуыса. Зэмос ӝуждалаез ог 5’2" вал. Со дыре ик криминалист В. Соловьёв лыдъяз, мугорзэ Анастасиялэн сямен тодманы-пусйыны луонлык сётэ солэн юбкаез.

2007-тӥ арын кылдэм юанъёслы пум понӥзы: Парсьпи нимо нюкысь егит ныллэсь пияшлэсь лысьӧмъёссэс шедьтӥзы, бератаз цесаревич Алексей но Мария сямен тодмазы. Генетикая экспертиза йылпумъянъёсты юнматӥз. 2008-тӥ арын пӧсьтолэзе та иворез юнматӥз РФ-ысь Прокуратура бордысь Следствиея комитет, пусйиз: 2007-тӥ арын Коптяково вуж сюрес вылысь шедьтэм лысьӧмъёсъя экспертиза возьматӥз, шараям лысьӧмъёс быдӟым княжна Мариялэн но вуоно император цесаревич Алексейлэн луо шуыса. Но с М. Коблэн (Dr. Michael D. Coble) кивалтэмез улсын ужась тодмо генетикъёслэн группазы (вань ДНК-тестъёсты лэсьтонэ пыриськизы) 2009-тӥ арын йылпумъян статьяын гожтӥзы («Кенешон» люкет, англи кылысь берыктыса):

Пусйыны кулэ: кыкетӥ ватосысь шедьтэм лысьӧмъёсъя Мария яке Анастасия со шуыса паськыт вӧлмем эчешонъёслы ДНК анализъя гинэ пум поныны уг луы. Котькуд сузэрлэн угось ДНК даннойёсыз ӧвӧл, соин ик ми Алексеез гинэ — Николайлэсь но Александралэсь пизэс гинэ — идентифицировать карыны быгатӥськомы.

Озьы ик та статьяысь «Справочной ивортодэт» люкетын (S1 суредлы валэктонын):

Марияез яке Анастасияез сямен лысьӧмъёсты ДНК анализъя тодманы ӧз луы.

Эксэй семьялэн быремез пумысен уголовной уж официально пытсамын.

Асьсэды Анастасия нимамъёс

Эксэйлэн огез нылыз утиськыны быгатэм пумысен вераськонъёс — оло, Ипатьевлэн юртысьтыз пегӟыса, оло, революцилэсь азьвыл ик ляльчиеныз воштӥськыса, ӟуч эмигрантъёс пӧлын эксэй семьяез ыбылэмзы бере ик вӧлмыны ӧдъязы. Куд-ог адямиослэн покчи княжна Анастасиялэн улэп кылёнэзлы осконзэс ас мылкыд каремзыя уже кутыны тыршемзы сэрен куамынлэсь трос пӧяськись Анастасияос кылдӥзы. Одӥгез тужгес тодмо самозванка луиз Анна Андерсон, со верамъя, Чайковский фамилиен солдат сое, сӧсыртэм улэп муртэ, Ипатьевлэн коркаезлэн гулбечысьтыз поттыны быгатӥз. Та историез ик мукет сямен судын вералляз азьвыл австрийской военнопленный Франц Свобода, отын Андерсон быдӟым княжна нимаськыны но «атаезлэн» гипотетической ваньбуреныз кузёяськыны правозэ юнматыны медэ вал. Свобода ассэ Андерсонэз утисен нимаз, солэн мадемезъя, сӧсыртэм княжна «солы синмаськем бускелезлэн Х. Нимо муртлэн» юртаз вуттэмын вал. Та версиын трос осконтэмез вал, кылсярысь, со вакытэ комендант часэз тӥян, быдӟым княжналэн пегӟемез сярысь кар кузя лякылэм ялонъёсын афишаос, номыр но сётымтэ котыр обыскъёс. Со вакытэ Екатеринбургысь Великобританилэн азьвыл валтӥсь консулэз Томас Хильдебранд Престон та выллем малпанъёслэсь танӥськиз. Андерсон кулытозяз аслэсьтыз «эксэй» выжыысь потэмез сярысь пусйылӥз, «Я, Анастасия» нимо книга гожтӥз но кӧня ке дасо ар ӵоже судъёстӥ костаськиз, но улэп дыръяз берпуметӥ пумкыл ялэмын ӧй вал.

