Ульянов, Виталий Андреевич

Виталий Андреевич Ульянов
Виталий Андреевич Ульянов
Вордӥськем дырыз	23-тӥ тулыспалэ 1925
Вордӥськем интыез	Киев, СССР
Кулэм дырыз	14-тӥ коньывуонэ 2011 (86 арес)
Кулэм интыез	Москва, Россия
Кунмуртлыкез	СССР
Кыӵе войскоез	артиллерия
Служить карон аръёсыз	1942—1985
Званиез	Генерал-лейтенант
Частез	280-тӥ гвардейской стрелковой полк
Ожмаськонъёс/ожъёс	Быдӟым Атыкай ож
Данъетъёсыз	;
отставкаын	1985-тӥ арысен

Вита́лий Андре́евич Улья́нов (1925—2011) — Быдӟым Атыкай оже пыриськем мурт, генерал-лейтенант, Совето Союзлэн Героез (1944).

Улон сюресэз

Вордӥськиз Киевын ӟуч семьяын. Йылпумъяз 6 классэз. «Арсенал» заводын нырысь токарь луыса, собере техникаез эскеронъя ёзын ужаз. Заводэн ӵош Быдӟым Атыкай ож кутскем бере Воткинске эвакуировать каремын вал. 1942-тӥ арын заводын Удмуртиысь комсомол нимо 174-тӥ нимаз добровольной артиллерийской танкъёсты быдтӥсь дивизия кылдытэмын вал. Солэн радаз султӥз Виталий Ульянов но.

Кубинка полигонын дышетскемез бере 1943-тӥ арлэн кутсконаз покчи сержант званиен но наводчик луыса фронтэ мынэ. Нырысетӥ ожмаськоназ ик 1943-тӥ арын 19-тӥ толшоре Ворошиловград улосысь Новожков черкогуртын шоро-куспо танкез, коркаослэн укноосысьтызы урдскем ньыль ыбылӥськон точкаосты но 20 пала немец автоматчикъёсты быдтӥз. Ачиз пыдзэ сӧсыртӥз, ож йылпумъяськем бере эвакуировать каремын вал. Та ожмаськемез понна Ульянов пусъемын вал «За отвагу» медален.

Госпитальын йӧнатскемез бере сое запасной полке келязы, но сюрес вылысен со фронтэ мынӥсь поездэ пуксиз. Озьы сюриз 280-тӥ гвардейской стрелковой полкысь противотанковой пушкаослэн взводазы наводчике.

1943-тӥ арын оштолэзьысен частеныз ӵош Короча кар дорын ожмаськиз, отын утиськон сооружениос лэсьтӥськизы но выль немец танкъёсын нюръяськон амалъёслы дышетӥзы. Курск ожмаськон дыръя дивизия обороналэн кыкетӥ эшелоназ пуктэмын вал, но 1943-тӥ арын 7-тӥ пӧсьтолэзе сое тревогаен ӝутӥзы но азьвыл дасям утиськон рубежъёсы лэзизы.

Бӧрысь ожъёсын Ульянов тушмонлэсь 3 шоро-куспо танксэ быдтӥз (ачиз со кыксэ гинэ «аслазэн» лыдъяз). Солэн орудиез пилемын вал, пушказылэн командирез быриз.

Ож тӥрлыктэм артиллерист одӥг нунал ӵоже миномётной взводын служить кариз, собере Совето Союзысь вуоно Геройлэн Лаврентий Беляевлэн кивалтэмез улсын разведчикъёслэн взводазы ёзэтлэн кивалтӥсез луиз. Одӥгаз разведкаысен группа тушмонлэсь документъёссэ но кӧня ке пулемётсэ киултыны быгатӥз.

Одӥг нуналэ, ожмаськон йылпумъяськыкулы, частязы 22 ожгарчи гинэ кылем, одӥг но офицертэк. 18 аресъем младшой сержант Ульянов полкен кивалтонэз ас вылаз басьтӥз. Частьын соку кылемын вал танклы пумит одӥг ружьё, кык пулемёт, гранатаос, но адямилы быдэ одӥг винтовка но автомат. Патронъёс тырмымтэен, Ульянов кескич малпаз: немецъёс атакае ӝутскыку, соос шоры винтовкаосысь ыбылӥзы, нош матэгес вуэмзыя — автоматъёсысь. Озьы совето ожгарчиос малпан кылдытӥзы, позициосын тросгес солдатъёс шуыса. Подкрепление вуытозь, позицизэс кӧня ке нунал ӵоже возьыны быгатӥзы.

Собере частез переформирование ортчытон понна поттӥзы; офицеръёс вуэмен Ульянов сержантлэн должностез полклэн командирез бордысен взводлэн командирез дорозь лэзиськиз. Офицерлы дышетскон сярысь ӵектонъёслэсь Ульянов палэнскиз. Мугзэ тазьы валэктылӥз: сӧсырмем ожгарчиез дораз 6 толэзьлы келяло, собере комиссия ортчыто. Ӝыны ар ӵоже со дораз улэ, уж шедьтыса, бронь басьтыны быгатэ. Нош офицеръёсты бертыны уг лэзё. Ульяновлэн нош, сӧсырмиз ке, дораз вуылэмез потэ, пе, вал.

