Яратонлэн но семьялэн нуналыз

Материалъёс басьтэмын Б.Н. Ельцин нимо библиотекаысь

Та гожтосын Б.Н. Ельцин нимо Президент библиотекалэн фондысьтыз материалъёс кутэмын

Рос-прос учке

Семьялэн но яратонлэн нуналыз
Тӧдьысяська — нуналлэн тодметпусэз
Типез	Светской
Официально	2022-тӥ арын 28-тӥ инвожое
Юнматэмын	2008-тӥ арын
Пусъё	Россиын
Дырыз	8-тӥ пӧсьтолэзе
Пусъён ужрадъёс	ортчытъяло сюанъёс, радъяло концертъёс, фестивальёс
Герӟаськемын	Пётрлы но Феврониялы сӥзем нунал
Медиафайлъёс РувикиМедиа пушкын

Яратонлэн но семьялэн нуналыз (ӟуч: День семьи, любви и верности) — росси праздник, пусйиське арлы быдэ 8-тӥ пӧсьтолэзе, герӟаськемын вӧсьлыко князь Пётрез но солэсь кузпалзэ Февронияез буре ваён нуналэн. Пусъён нуналыз официально юнматэмын Президентлэн 2022-тӥ арын 28-тӥ инвожое гожтэм Косэтэныз.

Вӧсьлыкоос сярысь

Историкъёслэн малпамзыя, Пётр Муромский улыкуз Давид Юрьевич нимын тодмо вылэм (князь, 1205—1228-тӥ аръёсы Муромен кивалтэм). Монашеской постриг басьтэмез бере аслыз Пётр ним кутэм, туала источникъёсын со нимын гожъямын.

Пётрлэн но Феврониялэн тусъетъёсыныз шобрет — Фёдор эксэйлэн но солэн Ирина кузпалызлэн Богородице-Рождественской соборлы кузьымзы (1593-тӥ ар)

Дауркылъёсъя, Пётр, княжеской престолэ вуэмезлэсь кӧня ке арлы азьвылгес вӧсьлыко мечен солэн вынызлэн Павеллэн кузпалыз доры ветлылӥсь шайтан Кыез вием. Чоньдыкуз кый Пётрез виреныз пазям, собере ик вуоно князьлэн мугораз гижлочер алям. Уйвӧтаз Пётр адӟем, сое эмъяны быгатоз, пе, Рязань улосысь Ласково гуртысь огшоры мушкасьлэн нылыз Феврония. Феврония йӧнатӥсь вылэм, вуоно князез бурмытэмез понна, сое кышно басьтыны курем. Пётр нылашлэсь куронзэ ӧвӧл быдэстэм, соин Феврония Пётрлэн мугораз одӥг яразэ йӧнатытэк кельтэм. Озьы гижлочер выльысь алям но Пётрлы нош ик Феврониялы вазиськоно луэм. Кыкетӥяз Пётр сое кышно басьтэм.

Пересьмыса, Пётр но Феврония Давид но Ефросиния нимъёсын пӧртэм монастырьёсын постриг басьтӥллям. Дауркылъёсъя, соос, пе, 1228-тӥ арын 8-тӥ пӧсьтолэзе одӥг нуналэ одӥг дыре асьсэлэн кельяосазы кулӥллям. Монастырьлэн куронъёсызъя шӧйёссэс пӧртэм интыосы ватӥллям, озьы ке но, ӵуказеяз соос огазе луиллям. Соин, кузпалъёсты огинэ Муромысь Пресвятой Богородица нимо соборной черке ватӥллям. 1547-тӥ арын Ӟуч православной черк кузпалъёсты вӧсьлыкоос радэ пыртӥз.