Тужгес тодмоез ассэ Анастасия нимам пӧечи Анна Андерсон

1995-тӥ но 2011-тӥ аръёсы генетикая анализ азьвыл кылдэм малпанэз юнматӥз: Анна Андерсон зэмос улонын Франциска Шанцковская вал — берлин заводысь пуштӥсь арбериосты лэсьтонъя ужась. 2011-тӥ арозь лыдъяллязы, производствоын кылдэм шудтэм учыр дыръя со секыт сӧсырмиз (1916-тӥ арын) но йырвизез сураськиз, кулытозяз талэсь мозмытскыны ӧз быгаты.

2011-тӥ арын американецъёс Грэг Кинг но Пенни Уилсон Анна Андерсон но Франциска Шанцковская сярысь выль эскеронъёсын уж печатлазы — «The Resurrection of the Romanovs: Anastasia, Anna Anderson, and the World’s Greatest Royal Mystery» книга (ӟуч: Воскрешение Романовых: Анастасия, Анна Андерсон и самая большая королевская тайна в мире). Отын соос пусъё: фабрикаысь архивъёсты эскерыса, тодӥзы, производствоын шудтэм учыр дыръя (1916-тӥ арын) Шанцковскаялэн йырыз но суй-пыдъёсыз кӧня ке ӵабтӥськизы (мур ӧвӧл, вылтӥз гинэ) шуыса, эмчиосын Анна Андерсонлэн пель сьӧраз, мугораз но суй-пыдъёсаз юн сӧсырмемъёсыз сярысь пусъемлы та нокызьы уг тупа. Со сяна, Кинг но Уилсон Шанцковская пинал ваем нылмурт вал шуыса ивортодэтъёс ӧз шедьтэ — со дыре ик Андерсонлэн медициная картаосаз нылпи вордэмез сярысь (1919-тӥ арын) пусъемын. Кинглэн но Уилсонлэн книгаосазы критикъёс ог 40 валамтэ интыосты шараязы ке но, авторъёс книгаязы йылпумъян лэсьтӥзы, Анна Андерсон но Шанцковская со одӥг адями вал шуыса.

Эшшо одӥг пӧечи Анастасия вал Евгения Смит (Евгения Сметиско) — суредась, США-ын аслаз улонэз но мырдэм утиськемез сярысь «мемуаръёсты» печатлам мурт. Со быгатӥз ачиз борды бадӟым саклык кыскыны но коньдонэн югдурзэ йӧн-йӧн тупатыны, калыклэсь тунсыкез вылын шудыса.

Анастасиялэн паймымон сямен утиськемез сярысь иворъёсты ӟырдатъязы на пегӟем княжнаез поездъёсысь но коркаосысь утчась обыскъёсын эскерись большевикъёс. 1918-тӥ арын Пермьын вакчи дырлы пытсэт сьӧры пуктэм принцесса, Анастасиялэн кыдёкысь ӵыжы-выжыезлэн Иоанн Константинович князьлэн кышноез Елена Петровна, ивортӥз, камерае со доры охрана вуттылӥз ассэ Анастасия Романоваен нимась нылашез, дыды эксэйлэн нылыз-а шуыса, юаз. Елена Петровна валэктӥз, нылашез со ӧз тодма шуыса, соку дыдыез охрана нуиз. Историкъёс пӧлысь огез мукет версиез зэмлыко лыдъя. Тямыс кузя свидетельёс ивортылӥзы Пермьлэсь уйпал но шундыӝужан палан 37 номеро Запасной путь нимо чугун сюрес станциын 1918-тӥ арын куарусёнэ егит нылашлэн эшшо огез утиськон учырез дыръя берытскемез сярысь. Со адӟисьёс пӧлын вал Максим Григорьев, Татьяна Сытникова но Фёдор Сытников пиез, Иван Куклин но Марина Куклина, Василий Рябов, Устина Варанкина но эмчи Павел Уткин, кудӥз нылашед та учыр бере эскериз. Куд-ог адӟисьёс Тӧдьы Армиысь следовательёс быдӟым княжналэсь туспуктэмзэ возьматэмзы бере нылашысь Анастасияез тодмазы. Уткин соослы озьы ик вераз, сӧсырмем нылаш, кудзэ Пермьысь ЧК-лэн штабаз эскериз, солы ивортӥз: «Мон — правительлэн нылыз, Анастасия».

