Книппер-Чехова, Ольга Леонардовна

Ольга Книппер-Чехова
Сергей Малютинлэн суредам портретэз (1925)
Вордскыкуз сётэм нимыз	ӟуч: Ольга Леонардовна Книппер
Вордӥськем дырыз	9‑тӥ (21-тӥ) куарусёнэ 1868
Вордӥськем интыез	Глаз, Ватка губерния, Росси империя[d]
Кулэм дырыз	22-тӥ южтолэзе 1959({{padleft:1959|4|0}}-{{padleft:3|2|0}}-{{padleft:22|2|0}}) (90 лет)
Кулэм интыез	Муско, СССР
Кунмуртлыкез	Росси империя[d]  СССР
Ужудысэз	актриса
Театр	МХАТ
Данъетъёсыз
IMDb	ID 0461179
Медиафайлъёс РувикиМедиа пушкын

О́льга Леонардовна Кни́ппер, 1901-тӥ арысен Че́хова (9‑тӥ (21-тӥ) куарусёнэ 1868, Глаз, Ватка губерния — 22-тӥ южтолэзе 1959, Муско) — МХАТ-ын ужам ӟуч но совето актриса, СССР-ысь калык артистка (1937). Антон Павлович Чеховлэн кузпалыз.

Улон сюресэз

Инженер-технологлэн Леонард Августовичлэн (выжыезъя немец) но солэн кузпалызлэн Анна Ивановналэн (вордскемезъя Зальца; вокал классъя профессор) семьяязы вордӥськиз. Уноез совето ивортонъёсъя, со югыт дунне вылэ Росси империысь Ватка губернияысь Глаз утемысь Глазовын потӥз (али — Россиысь Удмурт Элькун), котьма ке но ачиз актриса гожъялляз, «Глазовлэсь кыдёкын ӧвӧл» вордскиз шуыса. Туала эскерисьёс лыдъямъя, вордскем интыез Кокман черкогурт вал (али — Красногорск ёрос), татын бубиз со вакытэ Кокманысь вина пӧзьтон заводэн кивалтӥсь луыса ужаз. 1871-тӥ арын семья Муское выжиз.

Ольга частной нылкышно гимназиез йылпумъяз, солэн верамезъя, кема дыр ӵоже «барышняын улӥз». Атаез сое театрен вырыны алылӥз, нылыз суредась яке кылысь кылэ берыктӥсь мед луоз шуыса малпалляз. Бубиз шӧдтэк шорысь кулэмез бере, уксё поттон понна крезьгуръя урокъёс сётъяно луиз. «Со лул-пушез зол выльдон, будон вакыт вал, „барышняысь“ мон эрико, аслыз ачиз улон понна коньдон поттӥсь муртлы пӧрми, та улонлэсь нырысьсэ пӧртэм буёлъёссэ адӟи».

1885-тӥ арын дас тямыс аресъем Ольга эшезлэн егит агаеныз, тодмо инженерен Владимир Шуховен тодматскиз. Куспазы пуромем синмаськон, пумиськылон вакытсы кык арлэсь ятыр кыстӥськиз, но Ольга Шуховлэн мумизлы ярамтэен, вань ӵыжы-выжыоссы валче улонзылы оскизы ке но, сюан ӧз шудэ.

Любительской спектакльёсы пыриськылӥз. Нырысь-валысь Пичи (Малый) театрысь тодмо актёр Александр Ленский доры студие пырыны турттэ вал, но соиз егит дышетскисьлэсь быгатонлыксэ ӧз адӟы, классаз ӧз куты. 1895-тӥ арын Мускоысь императорской театральной училищее кутӥзы, озьы ке но отысь уллязы, Пичи театрысь одӥг актрисалэн ӵыжы-выжыезлы инты висъяны кулэ луэмен.

Со аре ик Мускоысь филармонияя обществолэн крезьгуръя но драмая училищеяз куинь аръем драмая классэ пыриз, кивалтӥсез Владимир Немирович-Данченко луиз, со ик дусымез луиз. 1898-тӥ арын училищеез йылпумъямез бере, Мускоысь художествоя театрысь соку гинэ кылдытэм труппае кутэмын вал, ӝоген Константин Станиславскийлэн партнёрез луиз. Дебют спектаклез «Царь Фёдор Иоаннович» вал, татын со эксэй Ириналэсь рользэ быдэстӥз.

