Терроризмен нюръяськонъя огкылысь луон нунал
| Терроризмен нюръяськонъя огкылысь луон нунал | |
|---|---|
 «Куректон писпу» Бесланын 2008-тӥ арын пуктэм скульптура | |
| Юнматэмын | Россиысь терактъёсын быремъёсты буре вайыса, озьы ик Бесланын быремъёсты. |
| Кылдытӥсез | Россилэн Азьмуртэз; юнматэмын федерал катэн 2005-тӥ арын[1][2] |
| Дырыз | 3-тӥ куарусёнэ |
Терроризмен нюръяськонъя огкылысь луон нунал (ӟуч: День солидарности в борьбе с терроризмом) — Россиысь буре ваён нуналъёс пӧлысь одӥгез. Пусйиське арлы быдэ 3-тӥ куарусёнэ. Сӥземын терактъёсын быремъёсты буре ваёнлы но террорен герӟаськем кышкытлык азьын мерлыклэн но кунлэн огъя луэмезлы[1].
Буре ваён нунал меӵак герӟаськемын 2004-тӥ арын куарусёнэ Бесланын луэм терактэн. 2005-тӥ арын федерал катэн юнматэмын[1][2]. Та нунал быдэсак мемориальной луэ но азьланяз та выллем сьӧсь ужъёслы пумит нюръяськонын огъя луон сярысь тодэ вайытэ.
Историез
Огъя луон нунал юнме 3-тӥ куарусёнэ быръемын ӧй вал. Ӵапак та нуналэ 2004-тӥ арын Бесланын терактэн герӟаськем шугадӟон йылпумъяськиз. Россилэн выль историяз со тужгес кышкытэз но лекез лыдъяське[1][3]. 2004-тӥ арын 1-тӥ куарусёнэ, Тодон-валан басьтон нуналэ, пыӵалтӥрлыкен быдэсмем террористъёс, торжественной линейка мыныку, Бесланысь (Уйпал Осетия) 1-тӥ номеро школаез киултӥзы. 1128 мурт заложнике басьтэмын вал[4] — дышетскисьёс, соослэн анай-атайёссы но дышетӥсьёс. Боевикъёс соосты куинь нунал ӵоже минировать карем юртын сиёнтэк но юонтэк возизы[5]. 3-тӥ куарусёнэ асьме силовикъёс школаез штурмен басьтӥзы, школа юртлэн оглюкетэз куашкатэмын вал. Беслан терактын 334 мурт бырыны шедиз, 186-ез соос пӧлысь — нылпиос[4], 500-лэсь ятырез сӧсырмемын[5][6]. Теракт аслаз жалясьтэм но сьӧсь луэменыз быдэс кунэз вырӟытӥз — со шугадӟонын нылпиос но кышномуртъёс бырыны шедизы[1][4][5][6]. Со урдӥськон понна кылкутӥз чечен полевой командир Шамиль Басаев[5]. Беслан трагедия выль буре ваён нуналэз кылдытонлы инъет луиз.
Юнматон
Теракт бере ар но ӧз ортчы, солы сӥзьыса, буре ваён нунал юнматэмын вал. «„Россилэн ожгар данлыко (вормон нуналъёсыз) нуналъёсыз“ сярысь Федерал катэ воштэтъёс пыртон сярысь» 2005-тӥ арын 21-тӥ пӧсьтолэзе Росси Федерациысь памятной датаосын календаре вылез нунал ватсаськиз — 3-тӥ куарусён, Терроризмен нюръяськонъя огкылысь луон нунал[1][2]. Озьы, 2005-тӥ арысен кутскыса, арлы быдэ 3-тӥ куарусёнэ быдэс кунын терактъёсын быремъёсты буре вайылон ужрадъёс ортчыло. Россилэн выль историяз та нунал тужгес егитэз лыдъяське[5]. 2005-тӥ арын 3-тӥ куарусёнэ, беслан терактлэн ар нуналаз, быдэс Россиын буре ваён акциос ортчизы: кун тӧрлык ёзэтъёс, мерлыко но вӧсьбуро огазеяськонъёс панихидаос но сюсьтылъёсын кар урамъёс кузя траурной шествиос ортчытӥзы[5]. Со дырысен со йылол арлы быдэ ортчытӥськись сямлы пӧрмиз[5].