Со дыре ик 1918-тӥ арлэн шораз кӧня ке ивортонъёс вал асьсэды Россиын утиськем Романовъёс шуыса нимась егит адямиос сярысь. Распутинлэн Мария нылызлэн картэз Борис Соловьёв, утиськем Романов понна шуыса, нимо-дано росси семьяослэсь пӧяськыса коньдон курылӥз, поттэм уксёен Китае кошкыны малпаса. Соловьёв озьы ик шедьтӥз асьсэды быдӟым княжнаос шуыса возьматыны но калыкез пӧяны соглаш луись нылкышноосты.

Котьма ке но, зэмен ик одӥг яке кӧня ке охранникъёс улэп кылем Романовъёс пӧлысь кинэ ке утьыны быгатӥзы шуыса осконъёс вань. Яков Юровский куриз, возьмаськисьёс солэн контораяз мед лыктозы но адями вием бере лушкам арбериоссэс выльысь мед учкозы-шараялозы шуыса. Озьыен, быремъёслэсь мугоръёссэс грузовикын, гулбечын но коркалэн коридораз эскерытэк кылён вис вал. Одӥг-ог иворъёсъя, куд-ог охранникъёс, кудъёсыз виылонъёсы ӧз пыриське но быдӟым княжнаосты жаляллязы, гулбече мугоръёсын ваче син кылизы.

1964-тӥ—1967-тӥ аръёсы, Анна Андерсонъя ужез эскерыкузы, Венаысь портной Генрих Клейбенцетль (нем. Heinrich Kleibenzetl) ивортылӥз 1918-тӥ арын 17-тӥ пӧсьтолэзе Екатеринбургын ыбылон учыр бере сӧсырмем Анастасиез адӟемез сярысь. Нылашез Ипатьевлэн коркаезлы ваче берин сылӥсь юртын утиз-чаклаз вуриськисьлэн корка возисез Анна Баудин (англ. Anna Baoudin).

«Мугорызлэн улӥ люкетэз быдэсак виресь вал, синъёсыз ворсамын, ачиз тӧдьы бӧз кадь», — свидетель сямен вералляз со. «Фрау Аннушка но мон ангессэ миськимы, отӥяз со нискетыны ӧдъяз. Лыосыз тӥямын вал, вылды… Собере со минутлы синъёссэ усьтӥз». Клейбенцетль оскытылӥз, сӧсыртэм нылаш корка возисьлэн юртаз куинь нунал ӵоже улӥз шуыса. Красноармеецъёс отчы пыразы, но кузёзэ умой тодо вал бере юртэз ӧз эскере. «Соос тазьыгес веразы: Анастасия ышиз, но со татын ӧвӧл, со зэм». Отӥяз та корка нылашез вуттэм красноармеец вуиз но дыдыез сьӧраз кутӥз. Клейбенцетль солэн азьлань улонэз сярысь номыр ӧз тоды ни

Берпуметӥез пӧечи Анастасия вал Наталья Билиходзе, кулӥз 2000-тӥ арын.

Серго Бериялэн «Мой отец — Лаврентий Берия» книгаез потэм бере супыльтонъёс выльысь улӟизы, отын автор тодаз вае Бадӟым театрлэн фойеяз Польшаысь нимтэм православной монастырьлэн настоятельницаез луэм утиськем Анастасиен пумиськемез сярысь.

1991-тӥ арын эксэй лысьӧмъёсты тодосчиос эскерем бере «паймымон сямен утиськон» сярысь огдырлы буйгам супыльтонъёс выль кужымен бугырскизы, куке прессаын шедьтэм мугоръёс пӧлын огез быдӟым княгиня (Мария шуыса лыдъяллязы) но цесаревич Алексей ӧй вал шуыса, публикациос потӥзы. Мукет версиосъя, лысьӧмъёс пӧлын апаезлэсь кӧнялы ке пичи но со кадь мугоро Анастасия ӧй вал, таин сэрен идентификация дыръя сураськизы. Утиськем Анастасиялэн интыяз таяз рад потӥз Надежда Иванова-Васильева, со улонысьтыз бадӟым люкетсэ Кузонысь психиатрияя лечебницаын ортчытӥз, татчы сое улэп кылем эксэй нылкышнолэсь кышкась муртэ сямен интыяз Совето власть.