Чеховен кусыпъёсыз

Ольга Книпперлэн Антон Чеховен нырысетӥ пумиськонъёссы «Чайка» но «Царь Фёдор Иоаннович» спектакльёслэн репетициосазы ортчизы (1898-тӥ арын 9-тӥ, 11-тӥ но 14-тӥ куарусёнэ). Со пумиськонъёс бере Чехов гожъяз: «Ирина, мон малпамъя, туж синмаськымон. Куараез, йӧнлыкез, сюлмыз — сыӵе умой, ньылон ик ӵабъяське… ваньмызлэсь умой Ирина. Муское кыльысал ке, со Ириналы синмаськысал».

Чехов Ольга Книпперен (1901)

Ольга Книппер та пумиськонъёс сярысь тодаз вайылӥз: «…со пумиськонысен улонэлэн векчи но секыт гердэз кыстӥськыны кутскиз». Чехов Художественной театрын пуктэм но триумфальной луэм «Чайка» постановкаез адӟыны ӧз быгаты, но ваньзы, кин солы Ялтае гожъялляз, Книпперен быдэстэм Аркадиналэсь рользэ пусйылӥзы.

1899-тӥ арын гужемысен ог-огзылы гожтэт гожъяны ӧдъязы, озьы 1904-тӥ арозь, вис карылыса, кусып возизы. Чеховлэн Книпперлы 443 гожтэтэз сярысь но Книпперлэн Чеховлы 400 гожтэтэз сярысь тодмо. Та чуръёсын писательлэн берпуметӥ улон аръёсыз адӟисько. Гожъяськись улонысь кошкемез бере но Ольга Леонардовна кӧня ке ар ӵоже, картэзлы вазиськыса, гожтэтъёс гожъялляз, озьы оглом сюрслэсь ятыр гожтэтъёс утиськемын.

1900-тӥ арын тулыс МХТ нырысетӥ гастрольёсыныз Крыме вуиз, татын Чехов улӥз. Ольга солэн юртаз каръяськиз, со дырысен паръёс ӵош улэмзы, ог-огзылы синмаськемзы сярысь ӧз ватылэ ни. Соос Ялтаын куать арня ӵоже ӵош улӥзы, нош отӥяз — Мускоын, озьы ӝоген сюан шудон сярысь калык пӧлын супыльтонъёс вӧлмизы.

1901-тӥ арын 25-тӥ куартолэзе (7-тӥ инвожое) Антон Павлович но Ольга Леонардовна черкын паръяськизы. Егит кузпалъёс чечы толэзьзэс Башкириын ортчытӥзы, татысь Аксёново черкогуртысь Андреевской туберкулёзной санаторийын Чехов эмъяськиз. Со аре ик Книппер секытэн луиз, но кылдэм пиналыз усиз. 1902-тӥ арын южтолэзе со, нош ик секытэн нылкышно, Санкт-Петербургын адӟытон дыръя кӧня ке метр ӝуждалаысь усьтэм люке усиз, операция бере (сое Д. О. Отт лэсьтӥз) но кема висемез бере нылпи вайыны ӧз быгаты ни. Д. Рейфилд пусъемъя, мумыкарезлэсь палэнэ кылдэм пиналыз сярысь вераськон мынӥз, озьыен, Книппер толшор пумын кӧто луиз, со вакытэ кузпалыныз виссы 1000 иськем вал. Рейфилд малпамъя, пиналлэн бубиз Александр Вишневский вал.

