Корепанов, Анатолий Всеволодович
| Анатолий Всеволодович Корепанов | |
|---|---|
 | |
| Быдэс нимыз | Анатолий Всеволодович Корепанов |
| Вордӥськем нуналыз | 1-тӥ тулыспалэ 1959 (67 арес) |
| Вордӥськем интыез | |
| Кун | |
| Ужудысэз | тренер, спортсмен |
Анатолий Всеволодович Корепанов — капчи атлетикаен вырись спортсмен, тренер, Россилэн сборнойысьтыз 100 иськемез бызьылонын дунневыл куинь полэс чемпионэз. Марафонъя дунневыл кубоклэн Хельсинкиын (1990) но Брюссельын (1991, 1992) ортчем этапъёсаз вормись. Калыккуспо классэн спортъя мастер, капчи атлетикая Россиысь спортъя дано мастер, Удмуртиысь мугорез кыдатон удысысь дано ужась[1].
Улон сюресэз
Вордскиз Удмурт АССР-ысь Балезино ёросысь Пулыб гуртын. Бускель Андрейшур гуртысь школаын дышетскиз, нуналлы быдэ ӧжытсэ 6 иськем пыдын ветлоно луиз: дорысеныз школае но, берен но. Анатолий Корепанов пыриськылӥз школаын но ёросын ортчись капчи атлетикая, куасэн бызьылонъя, футболъя вань ӵошатсконъёсы[2].
Школаез йылпумъямез бере армиын служить кариз, собере 1980-тӥ арын Ярысь педучилищее спортъя ёзэтэ пыриз, Фёдор Лобастов тренер дорын капчи атлетикаен вырыны кутскиз[3]. 1981-тӥ арын Удмуртилэн сборнояз шедиз но спортъя мастере кандидатлэсь нормативзэ быдэстӥз[2]. Колледжез йылпумъяса, дышетсконзэ Удмурт кун университетын азьланьтӥз, СССР-ын ортчись ӵошатсконъёсы пыриськыны кутскиз. Выль тренерез вал Владислав Сулима. Анатолий Корепанов нырысетӥ призовой — куинетӥ — интызэ 1984-тӥ арын Студентъёслэн шудонъёсазы 10 иськеме бызьылонын басьтӥз. 1985-тӥ арын Вильнюсын нырысетӥзэ марафонэ пыриськиз но СССР-ысь спортъя мастерлэсь нормативзэ быдэстӥз[1][4].
Анатолий Корепанов нырысь полумарафонъёсын бызьылӥз, собере марафонъёсы выжиз[4]. Нырысетӥ вормонзэ басьтӥз 1988-тӥ арын Уфаын ортчем союзной ӵошатсконын. 1989-тӥ арын Япониын радъяськем марафонэ пыриськемез бере Совето Союзлэн командаяз кутэмын вал[4][1]. 1990-тӥ арын Корепанов Хельсинкиысь Марафонъя дунневыл кубокын вормиз, нош 1991-тӥ но 1992-тӥ аръёсы — Брюссельын[5]. Бӧрысь Великобританиын, Италиын, Испаниын, Бельгиын, США-ын, Африкаысь кунъёсын радъям пӧртэм вожвылъяськонъёсы пыриськиз, трос пол призовой интыос басьяз. ЮАР-ын ортчем дуннеысь тужгес бадӟым супермарафонэ вить пол пыриськиз[6].
1986-тӥ арысен Удмурт кун университетысь мугорез кыдатонъя кафедраын дышетӥсь луыса тыршиз, спортэн выремысь ӧз дугды. 1991-тӥ арысен «Университет» спортклублэн вылӥ тренерез но Удмуртиысь капчи атлетикая федерацилэн правлениезлэн ёзчиез луэ.
Дышетӥз калыккуспо классъем спортъя кык мастеръёсты но спортъя 13 мастеръёсты[7][5].
Анатолий Корепановлэн кузьымъёсыз понна бызьылон
Удмуртиысь Балезино ёросын 1995-тӥ арысен арлы быдэ Анатолий Корепановлэн кузьымъёсыз понна бызьылон радъяське. Нырысь со ёроскуспо ужрад вал но сое радъянэ ачиз Корепанов пыриськиз, котыраз кӧня ке мылкыд карисьёсты люкаса. Дыр ортчемъя спортсменъёслэн географизы паськытаз: табере бызьылонэ Удмуртиысь гинэ ӧвӧл, Пермь шаерысь, Киров улосысь но Россилэн мукет улосъёсысьтыз спортсменъёс пырисько[4][8].
2024-тӥ арлы лыдпусъёсъя, бызьылон радъяськыны кутскем дырысен отчы оглом 15 сюрслэсь трос спортсменъёс пыриськизы[9].
Данъетъёсыз
- капчи атлетикая Россиысь спортъя дано мастер
- Удмуртиысь мугорез кыдатон удысысь дано ужась
- «Мугорез кыдатон но спорт удысысь отличник» гадьпус[10]
- Балезино ёрослэн дано муртэз (2004)[11]
- Брюссельлэн дано муртэз[6]
Валэктонъёс
- ↑ 1 2 3 Знаменитые земляки [рус.] Балезинский районный историко-краеведческий музей.
- ↑ 1 2 Фертиков П.П. Земляки Якшур-Бодьи. — Якшур-Бодья, 2015.
- ↑ Юрий Шаляпин Очередное достижение мастера спорта Сельская правда.
- ↑ 1 2 3 4 Пермякова М. Каждый забег – это маленькая жизнь "Вперёд".
- ↑ 1 2 Корепанов Анатолий Всеволодович [ӟуч]
- ↑ 1 2 Знаменитые земляки [рус.] Балезинский районный историко-краеведческий музей.
- ↑ Год педагога и наставника | Анатолий Корепанов [ӟуч] Rutube.
- ↑ Александр Кирилин Легкоатлеты Удмуртии традиционно завоевали призы Анатолия Корепанова Удмуртская правда.
- ↑ Торжественное открытие легкоатлетического пробега на призы ЗМС А.Корепанова – МБУК "РДК "Дружба" [рус.] balezino-rdk.ru.
- ↑ Анатолий Корепанов — один из лучших педагогов Удмуртии! [ӟуч] Удмуртский государственный университет.
- ↑ Почетные граждане Балезинского района Официальный сайт МО "Балезинский район".
Литература
- Юферева Э. Г. Герои спорта Удмуртии. — Ижевск: Удмуртия, 2014.