Валатонэз но тодметэз
Терроризмен нюръяськонъя огкылысь луон нунал мемориальной луэ. Та нуналэ быдэс кунын траур ужрадъёс ортчыло, куректон но ӝож кылъёс чузъясько. «Солидарность» кыл кышкытлыклы пумит мерлыклэсь но кунлэсь огъя луонзэ возьматэ[5]. Буре ваён нунал терроризмен нюръяськонын кунэз но мерлыкез огазеясь тодмет луэ[5]. Кун ёзрадъёс, ожтӥрлыко кужымъёс, мерлыко огазеяськонъёс но огшоры калык та нуналэ, огазе кариськыса, кышкытлыклы но террроризм идеологилы пумит луэмзэс возьмато.
Та нуналлэн одӥгез тужгес валтӥсез ужпумез — быремъёсты буре ваён, огшоры калыкез но ас ужзэс быдэстыку бырыны шедем катрадлыкез утён ёзэтъёсын ужасьёсты. 3-тӥ куарусёнэ бырем геройёслэн нимъёссы буре ваён кылъёсын но печатлам материалъёсын чузъясько, соослы сяськаос поныло[7]. Огъя луон нуналэ юнме бырыны шедемъёсты но терроризмен нюръяськон понна ас улонзэс сётэм муртъёсты буре вайыло.
Мемориальной функциез сяна, та нуналлэн воспитательно-просветительской кужмыз юн луэ. Траур ужрадъёс мерлыклы кышкытлык азьын огъя но сак луон сярысь тодэ вайыто. Йӧскалыкъёс но религиос куспын тупаса улон, ог-огдэ гажан но валаны тыршрон сярысь кылъёс чузъясько. Огъя луон нунал аспӧртэмлыко тодэ вайытон луэ: калык огъя мылкыдын но огазе кариськыса улэ ке, мерлыкез кышкатон учыръёс лябӟо, озьы терроризмез вормыны луэ.
Терроризмен нюръяськон — со одӥг йӧскалыклэн гинэ ужпумез ӧвӧл, со быдэс дунне азьын сылӥсь ужпум. Россия калыккуспо антитеррористической ужъёсы ас ваёссэ пыртэ, со дыре ик ас бырем калыксэ буре вайылэ. 2018-тӥ арын ООН Терактъёсын быремъёсты буре ваён калыккуспо нунал юнматӥз (21-тӥ гудырикошконэ)[8]. Озьы ке но, Россиын юнматэм 3-тӥ куарусёнэ Огъя луон нунал соизлэсь висъяське, нырысь ик, меӵак асьме трагедиен герӟаськеменыз но террорирзмен нюръяськонын йӧскалык опытэз вылэ пыкиськеменыз. Со аспӧртэмлыко куректонэз пусъе, кудзэ чидано луиз асьме калык, но быдэс дунне азьын террор кышкытлыклы пумит огъя луыны быгатэмез возьматэ.