1904-тӥ арын толшоре «Вишнёвый садлэн» премьераез ортчиз, татын Книппер Раневскаялэсь рользэ быдэстӥз — тужгес яратоно рользэ, сое со сцена вылын пумозяз сямен шудӥз. Браксы со арын ик Чехов кулытозь, 2-тӥ (15-тӥ) пӧсьтолэзёзь, кыстӥськиз. Завещаниен со «Гурзуфын дача но вить сюрс манет» басьтӥз. Ялтаысь Чеховлэсь юртсэ утисьлэн малпамезъя:

Чехова Мария Павловна гожтӥз, браксы шудо вал шуыса. Со зэм. Чехов пусйылӥз: инбамын нуналлы быдэ возьматъяськисьтэм толэзь выллем мыным кышно кулэ. Сыӵе кышно ик вал Мускоысь художественной театрысь актриса Ольга Леонардовна Книппер. Со Чеховез яратэ вал, ӵыжы-выжыосыныз ӵошатыса, со ваньзэ куштыны но шоркарысь провинциальной Ялтае висись картэз доры выжыны дась вал. Но соиз ачиз сое дугдытӥз, гожтӥз, соос — идеальной кузпалъёс, угось ог-огзылы яратоно уженызы вырыны уг люкето шуыса. Со немец Баденвейлер курортын кышноезлэн киосаз ик кулӥз но, татчы со Ялта бере 1904-тӥ арын вуиз.

Азьланяз карьераез

1919-тӥ—1922-тӥ аръёсы качаловской группаын вал, юлтошъёсыныз ӵош со Россилэн лымшоретӥз гастрольёсы поталляз. Болгариын возьматонъёссы дыръя ужъёссы вольыт ӧз мынэ, соку Василий Качаловлы кин ке Книппер фамилия борды афишаосы «Чехова» приставка йылтыны ӵектӥз, та публикаез кыскиз; со дырысен Книппер-Чехова фамилия актриса борды лякиськиз. Со МХАТ-лэн Европатӥ но США-етӥ кык ар ӵоже котыръяськоназ но пыриськиз.

Родинаяз берытскыса, МХАТ-ын ужанзэ азинтӥз. Азьвыл рольёссэ быдэстэм сяна, «На дне» пьесаын Василисаез шудӥз, «Смерть Пазухинаын» — Живоедоваез, «На всякого мудреца довольно простотыын» — Турусинаез, «Провинциалкаын» — Дарья Ивановнаез, «Хозяйка гостиницыын» — Гортензиез .

Арлыдо Книппер-Чехова аслэсьтыз 30 ареслы егит драматург Николай Волковен улоно кариськиз, но ӧз бызьы ни.

1950-тӥ арын 15-тӥ южтолэзе Лев Толстойлэн романэзъя гожтэм «Воскресение» пьесаын берпуметӥ рользэ быдэстӥз. Берпуметӥ аръёссэ огназ улӥз, пумен синтэм кылиз. 1958-тӥ арын 22-тӥ коньывуонэ, 90 аресъем юбилейзэ пусйыса, сцена вылэ берпуметӥзэ потӥз.

Мускоысь Новодевичье шайвылысь гуэз

1959-тӥ арын 22-тӥ южтолэзе Ольга Книппер-Чехова Мускоын улонысь кошкиз. Кузпалыз вӧзын Новодевичье шайвылын (2 номеро участок) ватэмын.

Семьяез

• Атаез — Леонард Августович Книппер (1838—1894), Венаын вордскемын, «выжыезъя эльзас немец», мумизъя мадьяр выжыосыз. Инженер-технолог вал. 1864-тӥ арын Росси империысь Глазовысь утемысь Кокман черкогуртэ вина пӧзьтон заводэ келямын вал;
• Анаез — Анна Ивановна Книппер (вордскемезъя Зальца) (1850—1919). Камерной кырӟась но крезьгуръя дышетӥсь, Мускоысь филармонияя училищеысь профессор;
• Агаез — Константин Леонардович Книппер (1866—1924), инженер-путеец;
• Выныз — Владимир Леонардович Нардов (1876—1942), операя кырӟась но операя театрысь режиссёр, РСФСР-ысь дано артист (1933).
• Племянникъёсыз:
  • Ада Константиновна Книппер — ӟуч кылъя дышетӥсь;
  • Лев Константинович Книппер (1898—1974) — композитор, РСФСР-ысь калык артист (1974);
  • Ольга Константиновна Чехова (вордскемезъя Книппер) (1897—1980) — театрысь но киноысь ӟуч но немец актриса;
  • Владимир Владимирович Книппер (1924—1996) — журналист, мемуарист, егит театръёсын кивалтӥсь.
• Картэз (1901-тӥ арысен) — Антон Павлович Чехов (1860—1904), ӟуч писатель но драматург.