Дмитрий Романович Романов князь, Николайлэн праправнукез уно аръёс ӵоже кыстӥськись самозванкаослэн эпопеяязы пумкыл пуктӥз:

Мон тодэ ваемъя, Анастасия нимо самозванкаос 12-ен 19 кузя вал. Ож бере вӧлмем депрессиен валче тросэзлы йырвизьзы сураськиз. Ми, Романовъёс, шудо луысалмы, Анастасия со ик Анна Андерсонлэн интыяз улэп луысалыз ке. Но жаль, со ӧй вал со!

Ватсаса аргументъёс луизы 2007-тӥ арын со урочищеысь ик Алексейлэсь но Мариялэсь мугоръёссэс шедьтон, антропологияя но генетикая экспертизаос возьматӥзы, эксэй семья пӧлын утиськемъёс ӧй вал шуыса.

Но 2014-тӥ арын тулыспалэ РАН-ысь академик Вениамин Алексеев Анна Андерсонлэн кылдэмез но мырдэм утиськем Романовъёс сярысь выль ивортонъёсты печатлаз.

Канонизация

1981-тӥ арын кунгож сьӧрысь Ӟуч православной черк берпуметӥ эксэй семьяез курадӟытыса быдтэмъёс чот канонизировать карыны ӧдъяз.

Курадӟытыса быдтэм дун-чылкыт Анастасиялэн мудорыз

1991-тӥ арын Ганина ямаез выльысь бугыръяны кутскемзы бере Россиын канонизацилы дасяськизы. Мелхиседек архиепископ бакель сётэмъя, 7 пӧсьтолэзе урочищее Йыбырттон кирос юнматӥзы.

1992-тӥ арын 17-тӥ пӧсьтолэзе эксэй семьяез ватон инты дорозь ортчиз нырысетӥез киросэн архиерей мынон.

Киотэн выль киросэз татчы пуктӥз Курадӟытыса быдтэм дун-чылкыт эксэй мученикъёслэн Братствозы.

1995-тӥ арын 17-тӥ пӧсьтолэзе выжон уе кирос дорын нырысетӥез Божественной литургия ортчиз, табере со арлы быдэ радъяськылэ.

2000-тӥ арын Ӟуч православной черк канонизация сярысь пумкыл юнматӥз. Со аре ик патриарх бакель сётэмен пуктыны кутскизы Ганина ямаын эксэй семьялы сӥзем пиосмурт монастырь.

Оскиськом, Ганина ямаын курадӟытыса вием эксэйёслэсь мугорзэс быдтэм интые пуктыны кутскем скит, кытын матысь дыре черк молитва чузъяськоз, трос чидам урал музъем вылын кылдэм кышкыт йыружлэсь бервылзэ небӟытоз.

2000-тӥ арын 1-тӥ коньывуонэ Екатеринбургысь но Верхотурьеысь Викентий архиепископ Курадӟытыса быдтэм дун-чылкыт эксэйёслы сӥзем вуоно черклы нырысетӥ изэз понӥз. Монастырьлэн бадӟым люкетэз пулэсь ӝутэмын, отчы пыро сизьым валтӥсь черкъёс, кылсярысь, дун-чылкыт эксэй страстотерпецъёслы сӥзем валтӥсь храм, дун-чылкыт Серафим Саровскийлы сӥзем черк но мукет.

Буре ваён

• 1902-тӥ арын солы сӥзьыса нимамын Сьӧд зарезь губерниысь Анастасиевка черкогурт;
• 2010-тӥ арын толсуре Анастасия Романовалы сӥзьыса нимамын вал St. Peter Line росси судоходной компаниен басьтэм круиз паром — Princess Anastasia;
• Санкт-Петербургын Варшавской вокзал дорын Христослэн Улӟемезлы сӥзем храм вӧзын Романовъёслэн семьязылы синпелет сылэ;
• Екатеринбургын Ипатьевлэн юрт бервылаз Вир вылын черк пуктэмын, та интыын пытсэт улын возизы но 1918-тӥ арын 17-тӥ пӧсьтолэзе ыбылэмын вал берпуметӥез росси император Николай II, солэн семьяез но ньыль ляльчиез;
• 1997-тӥ арын Fox Animation Studios компания «Анастасия» мультфильм поттӥз.