Ужрадъёс но сям-йылолъёс
Арлы быдэ 3-тӥ куарусёнэ быдэс кунын терроризмен нюръяськонэн герӟаськем пӧртэм ужрадъёс ортчыло. Со акциос траурно-мемориальной но со дыре ик калыкез огазеясь луо. Ужрадъёсты дасян но радъян бордын тыршо тӧрлык ёзэтъёс, дышетон ужъюртъёс, мерлыко но вӧсьбуро организациос, ветеран огазеяськонъёс, егит калык движениос. Ужрадъёслэн форматсы пӧртэм луэ ке но, соосты ваньзэс огазея одӥг ужпум — быремъёсты буре ваён но кужмысь каронлы но кышкытлыклы пумит мерлыкез огазеян мылкыд. Улынгес верамын тужгес ӵем ортчылӥсь ужрадъёс сярысь:
- Сяськаос понон но траур митингъёс. Быдэс Россиын калык та нуналэ терактъёсын быремъёслы сӥзем мемориалъёс но буре ваён пусъёс азе сяськаос, венокъёс, небыт шудонъёс вае, сюсьтылъёс ӝуатэ[6][7]. Ортчыло траур митингъёс но буре ваён шествиос — ӵемысь сюсьтылъёсын но быремъёслэн туспуктэмъёсынызы. Теракт луэм каръёсын (Беслан, Москва, Волгоград, Санкт-Петербург, Будённовск, Волгодонск, Владикавказ, Буйнакск но мукет) арлы быдэ трос калыко куректон акциос ортчыло[6]. Котьку сямен ялӥське шып улон минут — ӵемысьгес нуназе котырын яке меӵак луэм учырлэн дырызъя тупатӥське. Кылсярысь, Бесланын но Москваын 3-тӥ куарусёнэ 13:05 минутэ гырлые жуго, соку вань калык шып кариське — ӵапак со дыре 2004-тӥ арын боевикъёсын киултэм школаын нырысетӥ пуштон чузъяськиз[7]. Быдэс Россиын огъя шып минутэ тросаз каръёсын инме тӧдьы дыдыкъёсты яке воздушной шаръёс лэзьяло[5][7].
- Панихидаос но вӧсьбыро службаос. Пӧртэм конфессиос ас черкъёсазы 3-тӥ куарусёнэ терактын быремъёсты буре ваён богослужениос ортчытъяло. Ӟуч Православи Черк арлы быдэ траур литиос но молебенъёс ортчытэ, озьы ик шимес учыр луэм интыосын вӧсяське. Кылсярысь, Владикавказын но Бесланын мемориалъёс доры крестной ход радъяське, священнослужительёс синпелетъёсты вӧсяло но быремъёслы вӧськылъёс лыдӟо. Москваын Бесланын быремъёслы сӥзем панихида Рождество Богородицы храм азьын ортче, со бордын ик «Бесланысь нылпиослы» синпелет пуктэмын[7][9]. Траур богослужениосы пӧртэм религиос пырисько — бырем мусульманъёсты, христианъёсты, иудейёсты но мукетъёссэ буре вайыса, соин валче пусйиське, терроризм уг висъя, кыӵе калык яке оскон пӧлы пыремез.
- Буре ваён урокъёс но просветительской занятиос. Та нуналэ кунысь вань улосъёсын бадӟым саклык висъяське егитъёсын ужанллы. Тросаз школаосын, колледжъёсын но вузъёсын 3-тӥ куарусёнэ терроризмен нюръяськонэн герӟаськем тематической урокъёс, классной часъёс, лекцииос но вераськонъёс ортчыло[6][10]. Сыӵе занятиосын нылпиослы Бесланын но мукет интыосын луэм шуэрес учыръёс сярысь мадё, кышкыттэмлык, тупаса улон но шугадӟонъёсын астэ возыны быгатон сярысь кенешо. Ӵемысь сыӵе пумиськонъёсы МЧС но катрадлыкез утись ёзэтъёсын ужасьёсты, спецподразделениосысь ветеранъёсты, психологъёсты ӧтьыло — соос асьсэ опытсы сярысь верало но ог-огедлы юрттон но сак луон сярысь тодэ вайыто.