Театрын ужез

«Чехов» нылкышноослэн рольёссы

Ольга Книппер-Чехова — вань актрисаос пӧлысь нырысетӥез, кин чехов нылкышноослэсь образзэс яркыт но рос-прос возьматыны быгатӥз. Аспӧртэмлыко луэменыз, аристократ сямъёсыныз, актриса Чеховлэн вань валтӥсь пьесаосаз валтӥсь рольёсты шудӥз:

• «Чайка» (1898, Аркадина);
• «Дядя Ваня» (1899, Елена Андреевна);
• «Три сестры» (1901, Маша);
• «Иванов» (1901, Сарра);
• «Вишнёвый сад» (1904, Раневская).

Мукет рольёс

• Нерисса («Венецианский купец», У. Шекспир, 1898);
• Мирандолина («Трактирщица», К. Гольдони, 1898);
• Виола («Двенадцатая ночь», У. Шекспир, 1899);
• Анна Маар («Одинокие», Г. Гауптман, 1899);
• Майа («Когда мы, мёртвые, пробуждаемся», Г. Ибсен, 1900);
• Лель («Снегурочка», А. Н. Островский, 1900);
• Широкова («В мечтах», Вл. И. Немирович-Данченко, 1901);
• Елена Кривцова («Мещане», М. Горький, 1902);
• Настя («На дне», М. Горький, 1902);
• Лона («Столпы общества», Г. Ибсен, 1903);
• Мелания («Дети солнца», М. Горький, 1905);
• Регина («Привидения», Г. Ибсен, 1905);
• Графиня-внучка Хрюмина («Горе от ума», А. С. Грибоедов, 1906);
• Терезита («Драма жизни», К. Гамсун, 1907);
• Ребекка («Росмерсхольм», Г. Ибсен, 1908);
• Анна Андреевна («Ревизор», Н. В. Гоголь, 1908);
• Ночь («Синяя птица», М. Метерлинк, 1908);
• Наталья Петровна («Месяц в деревне», И. С. Тургенев, 1909);
• фру Юлиана Гиле («У жизни в лапах», К. Гамсун, 1911);
• Гертруда («Гамлет», У. Шекспир, 1911);
• Либанова («Где тонко, там и рвётся», И. С. Тургенев, 1912);
• Белина («Мнимый больной», Мольер, 1913);
• Варвара («Осенние скрипки», И. Д. Сургучёв, 1915).

Совето вакытэ быдэстэм рольёсыз:

• Живоедова («Смерть Пазухина» М. Е. Салтыков-Щедринлэн, 1924);
• Мамаева и Турусина («На всякого мудреца довольно простоты» А. Н. Островскийлэн, 1924);
• Хлёстова («Горе от ума» А. С. Грибоедовлэн, 1925 но 1938);
• графиня де Линьер («Сёстры Жерар» В. З. Масслэн, 1927);
• Надежда Львовна («Бронепоезд 14-69» Вс. В. Ивановлэн, 1927);
• Мария Александровна Москалёва («Дядюшкин сон» Ф. М. Достоевскийлэн произведениезъя, 1929);
• графиня Чарская («Воскресение» Л. Н. Толстойлэн произведениезъя, 1930);
• Полина Бардина («Враги» М. Горькийлэн, 1935);
• графиня Вронская («Анна Каренина» Л. Н. Толстойлэн произведениезъя, 1937);
• госпожа Пернель («Тартюф» Мольерлэн, 1940);
• Забелина («Кремлёвские куранты» Н. Ф. Погодинлэн, 1943);
• миссис Маркби («Идеальный муж» О. Уайльдлэн, 1945).

Фильмография

Рольёс

• 1927 — Солистка его величества — Зубовлэн мумиз;
• 1928 — Пленники моря — Иван Лерлэн кузпалыз;
• 1930 — Завтра ночью — Сергейлэн мумиз.

