Шмаков, Тимофей Иванович

Тимофей Шмаков
Вордскыкуз сётэм нимыз	Тимофей Иванович Шмаков
Кушемнимыз	Шмаки Тими
Вордӥськем дырыз	5-тӥ южтолэзе 1910({{padleft:1910|4|0}}-{{padleft:3|2|0}}-{{padleft:5|2|0}})
Вордӥськем интыез	Монья, Алабго утем, Ватка губерния, Росси империя[d]
Кулон дырыз	10-тӥ инвожое 1961({{padleft:1961|4|0}}-{{padleft:6|2|0}}-{{padleft:10|2|0}}) (51 год)
Кулэмын	Иж, РСФСР, СССР
Кунмуртлыкез	СССР СССР
Ужудысэз	кылбурчи, кылысь кылэ берыктӥсь
Гожъяськон кылыз	удмурт

Тимофей Иванович Шмаков, литературая кушемнимыз — Шмаки Тими (5-тӥ южтолэзе 1910, Монья, Алабго утем, Ватка губерния, Росси империя^[d] — 10-тӥ инвожое 1961, Иж) — удмурт кылбурчи, кылысь кылэ берыктӥсь. СССР-ысь гожъяськисьёслэн огазеяськонзылэн ёзчиез (1950). Быдӟым Атыкай оже пыриськем мурт.

Улон сюресэз

Тимофей Шмаков вордӥськиз Ватка губерниысь Алабго уездысь (али — Вавож ёрос) Мӧнья гуртысь куанеръёслэн семьяязы. Пичи дырыз Мӧнья вӧзысь Кортчинвай починкаын ортчиз, со сярысь отӥяз кылбуръёсаз гожъялляз. Грамоталы ликбез программая Водӟимӧнья черкогуртын дышетскиз.

1930-тӥ арын Тимофей Шмаков Можгаысь педагогикая техникумез йылпумъяз, отӥяз Вавож ёросысь Выль Бия гуртысь покчиослы школаен кивалтӥз. Уно аръёс ӵоже тыршиз «Удмурт коммуна», «Дась лу!», «Удмуртская правда», «Советской Удмуртия» элькун газетъёслэн редакциосазы, Удмурт книгапоттонниын но Удмурт радиоын. 1955-тӥ арысен литература борды профессионально амалъя рос-прос басьтӥськиз. 1961-тӥ арын 10-тӥ инвожое Ижкарын секыт но кема висемез бере улонысь кошкиз.

Творчествоез

Тимофей Шмаковлэн нырысетӥ публикациосыз Шмаки Тими кушемнимын потӥзы 1928-тӥ арын «Кенеш» журналын. Ож пуромемлэсь азьвыл ӟуч но кунгожсьӧр классикъёслэсь произведениоссэс удмурт кылэ берыкъяз, озьы ик нылпиослы кылбуръёс но веросъёс гожъялляз. Анай кылэ берыктэм огез тодмоез ужез луэ Тарас Шевченколэн «Завещание» кылбурез.

Творчество ласянь ӝутскыны кутскон вакытаз Шмаковез литературая вожвылъяськонэ кыскизы — Удмурт революционной гожъяськисьёслэн ассоциацизылэн кивалтэтэзлэн (ВУАРП) но ВКП(б)-лэн Вотской обкомезлэн политикаенызы соглаш луымтэ удмурт писательёслэн вазиськонзы улэ кинюртэмзэ пуктӥз, со «Платформа шести» нимо декларация сямен тодмо. «Крестьян группаысь» огкадь малпаськись вить кузя юлтошъёсыныз ӵош Союзысь крестьян гожъяськисьёслэн обществоязы (ВОКП) пырыны куриськон гожтӥзы, эшъёсыныз лыдъяллязы, ВУАРП стильлы, веран формалы но сюжетлы ӧжыт саклык висъя, тросгес косэ идеологиез санэ басьтыны шуыса, таин валче ВУАРП-ысь потӥзы.

Шмаковлэн кылбураны быгатонлыкезлэн сяськаян дырыз тупаз Быдӟым Атыкай ож вакытлы. Патриот мылкыдын пыӵам кылбуръёсыз «Советской Удмуртия» газетын печатласькылӥзы, ожгар аръёсысь коллективен гожтэм бичетъёсы пырылӥзы, совето армилэн бадӟым вормонъёсыз дыръя элькунын радио пыр но митингъёсын чузъяськизы. Со вакытысь «Малы уӵыос…» (ӟуч: Почему соловьи…) кылбурез «Сулико» нимо тодмо грузин кырӟанъя гожтэмын вал.

Кылбурчилэн ож вакытысь устоосыз кылбуръёсыз 1945-тӥ арын «Мынам пыӵалэ» (ӟуч: Моя винтовка) бичетэн потӥзы; отын автор фронтысь вынлык но аслаз «эшъёсыз» — му гырк, шинель, кружка но винтовка — сярысь вералляз. Ож ортчем бере кылдытэм кылбуръёссэ, поэмаоссэ но кырӟанъёссэ Шмаков нылпиослы сӥзиз. Бадӟымъёслы гожтэм произведениосыз пӧлысь вылӥ дунъет басьтӥз «Быдӟым ӟуч калыклы» (ӟуч: Великому русскому народу) кылбурез, отын ӟуч но удмурт калыклэн тупаса улонзы возьматэмын.

Быръем изданиосыз

• Шмаков Т. И. Мынам пыӵалэ: Кылбуръёс. — Ижевск: Удмуртгосиздат, 1945. — 64 с.
• Шмаков Т. И. Покчи вынъёслы: Кылбуръёс. — Ижевск: Удмуртгосиздат, 1947. — 40 с.
• Шмаков Т. И. Ӵукна: Пиналъёслы кылбуръёс. — Ижевск: Удмуртгосиздат, 1951. — 64 с.
• Шмаков Т. И. Нюлэскын: Поэма. — Ижевск: Удмуртгосиздат, 1952. — 28 с.
• Шмаков Т. И. Зарни киос: СССР-ысь калыкъёслэн выжыкылъёссы. — Ижевск: Удмуртской книжной издательство, 1954. — 60 с.
• Шмаков Т. И. Кортчинвай: Пиналъёслы кылбуръёс. — Ижевск: Удмуртгосиздат, 1957. — 48 с.
• Шмаков Т. И. Чипчирган куара: Быръем кылбуръёс. — Ижевск: Удмуртия, 1965. — 72 с.

Буре ваён

• 2020-тӥ арын 20-тӥ шуркынмонэ Вавож ёросысь Мӧнья гуртын Тимофей Шмаков удмурт кылбурчилы сӥзем мемориал пул усьтӥзы.

Валэктонъёс

Литература

• Шмаков Тимофей Иванович // Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — С. 733. — 768 с. — 2200 экз. — ISBN 978-5-7659-0486-2.
• Тимофей Шмаков / Составитель А. Н. Уваров // Писатели Удмуртии: Библиографический справочник. — Ижевск : Удмуртия, 1989. — С. 437—439. — 464 с. — 5000 экз. — ISBN 5-7659-0131-X.
• История удмуртской советской литературы: В 2-х т / Кол. авторов; ИМЛИ им. А. М. Горького АН СССР, НИИ при СМ УАССР. — Устинов: Удмуртия, 1987. — Т. 1. — С. 63. — 252 с.