- Тематической адӟытонъёс но экспозициос. 3-тӥ куарусёнэ музейёс, библиотекаос, культура юртъёс быремъёсты буре вайыса но терроризмен нюръяськонлы сӥзем нимысьтыз экспозициос дасяло[6]. Сыӵе адӟытонъёсын шимес учыръёсын герӟаськем фотографиос но документъёс возьматэмын луо — кылсярысь, теракт луэм интыосысь кадръёс, быремъёслэн ас арбериоссы, Бесланысь нылпиослэн ӵош дышетскем эшъёссылы сӥзем произведениоссы но мукет. Пӧртэм каръёсын урдӥськонъёслы сӥзем книгаос, статьяос но видематериалъёс. Куд-ог каръёсын терактъёсын быремъёслы сӥзем музейёс усьтэмын — кылсярысь, «Альфа» но «Вымпел» спецназлэн заложникъёсты утёнъя подвигзылы сӥзем экспозициос. Буре ваён нуналъёсы та музейёс вань мылкыд карисьёсты куто, школаын дышетскисьёс но студентъёс понна экскурсиос радъяло. Та выллем ужрадъёслэн ужпумзы — луэм учыръёс сярысь тодын возёнъёсты, выльысь луонтэм вылысь, калык пӧлын вӧлмытон.
- Общественно-патриотической акциос но концертъёс. Огъя луон нуналэ ӵемысь террорлы пумит луон лозунгъёс улсын патриотической митингъёс, котрес ӝӧкъёс, флешмобъёс но акциос ортчыло. Куд-ог каръёсын благотворительной концертъёс но буре ваён ӝытъёёс радъясько, отын тупаса улонлы но кышкытлык азьын огъя кариськонлы сӥзем кырӟанъёс но кылбуръёс чузъясько[11]. Творческой коллективъёс — нылпи ансамбльёсысен кутскыса тодмо артистъёс дорозь — быремъёсты буре вайыса но соослэн ӵыжы-выжыоссылы юрттэт карыса, пӧртэм композициосты быдэсто. Со ужрадъёсын люкам уксёез ӵемысь терактъёсын шугадӟонъёсы сюремъёслы юрттэт сётонъя фондъёсы яке синпелет пуктонлы сётӥське. Кылсярысь, Уйпал Осетиын арлы быдэ 3-тӥ куарусёнэ (яке со нуналлы матын луись дыре) «Беслан. Помним» нимо концерт-реквием ортчылэ, Москваын — культура удысын ужасьёс буре ваён акциос радъялляло[12][13].
- «Спорт террорлы пумит» девиз улсын ортчись спорт ужрадъёс . Тросаз улосъёсын 3-тӥ куарусёнэ ӵошатсконъёс но турниръёс радъясько. Соос егит калыклы спорт, таза но огъя луон эксремизмлы пумит кариськыны юртто шуыса возьмато. Кылсярысь, тупаса улонлы сӥзем капчи атлетикая бызьылонъёс, футболъя но баскетболъя буре ваён матчъёс, терроризмен нюръяськонлы сӥзем эстафетаос но военно-спортивной шудонъёс[14]. Озьы ик школаосын но спорт клубъёсын «Спорт террорлы пумит» нимо турниръёс, эстафетаос, командной спортъя ӵошатсконъёс радъясько[15]. Со выллем акциос интыосысь спортъя но молодёжной поролитикая комитетъёслэн юрттэмзыя ортчытӥсько, ӵемысь антитеррористической комиссиос улсын. Сыӵе ужрадъёс будӥсь поколениез дунне дунлыкъёсты валаны но кышкытлык азьын огазе кариськыны дышето.
Та верам амалъёс сяна, арлы быдэ выль кичӧлтӧнъёс кылдыло. Кылсярысь, куд-ог каръёсын, быремъёслэн семьяоссылы юрттон вылысь, волонтёрской движениос усьтӥсько, тодэ ваёнъёс вылэ пыкиськыса документальной фильмъёс кылдытӥсько, террорен нюръяськонлы сӥзем нылпи суредъёсын но сочинениосын ӵошатсконъёс радъясько. Туала улонлы матэ кариськыса но интернет азинскемен валче, куд-ог ужрадъёс онлайн-форматэ выжо — мерлыко вотэсъёсын буре ваён флешмобъёс, виртуальной адӟытонъёсын онлайн-трансляциос но мукет. Кылсярысь, 2020-тӥ арын, коронавирус пандемиен сэрен, тросэз акциос онлайн режимен ортчытэмын вал[1].
