Шутов, Валерий Агафангелович

Валерий Агафангелович Шутов
Валерий Агафангелович Шутов
Вордӥськем нуналыз	27-тӥ южтолэзе 1929
Вордӥськем интыез	Ижкар
Кулон нуналыз	9-тӥ куартолэзе 2013 (84 арес)
Кулэм интыез	Иж, Россия;
Кун	СССР; Россия;
Ужудысэз	Инженер
Данъетъёсыз	Росси Федерациысь дано машиностроитель[d]

Валерий Агафангелович Шутов (1929-тӥ арын 27-тӥ южтолэзе Ижкарын — 2013-тӥ арын 9-тӥ куартолэзе Ижкарын) — совето но росси производствоез радъясь, Ижысь радиозаводлэн^[ru] 1978-тӥ—1992-тӥ аръёсы валтӥсь директорез. Росси Федерациысь дано машиностроитель, Удмурт Элькунлэн Дано кунмуртэз.

Улон сюресэз

В. А. Шутов 1929-тӥ арын 27-тӥ южтолэзе Ижкарын вордӥськиз. Солэн ужан сюресэз 1942-тӥ арын Ижысь машиностроительной заводын кутскиз.

1952-тӥ арын Ленинградысь авиационной приборостроениея институтэз^[ru] йылпумъямез бере Ижысь мотозаводэ^[ru] ужаны ыстэмын, татын технологлэсь, конструкторлэсь, мастерлэсь, ОТК-ен кивалтӥсезлэсь, заводысь профсоюзлэн комитетэзлэн тӧроезлэсь школаоссэс ортчиз.

1962-тӥ арын В. А. Шутовез Ижысь радиозаводэ валтӥсь инженере пуктӥзы, нош 1978-тӥ арысен 1992-тӥ арозь со предприятиез валтӥз.

Валерий Агафангеловичлэн аналитикая йӧспӧртэм быгатонлыкъёсыз вал, производстволэсь стратегизэ нуыны, тужгес секыт ужпумъёсты сэрттыны-пертчыны, коллективез сьӧраз валтыны но производствоез ӟеч радъяны пӧрмытӥз. Со быгатӥз заводэз туала приборостроительной предприятилы пӧрмытыны. Шутов кивалтон вакытэ Ижысь радиозавод инсьӧрез эскеронъя йӧскалык программае пыриськиз. Со сюлмаськемен, завод микроэлектроникаен герӟаськем арбериос поттыны, трос пумо печатной платаос лэсьтыны, СВЧ-электроникая технологиос пыӵатыны ӧдъяз. Озьы ик музъем вылэз эскерон понна выль вузъёс, герӟетъя инсьӧр аппаратъёслы бортовой ретрансляцияя комплексъёс, сигналэз кутӥсь-лэзись бортовой но музъемвыл аппаратура лэсьтыны кутскиз.

Заводэз туала приборостроительной предприятилы пӧрмытыны быгатӥз, трос визез кулэ карись радиоаппартаруаос лэсьтон вискын калыкын кутӥськись арбериос поттыны ӧдъяз.

Микроэлектроникаез производствоын кутыны кутскемез заводлэсь азьлань сюрессэ выль ӧре поттӥз. В. А. Шутов кивалтэм улсын нырысьсэ вылӥ технологиосын лэсьтэм интегральной схемаосты производствое пыӵатӥзы. Озьы ик полиимидной плёнкалэн инъетэз вылын пичиесь арбериос бичаны, поликремний но галлий арсенидлэн инъетэз вылын полупроводниковой микросхемаос лэсьтыны, кремнийлэн инъетэз вылын полупроводниковой электронной гердъёс ӵыжатыны кутскизы. Предприятиын вань поттэм вуз пӧлысь 60 процентэз микроэлектроникая амалэн лэсьтэмын вал. Валерий Агафангелович телеметрической аппаратураез бичанэз но производствое поттонэз радъяз, та аппаратура туала навигационной тӥрлыкын, инсьӧрез эскеронъя но инсьӧр герӟетъя тӥрлыкын, озьы ик медицинаысь тӥрлыкын но мукетъёсаз кутӥське.

В. А. Шутов кивалтон вакытэ завод 70 процентсэ поттоно вузъёссэ выльдӥз, 40 пумо выль вузъёсты поттонэз радъяз но пыӵатӥз.

Валерий Агафангелович Ижысь радиозаводын ракета поттонын но инсьӧр техникаын кутӥськись радиоэлектронной приборостроениез радъяз но производствое пыӵатӥз.

Данъетъёсыз

Октябрь Революци^[ru] нимо орденэн, Ужысь Горд Знамя^[ru] орденэн, «За трудовую доблесть^[ru]» кык медальёсын пусъемын, Инсьӧр федерал агентстволэн^[ru] «Циолковскийлэн гадьпусэныз^[ru]» данъямын, «Удмурт Элькунлэн Дано кунмуртэз» нимын сӥлы каремын

Буре ваён

Ижысь М. Т. Калашников нимо техникая кун университетын дышетскись но со дыре ик Ижысь радиозаводын ужась студентъёслы 2005-тӥ арысен В. А. Шутов нимо стипендия сётӥське.

2013-тӥ арын В. А. Шутовлэн нимыз радиомеханической техникумлы сётэмын.

2015-тӥ арын южтолэзе ИжГТУ-ын радиоэлектроникаез но радиотехникаез, спутник навигациез, радиоэлектронной арбериослы но комплексъёслы модельёс но проектъёс лэсьтыны дышетскон-валан вылысь В. А. Шутов нимо инсьӧр навигацияя лаборатория усьтэмын.

2015-тӥ арын 10-тӥ южтолэзе Ижысь радиозаводлэн азбараз В. А. Шутовлы сӥзем синпелет усьтэмын.

Чӧлсконъёс

90 лет со дня рождения легендарного руководителя Ижевского радиозавода Валерия Агафангеловича Шутова (27.03.1929—09.05.2013 гг.)

Архивная копия от 23 коньывуонэ 2020 на Wayback Machine

В Ижевске- юбилей

Архивная копия от 31 гудырикошконэ 2019 на Wayback Machine