Праздник сярысь

Семьялы но яратонлы сӥзем нунал Россиын сяна, мукет кунъёсын но пусйиське — Болгариын, Белоруссиын, Азербайджанын, Украинаын, Германиын, Великобританиын, Франциын. Россиын со праздник Муромын кылдытэмын, отын ик праздниклы сӥзем валтӥсь ужрадъёс ортчыло: вузкарон но ремесленной ярмаркаос устӥсько, нылпиослы анимационной площадкаос ужало но концертъёс ортчыло.

2022-тӥ арын Семьялэсь но яратонлэсь нуналзэ Муромын 15-тӥзэ пусйизы. Эрикрадэз утисьёслэн лыдъямъёссыя, со нуналэ карлэн шораз интыяськем интерактивной площадкаосы 117 сюрс мурт пыриськиз, ярдур урамын ортчем концертэ 75 сюрс пала учкись вуылӥз.

• Муромын ортчись Семьялэн но яратонлэн нуналызлы с9зем ужрадъёс
• 

  Праздниклы чебермам Муром (8-тӥ пӧсьтолэзь)

• 

  Семьялы но яратонлы сӥзем ужрадъёс

• 

  Гала-концерт

Быдэс Россиын 8-тӥ пӧсьтолэзе семья дунлыкез утёнлы но егитъёслэн духовно-нравственной воспитанизылы сӥзем просветительской акциос ортчытъясько.

Праздниклэн кылдэмез

1990-тӥ аръёсы Муромын улӥсьёс Карлэсь нуналзэ но Семьялы сӥзем нуналэз огазеяса, совето сямъёсты берентӥзы.

2006-тӥ арын, кар тӧрлыклэн кичӧлтэмезъя, Муромын улӥсь калык 8-тӥ пӧсьтолэзез Семьялэн нуналыныз лыдъян но Огъяросси праздник инлык сётон понна, 15—20 сюрс пала кинюртон бичаз. Со шундыпуксён палан пусйиськись Яратӥсьёслэн нуналзылы аспӧртэм «ответ» луыны кулэ вал.

2008-тӥ арын 18-тӥ толшоре праздник быдэс Россиын пусйиськись шуыса ялэмын вал. Счётной палаталэн тӧроез, Муромлэн дано муртэз но Спасо-Преображенской монастырьысь попечительской советлэн тӧроез Сергей Степашин, монастырьлэн настоятелез игумен Кирилл (Епифанов) но мукет кун но мер ужчиос праздникез юнматон сярысь ужкагаз гожтӥзы. Кичӧлтонэз улос кивалтӥсьёс, мер ужчиос, Кун Дума, Федераци Совет но Ӟуч православи черк умоен лыдъязы.

Яратонлы но семьялы сӥзем Огъяросси праздник нырысьсэ пусйиськиз 2008-тӥ арын 8-тӥ пӧсьтолэзе. Сое радъязы Социально-культурной кичӧлтонъёсъя фонд, кудӥныз кивалтэ Россилэн куинетӥ президентэзлэн Дмитрий Медведевлэн кузпалыз Светлана Медведева. Со дырысен та нуналэз арлы быдэ пусйылыны кутскизы.

2016-тӥ арын Кун думаысь депутатъёс (ЛДПР партилэсь) Ярослав Нилов но Алексей Диденко, 8-тӥ пӧсьтолэзез шутэтскон нуналэн ялыны курыса, парламентэ катӵектос келязы. Ар ортчыса, думаысь комитет та ӵектосэз умойтэмен лыдъяз.

2022-тӥ арын 28-тӥ инвожое праздникез кун праздник каризы, озьы ке но со ужан нунал ик кылиз.

2024-тӥ арын пӧсьтолэзе Кун Думаысь Семъяез утёнъя комитетлэн тӧроез Нина Останина Семьялы но яратонлы сӥзем нуналэз трос нылпиё семьяос понна ужантэм нунал карыны куронэн Росси Федерациысь Ужъя министерствое вазиськиз.