Курск ожмаськон понна Ульянов Отечественной ожлэн I степенё орденэныз пусъемын вал.

1943-тӥ арын 22-тӥ коньывуонэ Виктор Ульянов секыт сӧсырмиз. Санитарной поездэн сое Златоустысь госпитале вуттӥзы, отын кема эмъяськиз. Ужаз Златоустысь военкоматын.

Ож бере Ульянов армиын службазэ азьланьтӥз. 1945-тӥ арын йылпумъяз Киевысь самоходной артиллерияя училищеез, 1959-тӥ арын — Бронетанковой кужымъёсъя ожгар академиез, нош 1968-тӥ арын — Генеральной штаблэсь ожгар академизэ. Орджоникидзеысь вылӥ командной училищелэн кивалтӥсез вал. 1985-тӥ арын генерал-лейтенант В. А. Ульянов отставкае потӥз.

Москваын улӥз. «Мегапир» фондлэн правлениезлэн тӧроез вал. «Я дрался с Панцерваффе» книгаысь огезлэн люкетэзлэн авторез луэ.

Кулӥз Москваын 2011-тӥ арын 14-тӥ коньывуонэ^[1].

Подвигез

1943-тӥ арын 29-тӥ куарусёнэ Виталий Ульянов, батареяысь артиллеристъёс пӧлысь нырысетӥез, Украинаысь Кировград улосысь Дериевка черкогурт дортӥ Днепр вамен потӥз. Пушкаезлэн тылэныз тушмонлэсь кӧня ке ыбылӥськон интыоссэ быдтӥз, батальонэзлы шур вамен потыны луонлык сётыса. Та дыр ӵоже со взводэн но кивалтӥз, пушкаеныз но. Бӧрысь ожын Ульянов тушмонлэсь StuG III самоходной установказэ мертчиз, но немецъёс сое асьсэ позициосазы нуыны быгатӥзы. Озьы ке но ужпум быдэстэмын вал, тушмон азьлань ортчыны ӧз быгаты.

Куковка черкогурт понна ожмаськонын, тушмонлэсь контратакаоссэ палэнтыку, Ульянов огдыре кык пушкалы командире кылиз, кыкысьтыз но черодэн ыбылӥськиз. Та ожын со тушмонлэсь кык танксэ но 7 БТР-зэ быдтӥз. Эшшо одӥг пушказэ зырӟиз но уно тушмон ожгарчиосты быдтӥз.

Данъетъёсыз

Совето Союзысь Герой (22.02.1944, 3625 номеро медаль);
Ленин орден (22.02.1944);
Горд Знамя орден;
Отечественной ожлэн I степенё кык орденэз (1943, 1985);
«За службу Родине в Вооружённых Силах СССР» III степенё орденэз;
Калыкъёс эшъяськон орден (11.04.1994)^[2];
«За отвагу» медаль (1943);
мукет медальёс.

Буре ваён

«Мегапир» фонд Совето Союзысь Геройлэсь, В. А. Ульянов генерал-лейтенантлэсь нимзэ нуллэ.
Воткинск кар думалэн 2007-тӥ арын 27-тӥ инвожое потэм 250 номеро решениезъя Воткинск городын улӥсьёсыз ожгар но патриотизм удысын визьноданын бадӟым уж нуэмез понна Виктор Ульянов Воткалэн дано муртэз луиз^[3].

Валэктонъёс

↑ В. А. Ульянов Архивная копия от 30 толшоре 2019 на Wayback Machine.
↑ Указ Президента Российской Федерации от 11 апреля 1994 года № 684 «О награждении орденом Дружбы народов активистов движения "Ветераны войн - за мир"»
↑ Ульянов Виталий Андреевич Администрация муниципального образования «Город Воткинск». Эскеремын 2010-03-23 арын

Литература

С. И. Большаков, А. С. Большаков. История Отечества. Великое наследие. Орджоникидзевское высшее общевойсковое командное училище. — М.: ПМ «Сафьян», 2018. — С. 258. — 542 с.
Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
Драбкин А. Я дрался с Панцерваффе. «Двойной оклад — тройная смерть!». — М.: Яуза, Эксмо, 2007. — (Война и мы). — 10 000 экз. — ISBN 978-5-699-20524-0.
Геннадий Миранович. Недолгая война сержанта Ульянова // Красная Звезда : газета. — 2003-09-25.

[1] В. А. Ульянов Архивная копия от 30 толшоре 2019 на Wayback Machine.

[2] Указ Президента Российской Федерации от 11 апреля 1994 года № 684 «О награждении орденом Дружбы народов активистов движения "Ветераны войн - за мир"»

[3] Ульянов Виталий Андреевич Администрация муниципального образования «Город Воткинск». Эскеремын 2010-03-23 арын

[1]

[2]

[3]