Антонов, Сергей Анатольевич
| Сергей Антонов | |
|---|---|
 | |
| Вордӥськем нуналыз | 29-тӥ куартолэзе 1981 (44 арес) |
| Вордӥськем интыез |
 Удмуртия Можга ёрос, Мельниково гуртын |
| Кунмуртлыкез |
 Россия |
| Ужудысэз | драматург, артист-кукловод |
Сергей Анатольевич Антонов (ворд. 1981-тӥ арын 29-тӥ куартолэзе Можга ёросысь Мельниково гуртын) — удмурт гожъяськись, драматург, артист-кукловод, «Балда» мини-театрлэн чеберлыкъя кивалтӥсез. Вить пьесалэн авторез[1]. Улэ Ижкарын.
Улон сюресэз
Вордӥськиз 1981-тӥтарын 29-тӥ куартолэзе Удмурт Элькунысь Можга ёросын Мельниково гуртын. Атаез Анатолий Васильевич школалэн директорез но, физкультурая дышетӥсь луыса тыршиз, анаез Александра Никоновна нылпи садын ужаз, покчи классъёсты дышетӥз. Сергейлы 3 арес тырмыку, семья Бадӟымсурд гуртэ улыны выжиз. Пичи дырысеныз лыдӟиськыны яратӥз. Школаын тужгес сӥлы карылӥз кылъя но литературая урокъёсты. Урокъёс бере гурт клубын ортчылӥсь пӧртэм ужрадъёсы пыриськылӥз. Уката тунсыко потылӥзы драмая но крезьгуръя кружокъёс. Соку клубен кивалтӥз Удмурт Элькунысь калык артист Геннадий Ганьков, крезьгурлы солэн кузпалыз Светлана Викторовна дышетӥз. Татын ик нырысьсэ сценаен тодматскиз[2].
Гожъяськыны кутскиз пичи дырысеныз. Мылкыд сётӥз дышетӥсез Нина Фёдоровна Кутасова, со ик егит гожъяськисьслы чаклам кружок нуиз. Нырысь печатласькиз «Можга иворъёс» ёрос газетын, собере гожъямъёссэ «Ӟечбур» газетэ поттаз. Мыло-кыдо гожъяськеменыз газетлэн Данъян книгаяз шедиз[2]. Быгатӥсь нылпиос понна радъяськись «Шундыкар» лагере вуылэмез бере, гожъяськон мылкыдыз юнмаз, веросъёс борды басьтӥськиз. Татын тодматскиз ачиз кадь тунсыко но быгатӥсь нылпиосын, эшъяськиз удмурт азьветлӥсь егитъёсын: Анатолий Эркишевен, Татьяна Ишматоваен, Дмитрий Корепановен но трос мукетъёсыныз. Берлогес «Инвожо» журналэн тодматскиз. Ассэ пьеса-инсценировка кылдытонын эскериз. Та жанрен гожъяськонэз уж ӧнерезлы пӧрмиз.
Школаез йылпумъямез бере Можгаысь Педагогикая колледжын дышетскиз. Татын дышетскыкуз дышетӥсез Татьяна Кибардина ёрос культура юртлэн уженыз тодматскыны дэмлаз. Пичи дырысеныз сценалы дышем Сергей ёрос культура юртлэн сцена вылаз ассэ эрико возиз, пӧртэм постановкаосы, спектакльёсы мыло-кыдо пыриськиз но артист луон мылкыдыз юнмаз. Педучилищеын дышетсконзэ куштыса, выльысь школаяз берытскиз, 11 классэз йылпумъяса, Казаньысь Лулчеберетъя но устолыкъя кун университетысь театральной факультетсэ дышетскыны пыриз. Ньылетӥ курсысен Казаньысь мунё театрын шудылӥз, берпум курссэ йылпумъян араз Ижысь мунё тетатрен кусып тупатӥз.
Огвакыт лулчеберет удысын уксё ӧжытгес тыремен, Антонов артистлэсь ужудыссэ ожгаружен воштӥз. Кӧня ке дыр ӵоже Пугачёво каргуртысь ожгар частьын тыршиз. Частьын пуштылонъёс дыръя улон юртсы изъянмиз, соин Иже выль квартиралы сертификат сётӥзы. Озьы, выльысь шоркаре вуыса, ужзэ мунё театрын азинтӥз. Али Удмурт Йӧскалык тетарын ужа. Вить пьесалэн авторез луэ. Антоновлэн ужъёсыз Мунё тетатрын но, Удмурт Йӧскалык театрын пуктылэмын.
Семьяез
Казаньын куинетӥ курсын дышетскыкуз кышнояськиз. Кузпалыныз Еленаен куинь пи будэто.
Ужъёсыз
Удмурт Йӧскалык театрын пуктэм ужъёсыз[3]:
- «Ышем лулъёс (Пропащие)»,
- «Пуны (Собака)»,
- «Васьлей (Васька)»,
- «Троллейбус (Троллейбус)»,
- «Трокай (Трокай)».
Мунё театрлы гожтэм Мунё театрлы гожтэм ужъёсыз:
- «Шаянчи»
Валэктонъёс
Чӧлсконъёс
- Антонов, С. А. Аслам кӧкыям : беседа с актером Госудаственного театра кукол УР, прозаиком, драматургом о жизни, о творчестве / С. А. Антонов; записала Е. Никитина // Удмурт дунне. — 2014. — 15 авг. — С. 10, 15 : фот. — (Тӧр шорын)