Сарапул типография

Википедиысь материал
Сарапулысь «Сарапул типография» МУП
Ул.Раскольникова,152.jpg
Кылдэм арез 1866-тӥ арын
Интыяськемез РоссияFlag of Russia.svg Россия: Удмуртия, Сарапул, Раскольниковлэн ульчаез, 152-тӥ юрт
Валтӥсь адямиосыз Ефременко В. В. (директор)
Удысэз Капчи промышленность
Поттэм вузэз Печать вуз: газетъёс, бланкъёс, календарьёс, визиткаос но трос мукетыз
Сайт printst18.ru
Логотип РУВИКИ.Медиа Медиафайлъёс РувикиМедиа пушкын

Сарапул типография (ӟуч: Сарапульская типография) — Сарапулысь капчи промышленностья предприятие.

Историез

1866-тӥ арын 15-тӥ шуркынмонэ Сарапулын типография усьтӥськиз. Типография ужен вырыны разрешение Парасковья Ивановна Старкова купчихалы Ватка губернияысь правление сётӥз[1]. Отын одӥг печать машина, кык типограф станок, одӥг литограф станок вал. Тямыс адями тыршиз. Типографиын кар думаосысь, гурт кенешъёсысь журналъёс, докладъёс но кар но гурт управаосысь, дышетон кенешъёсысь отчётъёс, пӧртэм огазеяськонъёслэн уставъёссы, ялонъёс, афишаос, счётъёс, отён гожтэтъёс, бланкъёс печатласькизы.

1875-тӥ арын типография Александра Лукинична Пойлова кие выжиз, нош 1888-тӥ арысен — Иосиф Михайлович Колчинлы[2]. Революцилэсь азьвыл вакытэ типографилэн берпуметӥ кузёез карысь тодмо купеч Л. Ф. Пешехонов вал. Раскольниковлэн ульчаысьтыз 152-тӥ юртъер «Пошехоновлэн юртэз» историысь нимзэ нуллэ[3][4]. Нырысетӥ аръёсаз типография араз 2500 манет тыр вуз поттылӥз.

1895-тӥ арын И. М. Колчин издатель «Санкт-Петербургысь телеграф агентстволэн телеграммаосыз» (ӟуч: «Телеграммы Санкт-Петербургского телеграфного агентства») ежедневник поттӥз. Таӵе нимыз шоры учкытэк, газетын интыысь лыдӟисьёс понна трос иворъёсыз вал. Отын уно ялонъёс, реклама, озьы ик Сарапулысь реальной училище бордын ужась метеорологияя станцилэн нуналлы быдэ потӥсь бюллетенез печатласькиз. 1897-тӥ арысен «Сарапулысь ялонъёсын листок» (ӟуч: «Сарапульский листок объявлений») потыны кутскиз. Но 1906-тӥ арозь общественно-политической газет ӧй вал. Н. Н. Блинов 1912-тӥ арын поттэм Сарапул сярысь книгаяз гожтӥз: «Ужась калыклэн нодтэмлыкеныз герӟаськем югдурен сяна но, частной газетлы кылдыны секыт». Сарапулын улӥсьёс пӧлын тросгес неграмотной адямиос вал. Дышетон но лулчеберет удысъёслы воксё ӧжыт коньдон висъяськылӥз. 28 сюрс улӥсен карын одӥг гинэ библиотека ужаз. 1906-тӥ арын 17-тӥ куартолэзе типографиын «Прикамье шаер» (ӟуч: «Прикамский Край») газетлэн нырысетӥ тиражез потӥз[2].

1919-тӥ арын 13-тӥ гудырикошконэ «Горд Прикамье» (ӟуч: «Красное Прикамье») газетлэн нырысетӥ номерез потӥз[5].

Сарапул типографиын 1918-тӥ—1919-тӥ аръёсы печатлам газетъёс

Революцилэсь азьло аръёсы лэзем (легальной) печатен ӵош лушкем печать но вордскиз — прокламациос но листовкаос подпольно амалэн потыны кутскизы. 1905-тӥ арын Сарапул типографиысь текстъёсты бичась Александр Терентьевич Кузьмин, прокламациосты поттэмез понна янгыше уськытыса, кырмемын вал. Секыт висён гинэ сое каторгалэсь утиз. Революцилэсь азьвыл полиграфистъёс секыт югдурын ужазы. Уноез полиграфистъёс, тужгес но — текстъёсты бичасьёс, ӵемысь профессиенызы герӟаськем черъёсын висьылӥзы — узвесьлэсь отравление басьтылӥзы.

Елизавета Васильевна Кукарева печатлась Граждан ож  [ӟуч] (удм. вакытэ ас мылкыд каремезъя Горд Армие пыриськиз. «Горд Прикамьелэн» журналистъёсыз но полиграфистъёсыз ужась калыкез печать пыр белогвардеецъёслы но интервентъёслы пумит нюръяськыны ӧтьылӥзы. Граждан ож йылпумъяськем бере, газет ужась калыкез куашкатэм улонэз выльысь ӝутыны, калык хозяйствоез юнматыны мобилизовать кариз. Та вакытэ со зэмен ик трос калыклы чакламон но лыдӟымон луиз. Газетэз полиграфия ласянь умоятон бордын типографилэн коллективез но тыршиз. Таин валче но, «Горд Прикамье» газет Россиысь гурт удысъя адӟытонэ кык пол пыриськиз[6].