Лулчеберетын

• Романовъёслэн семьязылэн улэмезлы но быремезлы сӥзем кӧня ке фильмъёсын персонаж луэ;
• Assassin’s Creed Chronicles: Russiaнимо компьютер шудонын огез протагонист луэ;
• «Анастасия» мультфильмын валтӥсь герой луэ;
• «Американская история ужасов» сериаллэн 8-тӥ сезонысьтыз 9-тӥ сериын адӟытэмын, сое шудӥз Эмилия Арес.
• Быдӟым княжна Анастасия Романовалы сӥземын Ex Libris голланд метал-группалэн «Ann» нимо альбомезлэн кыкетӥ люкетэз;
• Скиталецъёс нимо анимеын кылдэ;
• Fate/Grand Order шудонын Кастер классысь ляльчи луэ;
• «Анастасия: Однажды во времени» (англ. статьялэн ӟуч нимыз Anastasia: Once Upon a Time) фильмысь персонаж;
• «Моя Родина — это ты» телесериалын сое шудӥз турецкой актриса Алина Боз.

Выжыосыз

Людвиг II Гессенский но Вильгельмина Баденская Карл Гессенский принцлэн, озьы ик Александра II императорлэн кышноезлэн Мария Александровналэн анай-атаез луо. Зэм, биографъёс лыдъямъя, кыкетӥяз учыре атаез номинальной вал, зэмос бубиз барон Август фон Сенарклен де Гранси вал, соин Вильгельмина Баденская улӥз 1820-тӥ арысен.

Валэктонъёс

Источникъёс

Литература

• Пьер Жильяр. Император Николай II и его семья. — Вена, 1921.
• Максимова Л. Б. Анастасия [ӟуч] // Православная энциклопедия. — 2009. — 26 января.
• Курт П. Анастасия. Загадка великой княжны = Anastasia: The Riddle of Anna Anderson. — М.: Захаров, 2005. — 448 с. — ISBN 5-8159-0472-4.
• Мейлунас А., Мироненко С. Николай и Александра. Любовь и жизнь = A Lifelong Passion, Nicholas and Alexandra: Their Own Story. — М.: Прогресс, 1997. — 714 с. — ISBN 0-75380-044-6.
• Мельник-Боткина Т. Воспоминания о Царской Семье. — Белград, 1921.
• Мэсси Р. Николай и Александра. Биография = Nicholas and Alexandra. — М.: Захаров, 2006. — 636 с. — ISBN 5-8159-0630-1.
• Радзинский Э. С. Николай II: жизнь и смерть. — The Last Tsar — М.: АСТ, 2007. — 510 с. — ISBN 978-5-9713-4632-6.
• Танеева (Вырубова) А. А. Страницы моей жизни. — М.: Благо, 2000. — 320 с.
• Christopher P., Kurth P., Radzinsky E. Tsar The Lost World of Nicholas and Alexandra. — Toronto, Boston: Little, Brown, 1995. — 229 с. — ISBN 0-316-50787-3.
• Dehn L. The Real Tsaritsa. — London: Thornton Butterworth, 1922. — 253 с.
• Eagar M. Six Years at the Russian Court. — London, 1906.
• Gilliard P. Thirteen Years at the Russian Court. — Middletown, DE: s. n., 2017. — 161 с. — ISBN 9781519085924.
• King G., Wilson P. The Fate of the Romanovs. — Hoboken, N. J.: Wiley, 2003. — 657 с. — ISBN 0-471-72797-0.
• Lovell J. B. Anastasia: The Lost Princess. — Regnery Gateway: Regnery Gateway, 1991. — 572 с. — ISBN 0-89526-536-2.
• Occleshaw M. The Romanov Conspiracies: The Romanovs and the House of Windsor. — Orion Publishing Group Ltd., 1993. — 252 с. — ISBN 1-85592-518-4.
• Vorres I. The Last Grand Duchess. — New York: Scribner, 1965. — 264 с.
• Надин Брандес. Романовы. — М.: АСТ, 2021. — 413 с. — ISBN 978-5-271-48604-3.

Чӧлсконъёс

• Е. И. В. великие княжны Мария Николаевна и Анастасия Николаевна [ӟуч]

• Правда о Лжеанастасии [ӟуч]