Наговицын, Александр Никифорович

Александр Никифорович Наговицын
Вордӥськем дырыз	1-тӥ оштолэзе 1909({{padleft:1909|4|0}}-{{padleft:4|2|0}}-{{padleft:1|2|0}})
Вордӥськем интыез	Туктым[d], Глаз утем, Ватка губерния, Росси империя[d]
Кулон дырыз	25-тӥ инвожое 1952({{padleft:1952|4|0}}-{{padleft:6|2|0}}-{{padleft:25|2|0}}) (43 года)
Кунмуртлыкез (подданство)	Росси империя[d]  СССР
Ужудысэз	кылбурчи, гожъяськись, журналист, кылысь кылэ берыктӥсь

Александр Никифорович Наговицын (1-тӥ оштолэзе 1909, Туктым^[d], Ватка губерния — 25-тӥ инвожое 1952) — удмурт кылбурчи, журналист. Гожъяськиз Эрик, Очко Санко но Чипчирган псевдонимъёсын.

Улон сюресэз

Вордӥськиз 1909-тӥ арын 1-тӥ оштолэзе Глаз ёрос Туктым гуртын крестьян семьяын. 1-тӥ лёгетъем школаез йылпумъямез бере, Омутнинской сельсоветын секретарь луыса ужаз. 1924-тӥ арын Глаз ёросын нырысетӥзэ комсомол огазеяськонэз кылдытӥз, егитъёс пӧлын югдытон уж нуиз. Соосты комсомолэ огазеян понна, 1925-тӥ арын «Удмурт егитъёслы» кылбур гожтӥз. Гуртысь ас мылкыдзыя кылдытэм театрын пуктон вылысь, пьесаос гожъялляз. 1927—1928-тӥ аръёсы совето ужасьёсты дасянъя курсъёсын дышетскиз. 1928—1931-тӥ аръёсы Глаз ёросысь «Выль гурт» газетлэн редакцияз, 1933—1937-тӥ аръёсы Ижкарысь «Удмурт коммуна» газетын литсотрудник луыса тыршиз. 1931—1933-тӥ аръёсы военной службазэ Украинаын ортчиз. Арми бере, 1933—1937-тӥ аръёсы «Удмурт коммуна» но «Стахановец-строитель» газетъёсын литсотрудник луыса ужаз. 1937—1941-тӥ аръёсы Одесской киностудиын журналист вал. 1940-тӥ арын Ленинградысь киноинженеръёсты дасянъя институтэз журналистика удысъя заочной амалэн дышетскыса йылпумъяз.

Быдӟым Атыкай ож кутскем бере, 1941-тӥ арын 23-тӥ инвожое действующей армие басьтӥзы. Ростов улосын аслаз дивизиезлэн штабеныз валче тушмон котретэ шедиз, отысь потыны турттыкуз, контузить карыса, пленэ шедиз. Чехословакиын интыяськем концлагерьысь кӧня ке пленнойёсын ӵош Францие пегӟыны быгатӥз. Отын француз Сопротивленилэн радъёсаз ожмаськиз. Вормон нуналэз Парижын пумитаз. Отысь Версале, собере американ командование совето военнопленнойёсты Германиысь Торгау каре келяз. Совето командованилэн решениезъя, отысь Совето Союзэ келямын, Львов улосысь Каменка Бугская ожен куашкатэм карез тупатъян-выльдон ужъёсын тыршиз. Секыт висьыны усемез бере Удмурт шаере берыткыны лэзизы. 1946—1949-тӥ аръёсы Глазкарысь Механикая Чупчи заводын ужаз, собере — Ижкарын «Советской Удмуртия» газетлэн редакцияз тыршиз. 1951-тӥ арын 20-тӥ оштолэзе Родиназэ воштэмез понна пытсэт улэ басьтэмын,1952-тӥ арын 25-тӥ пӧсьтолэзе ыбыса виемын вал. 1990-тӥ арын 10-тӥ куартолэзе СССР-ысь Верховной судлэн Военной коллегиезлэн решениезъя, «янгыш ӧвӧл» шуыса, реабилитировать каремын.

А. Эрик ВУАРП, УдАПП огазеяськонъёслэн но СССР-ысь гожъяськисьёслэн союззылэн ёзчиез вал.

Семьяез

Александр пиез но Нина нылыз вань. 2009-тӥ арын 3-тӥ оштолэзе Глаз ёросысь Трубашур гуртын Александр Наговицынэз буре ваён ӝыт ортчиз, отчы гожъяськисьлэн нылыз, пиез но кылем ӵыжы-выжыез вуылӥз.

Ужъёсыз

Наговицын проза но кылбур гожъяменыз тодмо луэ. Кӧняез ке кылбурез кырӟанлы пӧрмытэмын. «Кужым» романэз но «На чужбине» повестез пытсэтаку быдтэмын вал.

Литературно-творческой ужен 1928-тӥ арысен вырыны кутскиз. Интыысь материал вылэ пыкиськыса, Глаз ёросысь «Выль гурт» газетын кылбурен гожтэм фельетонъёссэ но серемес иронической кылбуръёссэ печатлалляз. «Удмурт коммуна» газетын ужан вакытаз кылбурчи-публицист но лирик сямен юнмаз. Творчествоын ас сюрессэ утчанъяз, Кузебай Гердлэн В. Маяковскийлэн гожъян амалэзъя кылдытэм кылбуръёсыз но поэмаосыз вылын дышетскиз. 1931-тӥ арын нырысетӥ кылбуръёсыныз «Кылбурстрой» бичетэз потӥз. «Ӵукна» нимо кыкетӥ бичетэз 1935-тӥ арын потӥз (тупатъяз со вакытысь тодмо гожъяськись, кылбурчи, прозаик но драматург М. Петров). 1940-тӥ арын нылпиослы веросъёсын «Будон» книгаез потӥз. Кылбуръёсаз автор ас шаерзэ данъя. Озьы ик бадӟы инты висъямын арми темалы, солы сӥзьыса гожтэмын «Ми» поэмаез. 1930-тӥ аръёслэн шораз куд-ог кылбуръёсызлы нырысетӥез профессиональной крезьгурчиг М. Бывальцев крезьгур гожтӥз.

Н. Гогольлэсь, М. Горькийлэсь но А. Пушкинлэсь произведениоссэс удмурт кылэ берыктӥз.

Валэктонъёс

Литература

• Шкляев А. Г. Эрик Александр // Удмуртская Республика: энциклопедия : Электронный каталог. — 2008. — С. 742.
•  // Писатели и литературоведы Удмуртии: биобиблиографический справочник : Электронный каталог. — 2006. — С. 128.
• Поздеев П. К. Выльысь – калык пӧлын.Аннотация: Об удмуртском поэте Александре Эрике // Кенеш. — 1994. — № 4. — С. 52—57.