Нырысетӥ пятилеткаос вакытэ Сарапулысь типография инъет выллем луиз. Со юрттэмен, куд-ог выль ёросъёсын типографиос усьтӥськизы. 1931-тӥ арын, кылсярысь, со Фоки ёросын выль кылдӥсь типографилы но газетлы тӥрлык, машинаос но печатлан шрифтъёс висъяз. Частые ёросэ типографиез радъян вылысь печатник Александр Терентьевич Тюлькин но солэн сузэрез Юлия Терентьевна Юркова вуылӥз. Бератаз Сарапул типографилэн инъетэз вылын Каракулино но Кияса ёросъёсын типографиос озьы ик усьтэмын вал.

Ожлэн нырысетӥ нуналъёсаз ньыль нылъёс асьсэ мылкыд каремзыя фронтэ кошкизы. Ожмаськон бусыосы «Горд Прикамье» газет редакциысь Зинаида Васильевна Сомова, Александр Терентьевич Тюлькин, Александр Парамонович Калмыков, Михаил Степанович Кобяков, Павел Иванович Яковлев но мукет полиграфистъёс но журналистъёс пыриськизы[7]. Тыложысь соос ваньзы ӧз берытске.

Азьвыл нимъёсыз

  • Удмурт АССР-ысь Совнарком бордысь Издательствоя но полиграфия управлениысь Сарапулысь кун типография — 1940-тӥ арын 15-тӥ шуркынмонысен 1953-тӥ арозь;
  • Удмурт АССР-ысь Лулчеберетъя министерствоысь издательствоосъя но полиграф промышленностья ёзысь Сарапул кар типография — 1953-тӥ арысен 1963-тӥ арозь;
  • Удмурт АССР-ысь Министръёслэн Кенешсы бордысь Печатья управлениысь Сарапул кар типография — 1963-тӥ арысен 1973-тӥ арозь;
  • Удмурт АССР-ысь Министръёслэн Кенешсы бордысь Издательство ужъёсъя, полиграфияя но книгаен вузкаронъя управлениысь Сарапул кар типография — 1973-тӥ арысен 1975-тӥ арозь;
  • Удмурт АССР-ысь Министръёслэн Кенешсы бордысь Издательство ужъёсъя, полиграфияя но книгаен вузкаронъя управлениысь 1941-тӥ—1945-тӥ аръёсысь Быдӟым Атыкай ожын Вормонлы 30 ар нимо Сарапул кар типография — 1975-тӥ арысен 1988-тӥ арын 27-тӥ куарусёнозь;
  • Сарапулысь издательство ужъёсъя, полиграфияя но книгаен вузкаронъя полиграфияя огазеяськон — 1988-тӥ арын 28-тӥ куарусёнысен 1992-тӥ арын 10-тӥ шуркынмонозь.
  • Сарапулысь Ваньбурен кивалтонъя кар комитетлэн «Сарапул кар типография» муниципал предприятиез — 1992-тӥ арын 11-тӥ шуркынмонысен 2003-тӥ арозь.
  • Сарапулысь «Сарапул типография» муниципал унитарной предприятие — 2003-тӥ арысен али дырозь[8].

Валэктонъёс

  1. ↑ Блинов Н. Н. Сарапул. Исторический очерк. — Сарапул: Типо-литография А. Л. Пойловой, 1887. — С. 63. — 83 с.
  2. ↑ 1 2 Блинов Н. Н. Город Сарапул. — Сарапул: Типо-литография Н. Я. Улыбина, 1912. — С. 46. — 60 с.
  3. ↑ Истории, рассказанные музейными предметами [ӟуч], museumsarapul.ru. Эскеремын: 15 гудырикошконэ 2025 арын.
  4. ↑ Федорченко-Шемякина Л. Н. Парад домов Сарапула. — Сарапул: Изд-во «Сарапул», 1993. — С. 36—37. — 138 с. — 3000 экз.
  5. ↑ Выход первого номера газеты «Красное Прикамье» [ӟуч], services.unatlib.ru. Эскеремын: 15 гудырикошконэ 2025 арын.
  6. ↑ История газетной строкой: 1949-1950 годы // Красное Прикамье. — 2019. — 27 инвожое (№ 146—151). — С. 5.
  7. ↑ Журналисты «Красного Прикамья» на фронтах Великой Отечественной // Красное Прикамье. — 2020. — 7 куартолэзе (№ 19). — С. 6.
  8. ↑ Общие сведения: Сарапул [ӟуч], udmgossovet.ru. Эскеремын: 15 гудырикошконэ 2025 арын.

Чӧлсконъёс

«https://udm.ruwiki.ru/w/index.php?title=Сарапул_типография&oldid=507172»-ысь басьтэмын