Праздникез пусъён сямъёс

Тодметпусэз

Яратонлэн но семьялэн нунал пусэныз лыдъяське тӧдьысяська. Та нуналэ тӧдьысяськалэсь тугоко кертто, сяська кеерттэтъёс но «февронькаос» (семьялы сӥзем открыткаос) кузьмало. Валтӥсез сям — та нуналэ ортчись сюанъёс. Со дыре ик черк та сямлы туж пумит луэ, малы ке шуоно. Ӵапак та вакытэ кутске Петров пост, та вакыт семья кылдытыны уг яра.

Тӧдьысяська — нуналлэн тодметпусэз

«Кузьма мыным улон» акция

Арлы быдэ ортче семья дунлыкъёсты но сямъёсты утёнлы сӥзем «Кузьма мыным улон» нимо акция. Соин валче ортчытъяло пӧртэм ӵошатсконъёс, фотоадӟытонъёс, иворлыко материалъёсты вӧлмыто но пӧртэм удысысь ӧнерчиосын котрес ӝӧкъёс ортчытъяло, отчы пыриськыло: эмчиос, юристъёс, психологъёс, журналистъёс но пӧртэм мерлыко но вӧсьлыко огазеяськонъёслэн ёзчиоссы.

«Кузьма мыным улон» акция

Кинофестиваль

2006-тӥ арысен Семьялэн но яратонлэн нуналаз Россиын ортче семьялы но нылпиослы сӥзем фильмъёсын «В кругу семьи» калыккуспо кинофестиваль.

«За любовь и верность» медаль

Озьы ик та нуналэ «За любовь и верность» медален пусъён сям улонэ пыӵатэмын. Со данъетэз кылдытӥз Россиын Семьялэсь но яратонлэсь нуналзэ пусъёнэз радъясь комитет. Медальлэн огпалаз тӧдьысяска тусъетамын, мукет палаз ― Пётрлэн но Феврониялэн ымныр тусъёссы, улӥяз «За любовь и верность семье» гожтэмын.

«За любовь и верность» медаль но удостоверение

Медален пусйисько 25 арлэсь кема ӵош улэм кузпалъёс, кудъёсыз «семьязылэн юнлыкеныз улосчиоссы пӧлын тодмо луизы» но «нылпиоссэс данъямон будэтӥзы». Премилы кандидатъёсты муниципал кивалтӥсьёс ӵекто, нош премиез сётон ужрад улосвыл но федерал ужрадъёсын ортче. Куд-ог улосъёсын 50 арлэсь кема ӵошен улэм кузпалъёслы уксё премия висъяське. Со понна кузпалъёслэн браксы официально пусъемын, нош асьсэос кыксы ик Росси Федерациысь муртъёс луыны кулэ. Москваын 2025-тӥ арын таӵе уксё дун юнматэмын вал:

• 27 972 ₽ 50 ар ӵош улэмъёслы;
• 34 964 ₽ 55-60 ар ӵош улэмъёслы;
• 41 955 ₽ 65-70.

Синпелетъёс

Семьялэсь но яратонлэсь нуналзэ кылдытэм бере, Россиысь тросаз каръёсын Пётрлы но Феврониялы сӥзем синпелетъёс пуктылыны кутскизы. 2016-тӥ арозь 60 пала синпелет пуктэмын вал. Озьы та вӧсьлыко кузпалъёс Россиын тужгес тодмоосыз но яратоноосыз луизы, нош соослы пуктэм синпелетъёс XXI даурысь тужгес вӧлмемъёсыз радэ пыризы.Ӝыныез соос пӧлысь пуктэмын «В кругу семьи» огъяйӧскалык программа улсын, ӝыныез — интыосысь кивалтэтлэн мылкыд каремезъя. Тросэз соос пӧлысь Москваысь Суриков нимо институтын дышетскем скульпторлэн Константин Чернявскийлэн вить композициезъя лэсьтэмын.

Валэктонъёс

Чӧлсконъёс

• Официальный сайт организатора праздника
• О Дне семьи, любви и верности: Указ Президента Российской Федерации от 28 июня 2022 года № 411.