Огъя луон
Терроризмен нюръяськонъя Огъя луон нунал мукет буре ваён нуналъёслэсь зэмзэ но калыко луэменыз висъяське. Та нунал шутэтскон нунал уг луы, оӧвӧл солэн кун инлыкен сӥё-дано ужрадъёсыз но парадъёсыз. Озьы ке но, арлы быдэ 3-тӥ куарусёнэ миллион пала россиянъёс ас кожазы яке огазе люкаськыса буре ваён акциосы пырисько. Ваньмыз ӵош: кивалтӥсьёс, огшоры адямиос, арлыдоос но пиналъёс, пӧртэм йӧскалыкъёс но пӧртэм вӧсьбуръёсысь огмуртъёс.
Берло вакытэ Россиын терроризмен герӟаськем югдур кӧня ке воштӥськиз. Кышкыттэмлыклэсь котыр ласянь утиськыса, спецслужбаослэн ӟеч тыршеменызы но калыклэн сак луэменыз, терроризм кунамы шӧдскымон лябомиз[1]. Озьы ке но, кышкытлык быдэсак ӧз быры. Со сярысь тодэ вайыто 2010—2020-тӥ аръёсы луэм учыръё (2010-тӥ арын Москва метроын пушкытон, 2011-тӥ арын Домодедово аэропортын теракт, 2013-тӥ арын Волгоградын терактъёс, 2017-тӥ арын Петербургысь метроын теракт, 2024-тӥ арын Крокус Сити Холлын теракт но мукет). Соин ик 3-тӥ куарусёнэ юнматэм нунал кулэлыксэ уг ышты: со сак луыны вунэтоно ӧвӧл но терроризмен нюръяськон — со ваньмы азьын сылӥсь ужпум шуыса тодэ вайытэ. Антитерроризмъя Йӧскалык комитетлэн тӧроезлэн нырысетӥ воштӥсез Игорь Кулягин пусйылӥз вал, 2019-тӥ ар куспын гинэ спецслужбаос терроризмен герӟаськем ог дасо йыружъёсты дасян вакытаз ик уретыны быгатӥзы[1].
Арлы быдэ СМИ-осын но официальной вазиськонъёсын 3-тӥ куарусёнэ террористъёслы пумит султэм но шугадӟонъёсы сюрем муртъёслы юрттэт сётон кылъёс чузъясько. Кунлэн вылӥ кивалтӥсьёсыз, озьы ик улосъёсысь кивалтӥсьёс кышкыт учыръёсты тодын возьыса, огазе кариськыны дэмласа, калыклы вазиськыло. Кылсярысь, Россилэн азьмуртэз арлы быдэ быремъёслэн семьяоссылы вазиське, спецназлэн сэзь но ас улонзэс жалятэк заложникъёсты утемзы сярысь тодэ вайытэ[7]. Со вераськонъёс зэмзэ улонэ пыӵатӥсько: ӝутӥсько выль мемориалъёс, буре ваён музейёс (Бесланысь 1-тӥ номеро школа юртын кылдытэм музей выллем[16][7]), шугадӟонэ сюремъёслы сӥзем программаос быдэстӥсько.
