Плотникова, Анна Васильевна
| Анна Васильевна Плотникова | |
|---|---|
 | |
| Вордӥськем нуналыз | 22-тӥ тулыспалэ 1972 (54 года) |
| Вордӥськем интыез | |
| Кунмуртлыкез | |
| Ужудысэз | кырӟась, гармонист |
Анна Васильевна Плотникова (ворд. 22-тӥ тулыспалэ 1972, Улын Котныр, Удмурт Автономной Советской Социалистической Республика) — совето но росси кырӟась, арганчи. Удмуртиысь дано но калык артистка, Россиысь тужгес усто арганчиос пӧлы пыре, «Играй, гармонь» фестивальлэн лауреатэз[1][2].
Улон сюресэз
Вордӥськиз 1972-тӥ арын 22-тӥ тулыспалэ Алнаш ёросысь Улын Котныр гуртын трос нылпиё семьяын. Арганэн шудыны дышетскиз школа аръёсаз, агаез инструмент басьтэм бере[3]:
Мон калык азьын шудыны ӧй дышетскы. Кепырай. Шудэме нокинлэсь пельзэ медаз ванды шуыса, мунчое кошкисько вал, отын ик арганэным шудыны дышетски[3].
Со аръёсы ик кылбуръёс гожъяз, ужъёссэ «Дась лу!» газетэ келялляз. Гуртысь концертъёсы пыриськылӥз: постановкаосын шудӥз, кырӟаз, эктӥз. 8-тӥ класс бере, 1990-тӥ арын, Элькунысь лулчеберетъя училищелэн оркестр ёзэтаз дышетскыны пыриз. Отын нырысетӥ инструментэз балалайка луиз. Анна Плотниковалэн тодэ ваёнъёсызъя, кыкетӥ толэзьзэ дышетскыкуз ик сое оркестре басьтӥзы ни, ӵемысь отчы 3-тӥ курсысен гинэ басьтылӥзы ке но. Озьы ик училищеын со гитараен, фортепианоен но баянэн шудыны дышетскиз[4].
Диплом басьтыса, Плотникова вордскем гуртаз бертӥз. Школаын, клубын, нылпи садын ужаз. «Тулкым» коллективен но «Шундыпиос» нылпи ансамблен концертъёсы но фестивальёсы потаз. Собере быгатӥсь нылпиос понна радъям «Шундыкар» лагерьын фольклоръя ӧнерчи луыса тыршиз. «Арганчиос» ансамблен сцена вылэ потаз. Бӧрысь Анна Плотниковаез Ижкаре «Шулдыр ӝыт» коллективе ӧтизы, бергес — Удмурт кун филармония бордын ужась «Катанчи» театре[5].
Иже улыны выжемез бере Ижкар вӧзысь Италмас черкогуртысь шор ёзо школаын пинал арганчиослы кружок нуиз[5].
2023-тӥ арын Андрей Малаховлэн «Песни от всей души» передачаяз пыриськиз[6].
«Играй, гармонь»
1997-тӥ арын Анна Плотникова Удмуртиысь"Шуд, арганэ" конкурсын вормиз. 1998-тӥ арын сое Россиысь «Играй, гармонь» вожвылъяськонэ ӧтизы[5].
«Играй, гармонь» ужрадэ 2 армысь кунысьтымы 300-лэсь трос арганчиос быгатонлыкъёссэс возьматыны лыкто. Пӧлазы уно вылӥ уровенен профессионалъёс. Малпамтэ шорысь мон устоосыз пӧлы пыри. 2001-тӥ но 2002-тӥ аръёсы Новосибирске ветлӥ, отын Россиысь «Играй, гармонь» центр но Геннадий Заволокинэн кылдытэм «Частушка» ансамбль интыясько. 2002-тӥ арын ӟуч кылын кырӟан быдэстӥ, но учкисьёс монэ удмурт кылын кырӟатытэк ӧз лэзе. Туж шумпотӥ, соосты удмурт кырӟанлы синмаськытыны быгатӥ шуыса.
Анна Плотникова дас ар ӵоже Россиысь тужгес усто арганчиос пӧлы — «Золотая десятка»-е — пыриз[5].
Валэктонъёс
- ↑ Плотникова Анна Васильевна
- ↑ “Золотая Десятка” гармонистов России, Официальный сайт "Играй, гармонь!" | Российский центр им. Геннадия Заволокина (27 шуркынмонэ 2014). Эскеремын: 30 пӧсьтолэзе 2024 арын.
- ↑ 1 2 Александр Поскрёбышев Анна Плотникова одинакового волнения Известия Удмуртской Республики.
- ↑ Александр Поскрёбышев Анна Плотникова одинакового волнения Известия Удмуртской Республики.
- ↑ 1 2 3 4 Галина Савина Плотникова Анна Васильевна. Мурӝолын но со шудӥз, «Зарни арганчи» луиз [удм.] Воршуд.
- ↑ Народная артистка Удмуртии Анна Плотникова стала участницей программы с Андреем Малаховым [ӟуч] ИА "Удмуртия".