Фильмъёсы пыриськемез

• 1946 — Мастера сцены (документальной);
• 1958 — Искусство большой правды (документальной).

Архив кадръёс

• 1975 — О нашем театре (документальной);
• 2004 — Смерть Таирова;
• 2010 — Доктор Чехов. Рецепт бессмертия (документальной).

Данъетъёсыз но дано нимъёсыз

Кун данъетъёс:

Дано нимъёс но премиос:

• Республикаысь дано артист (1923);
• Республикаысь калык артист (1928);
• СССР-ысь калык артистка (1937);
• Сталинлэн нырысетӥ степенё премиез (1943) — уно аръёс ӵоже быгатыса тыршемез понна.

Орденъёс но медальёс:

• Ленин нимо кык орден (1938, 26.10.1948);
• Ужысь Горд Знамя нимо кык орден (03.05.1937, 1945);
• «Мусколы 800 ар» нимо медаль;
• «За доблестный труд в Великой Отечественной войне 1941—1945 гг.» медаль.

Буре ваён

ЦТ-лэн архивъёсаз МХАТ-лы 50 ар юбилей ужрадысь съёмкаосысь гожтэмъёс утиськемын, отын Иван Козловский но Сергей Лемешев «Евгений Онегин» операысь «Я люблю вас, Ольга» ариез дуэтэн быдэсто, театрез кылдытӥсьёс пӧлысь та юбилеёзь огназ улэп кылем Ольга Книппер-Чеховалы сӥзьыса, сое выльдо-ватсало.

Гурзуфысь музейын экспозиция, борддорын — дача кузёлэн портретэз

Крымысь литературая но художествоя мемориал музей-заповедниклэн котькуд ёзаз — А. П. Чеховлэн музей-юртэз (Ялта) (Белая дача), Омюр дачаысь «Чехов но Крым» музейын — О. Л. Книппер-Чеховалы сӥзем экспозициос вань, но тужгес бадӟым саклык висъямын солы А. П. Чеховлэн но О. Л. Книпперлэн Гурзуфысь дачаяз (Гурзуф, Чеховлэн ульчаез, 22-тӥ юрт). Чехов кулэм бере, дачалы кузё луыса, юртъерлы революция бере но правооссэ утиз, татчы 1953-тӥ арын берпуметӥзэ вуылӥз.

Глазовысь шаертодонъя музейын солы сӥзем нимысьтыз адӟытонэн зал ужа.

Валэктонъёс

Литература

• Ольга Леонардовна Книппер-Чехова. Воспоминания и статьи. Переписка с А. П. Чеховым (1902 – 1904) / В. Я. Виленкин. — М.: Искусство, 1972. — 448 с.
• Ольга Леонардовна Книппер-Чехова. Воспоминания и статьи. Переписка с А. П. Чеховым (1902 – 1904) / В. Я. Виленкин. — М.: Искусство, 1972. — 432 с.
• Книппер-Чехова О. Л. Артисты Московского художественного театра за рубежом. — Прага: Наша речь, 1922. — С. 23—32.
• Волков Н. Д. Театральные вечера. — М.: Искусство, 1966. — С. 151—153.
• Марков П. А. Выступление на вечере, посвященном 90-летию О. Л. Книппер-Чеховой. — М.: Искусство, 1976. — С. 495—497.
• Марков П. А. Книппер-Чехова. — М.: Искусство, 1974. — С. 373—380.
• Мнемозина. Документы и факты из истории отечественного театра XX века / В. В. Иванов. — М.: Индрик, 2014. — 880 с. — ISBN 978-5-91674-321-0.
• Книппер-Чехова Ольга Леонардовна, Чехова Мария Павловна. О. Л. Книппер — М. П. Чехова. Переписка. Том 2. — Новое литературное обозрение, 2016. — 978−5−4448−0586−2 экз.

Чӧлсконъёс

• Ольга Книппер-Чехова [ӟуч]

• Некролог на смерть О. Л. Книпер-Чеховой с её фотографией [ӟуч]

• Ольга Леонардовна Книппер-Чехова [ӟуч]