Тылпу кысон каланча (Сарапул)
| Тылпу кысон каланча | |
|---|---|
 | |
| 56°28′18″ с. ш. 53°48′35″ в. д.GЯO | |
| Интыяськемын | Сарапул |
| Технической параметръёсыз | |
| Ӝуждалаез | 24,7 |
| Карта вылын | |
|
|
|
 |
|
 Медиафайлъёс РувикиМедиа пушкын | |
 | Россилэн лулчеберето кылёс лэсьтосъёсыз федерал инлыкен рег. № 181410167500006 (ЕГРОКН) лэсьтос № 1810035000 (БД Викигида) |
Сарапулысь тылпу кысон каланча (ӟуч: Пожарная каланча (Сарапул)) — Удмурт Элькунысь татчыозь огназ утиськем эскериськон кар башня. Историысь но лулчеберетысь федерал инлыкен утёно объектъёс пӧлы пыртэмын[1]. Адресэз: Сарапул, Свобода нимо площадь, 5.
Историез
1886-тӥ арын Сарапулын каланча пуктон пумысен кенешемын вал. Сое ӝутон понна Троицкой площадьын, карысь тужгес ӝужыт вырйылын, инты бырйизы. Сооружение пуктон уж оскемын вал пермь купечлы Павел Драгуновлы. Лэсьтӥськонлы 19 559 манет но 94 коньы висъяськиз, но коньдон ӧз тырмы — эшшо 100 манет ватсано луиз[2][3].
Каланчаез пуктонэ пермь инженеръёс, мастеръёс, лэсьтӥськисьёс, озьы ик Сарапул котырысь пичи музъемен крестьянъёс, уксё поттыны малпась вань мылкыд карисьёс пыриськизы[4]. Уже кутэмын вал 150 сюрслэсь ятыр кирпич, ог сюрс пуд известка, 900-лэсь трос коръёс но пуӵъёс[3].
Башня 1887-тӥ ар ӵоже йылсамын вал. 1893-тӥ арын бордаз ӝутӥзы на бекчеен уробоосты но тылпу кысон тӥрлыкез возён вылысь навес, улаз ик мунчо пуктӥзы, гуос лэсьтӥзы. Таӵе выльдӥськонлы коньдон висъязы интыысь купечъёс, промышленникъёс но карысь огшоры улӥсьёс[2].
Нырысетӥ этажаз тямыс бадӟым капкаен манеж вал, кыкетӥ этажзэ тылпу кысӥсь мастерлы, тылпу кысӥсьёслы но соослэн семьяоссылы улон вылысь висъетъёслы люкылӥзы. Вышкалэн вылӥ этажаз котыр учкон площадка лэсьтэмын вал, отысен быдэс кар адскылӥз[1].
Башняысен пуромем тылпу сярысь гинэ ӧз ивортылэ. Вылаз флагъёс, фонарьёс, турлы буёло шаръёс, флюгер юнматъязы, озьы матэктӥсь кезьытъёс, тӧллэн кудпалась пельтэмез но кужымез сярысь, Кам шур кузя вуись пароходъёс сярысь калыклы вераллязы[3]. Тылпу гоман учыръёс дыръя пожарнойёслэн ужзы сярысь вераз Андрей Фикс, Сарапулысь 13 номеро нимысьтыз тылпу кысонъя но юрттэт сётонъя частьысь кивалтӥсьлэн воштӥсез:
Со вакытэ карез ньыль люкетлы сямен люкылӥзы, тылпу потон дыръя шимес учыр кылдэм палаз ик котырес шаръёсты ошылӥзы. Башня йылэ интыям набат жугон гырлые йыгаллязы, сое кылыса, калык тылпу пуромем интые дыртылӥз, кин маин быгатэ юрттылӥз[4].
2024-тӥ арын ивортонъёсъя, каланчаын Сарапулысь 13 номеро нимысьтыз тылпу кысонъя но юрттэт сётонъя пост интыяське. Башня, Свобода нимо площадьысь сяна, быдэс карысь огез валтӥсез учкымон инты луэ[5]. Со кунэн утёно архитектурая синпелет[2].
Архитектураез
Сарапул каланчаез ӝутэм архитекторлэн нимыз тодмо ӧвӧл. Куд-ог веранъёсъя, проектэз лэсьтӥз Прикамьеысь тодмо архитектор И. Чарушин яке Ватка губерниысь инженер А. Андреев[4].
Озьы ик ӝутэм каланчалэн рос-прос тодманы луоно пусъем стилез ӧвӧл. Кыдёкысен адскись пропорциос, чурыт куронъёсъя лэсьтэм фасадъёслэн симметризы, планировкаез валаса быдэстон — ваньмыз та классицизмлы укша. Со дыре ик юрт эклектикалы тупась пӧртэм люкетъёсын но элементъёсын чеберъямын. Но ӧнерчиос ӵемгес ӟуч-византийской стиль пала карисько[4][1].
Сарапулысь тылпу кысон башнялэн ӝуждалаез 24,7 м, нош шпиленыз валче — 37 м[4]. Совето вакытэ колокольняосты куашкатэмзы бере карысь тужгес ӝужытэз лэсьтос вал[5].
Валэктонъёс
- ↑ 1 2 3 История пожарного дела [ӟуч] adm-sarapul.ru. Эскеремын 04-11-2025 арын
- ↑ 1 2 3 Ксения Аксенова (12-05-2024) Козлы-курильщики и призраки: что вы могли не знать о старейшей пожарной каланче в Удмуртии [ӟуч] izh.kp.ru. Эскеремын 04-11-2025 арын
- ↑ 1 2 3 Пожарное депо с каланчой — самая узнаваемая достопримечательность Сарапула [ӟуч] Историческийбагаж.рф. Эскеремын 04-11-2025 арын
- ↑ 1 2 3 4 5 Ксения Аксенова (30-04-2024) Год на строительство, привидение и пожарный козел: история единственной оставшейся в Удмуртии пожарной каланчи [ӟуч] izhlife.ru. Эскеремын 04-11-2025 арын
- ↑ 1 2 Сарапульская пожарная каланча (пожарное депо с каланчой) [ӟуч] moisarapul.ru (02-06-2016). Эскеремын 04-11-2025 арын