Та нуналэ, 3-тӥ куарусёнэ, быдэс Россия террорист киослэсь бырем улосчиоссэ буре вайылэ — Бесланын, Дубровкаын, Будённовскын, Пермомайскойын, Москваын пушкытъям юртъёсын, Буйнакскын, Волгодонскын но ог сю пала мукет интыосын[1]. Огвакытэ ик кунмы дӥсьтӥсь луэмзэ возьматэ: Терроризмен нюръяськонъя огкылысь луон нунал йӧскалык тодэ ваёнлэн валтӥсь люкетэз луиз, со арысь аре тодэ вайытэ, огъя но огазе кариськыса улон — террорлы пумит нюръяськонын валтӥсез ожтӥрлык[5] луэ шуыса.
Валэктонъёс
- ↑ 1 2 3 4 5 6 7 8 9 10 День солидарности в борьбе с терроризмом, РИА Новости (20200903T0331). Эскеремын: 2 куарусёнэ 2025 арын.
- ↑ 1 2 3 Федеральный закон от 21.07.2005 г. № 98-ФЗ, Президент России. Эскеремын: 2 куарусёнэ 2025 арын.
- ↑ Лица Беслана, Коммерсантъ (3 куарусёнэ 2016). Эскеремын: 2 куарусёнэ 2025 арын.
- ↑ 1 2 3 Мать погибшей в теракте в Беслане Аланы: «Эта катастрофа разрушила мою жизнь», Новости ООН (31 гудырикошконэ 2023). Эскеремын: 2 куарусёнэ 2025 арын.
- ↑ 1 2 3 4 5 6 7 8 9 10 11 12 3 сентября — День солидарности по борьбе с терроризмом. - Ставропольский Дворец культуры и спорта, Ставропольский Дворец культуры и спорта (14 пӧсьтолэзе 2015). Эскеремын: 2 куарусёнэ 2025 арын.
- ↑ 1 2 3 4 5 6 День солидарности в борьбе с терроризмом 2025: какого числа отмечается памятная дата, Комсомольская правда. Эскеремын: 2 куарусёнэ 2025 арын.
- ↑ 1 2 3 4 5 6 7 8 В Москве почтили память жертв террористического акта в Беслане - 15-1 Регион, 15-й Регион — Информационный портал РСО — Алания (3 куарусёнэ 2021). Эскеремын: 2 куарусёнэ 2025 арын.
- ↑ В мире отмечают Международный день памяти и уважения жертв терроризма, Новости ООН (21 гудырикошконэ 2024). Эскеремын: 2 куарусёнэ 2025 арын.
- ↑ Москва почтет память жертв терактов 3 сентября, Сайт Москвы (31 гудырикошконэ 2020). Эскеремын: 2 куарусёнэ 2025 арын.
- ↑ 3 сентября «День памяти. День скорби. День солидарности в борьбе с терроризмом», shelter-tranzit.ru. Эскеремын: 2 куарусёнэ 2025 арын.
- ↑ Джусоева, Алина. 3 сентября во дворе первой школы Беслана пройдёт концерт симфонического оркестра - Iryston Tv, Iryston Tv (29 гудырикошконэ 2024). Эскеремын: 2 куарусёнэ 2025 арын.
- ↑ Благотворительный концерт в память о жертвах Беслана пройдет в Москве, Социальный навигатор РИА Новости (20140902T1105). Эскеремын: 2 куарусёнэ 2025 арын.
- ↑ Во Владикавказе прошел концерт в память о жертвах теракта в Беслане, Известия (3 куарусёнэ 2024). Эскеремын: 2 куарусёнэ 2025 арын.
- ↑ Увельчане провели мероприятия в День солидарности в борьбе с терроризмом, Правительство Челябинской области (03.09.2021). Эскеремын: 2 куарусёнэ 2025 арын.
- ↑ Спорт- против террора!, Национальные проекты России. Эскеремын: 2 куарусёнэ 2025 арын.
- ↑ В Беслане продолжается строительство музейного комплекса — 15-й Регион, 15-й Регион — Информационный портал РСО — Алания (30 южтолэзе 2022). Эскеремын: 2 куарусёнэ 2025 арын.