Попова, Вера Евстафьевна

Вера Евстафьевна Попова
Вордӥськем дырыз	17-тӥ (29‑тӥ) куарусёнэ 1867(1867-09-29)
Вордӥськем интыез	Санкт-Петербургын
Кулэм дырыз	25-тӥ оштолэзе (7-тӥ куартолэзе) 1896(1896-05-07) (28 арес)
Кулэм интыез	Ижкарын
Кун	Росси империя
Тодос удысэз	химия
Ужан интыез	Гурт удысъя Новоалександрийской институт, Бестужев курсъёс
Дышетскемез	Бестужев курсъёс[d] Женева университет[d]
Учёной степенез	химияя доктор
Научной руководитель	А. П. Бородин
Медиафайлъёс РувикиМедиа пушкын

Ве́ра Евста́фьевна Попо́ва (ныл нимыз Богдано́вская; (1867-тӥ арын 17-тӥ (29-тӥ) куарусёнэ Санкт-Петербургын—1896-тӥ арын 25-тӥ оштолэзе (7-тӥ куартолэзе) Ижын) — химияя доктор, дано ӟуч хирурглэн, медициная но хирургияя академиысь профессорлэн Е. И. Богдановскийлэн нылыз. Нылкышно химикъёс пӧлысь нырысетӥез.

Улон сюресэз

1867-тӥ арын 17-тӥ (29-тӥ) куарусёнэ Санкт-Петербургын вордӥськиз; Евстафий Иванович но Мария Алексеевна Богдановскийёслэн нылзы.

Санкт-Петербургысь Смольной институтын тодон-валан люказ (1883-тӥ арлэн выпускез). Собере, 1883-тӥ—1887-тӥ аръёсы, Нылкышноослэн вылӥ (Бестужевлэн) курсъёсазы естественной ёзэтаз дышетскиз. Химиез Женеваысь университетын эскериз, отын 1892-тӥ арын химияя доктор степень басьтӥз («Дибензилкетонэз эскерон» диссертациез, 1892). 1890-тӥ арысен Ново-Александрийской институтын химилы дышетӥз, 1892-тӥ арысен 1894-тӥ арозь Нылкышно вылӥ курсъёсын стереохимияя лекциос лыдӟылӥз.

1895-тӥ арын сӥзьыл Я. К. Поповлы бызиз. Солэн картэз, выжыезъя дворянин, военной академиез йылпумъяса, кема аръёс ӵоже Санкт-Петербургысь патрон поттон заводын ужаз, сюан шудэмзылэсь одӥг ар азьвыл Ижысь пыӵалтӥрлык поттон но андан ӵыжатон заводъёсын кивалтӥсе юнматэмын вал. Со сӥзьылэ ик егит кузпалъёс Санкт-Петербургысь кошкизы но Ватка губерниысь Ижысь заводэ выжыяськизы. Отын Вера Евстафьевна Попова улоно интыяз химияя лаборатория усьтӥз, со сяна, заводын ужаз.

1896-тӥ арын, лабораториын ужакуз, тодосчи тӧдьы фосфор но циановодородной кислоталэсь кусыпъёссэс эскерыны выриз. Та кык веществоосын ампула пилиськиз но, ньыль час ортчем бере, пуштон дыръя кылдэм фосфористой водородэн отравиться кариськыса, сӧсырмем нылкышно кулӥз. Берпуметӥ сюресаз сое Дун-чылкыт Александр Невский нимо соборын вӧсяса келязы, собере картэз кышноезлэсь мугорзэ выжы юртъерез котыре Чернигов губерние (Сосницкий уездысь Шабалинов черкогуртэ) нуиз. В. Е. Богдановская-Поповалэн сюе ватэм склепез (мугорыз совето власть кылдонлэн нырысетӥ аръёсаз быдтэмын вал) али куашкан калэ вуэмын, нош шайгузэ чеберъям синпелетэз Сосницкой шаертодонъя музейын утиське.

Наукая ужез

В. Е. Богдановская-Попова кетон гердъёслэсь химизэс эскерылӥз. Доктор диссертацияз возьматӥз: щёлочь средаын но омырын ӟырдакуз, дибензилкетон кислородэз бордаз кыске но кӧня ке бензой кислота кылдытэ. Озьы шараяз: кетонъёс вань, альдегидъёс сямен, соос молекулаез куашкатытэк, кислотаосы выжыны быгато.

Библиография

• Реакции уплотнения и восстановления дибензилкетона // «Журнал Русского физико-химического общества». — 1892, Т. 24. — Вып. 5
• Об окислении кетонов в оксикислоты // «ЖРФХО». — 1894. — Т. 26. — Вып. 4.

Литература

• Попова Вера Евстафьевна // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1890—1907.
• Густавсон Г. Несколько слов о Вере Евстафьевне Богдановской-Поповой // «Журнал Русского физико-химического общества». — 1897. — Т. 29. — Вып. 3
• Mусабеков Ю. С. Первые русские женщины-химики // «Сообщения о научных работах членов Всесоюзного химического об-ва им. Д. И. Менделеева». — 1949. — Вып. 4.

Валэктонъёс