И. Ф. Ведерников купечлэн юртъерез
| И. Ф. Ведерников купечлэн юртъерез | |
|---|---|
 | |
| Юрт сярысь ивортон | |
| Интыяськемез | Каракулино |
| Кун | |
 |
|
Илларио́н Фо́тиевич Веде́рников купечлэн юртъерез (ӟуч: Усадьба купца И. Ф. Ведерникова) — Удмуртиысь Каракулино черкогуртысь XIX даурысь архитектурая синпелет. Кык пуктэм юртлэсь ӝутэмын.
Историез
Каракулиноысь Илларион Ведерников купечлэн усадьбаяз кык улоно юрт, котыртэм но капка пыро. Азьвыл ӝутэм пуктӥськемъёс пӧлы улыно-вылыно кирпич юрт но капкаос пыртэмын. Соос 1899-тӥ арын лэсьтэмын вал[1]. 1917-тӥ арын вӧзаз одӥг этажъем пу корка пуктыны ӧдъязы: одӥг ивортонъёсъя, ты висёнъёсын курадӟись нылызлы, мукет ивортонъёсъя, Пётр пиезлы. Та коркалэн вылтусыз, XIX даурлэн пумысьтыз Сарапул уездысь тросэз улон юртъёс сямен ик, пужыятыса-вӧлыса лэсьтэмын вал[2]. Пулэсь пуктӥськемъёс кылдэм бере Ведерниковлэн юртъерез котыр ласянь кенерамын вал[3].
Революция бере усадьбаез национализация улсын кунлы сётӥзы. Кык этажъем коркан ВЛКСМ-лэн ёрос комитетэз интыяськиз, пулэсяз — ВКП(б)-лэн райкомез. Беретаз из юртэ «Прикамская правда» ёрос газет выжиз, отӥяз со Нылпи творчествоя юртлы сётэмын вал. Пулэсь юртэ партийной огазеяськон бере крезьгуро школа пыриз, нош 1991-тӥ арын отын Каракулино ёрослэн историезъя музей усьтэмын вал. 2016-тӥ арын Ведерниковлэн кык этажъем юртэз «И. Ф. Ведерников купечлэн усадьбаез» огъя музей комплекс кылдытон вылысь музейлы сётэмын вал[4][5].
1994-тӥ арын юртъерлэн азбараз мрамор пул кылдӥз. Сое Котово гуртысь Ведерников купечлэн гу вылысьтыз шедьтӥзы но Каракулиное вуттӥзы[5].
2022-тӥ арын Удмурт Элькунысь Лулчеберет удысысь кунэн утёно объектъёсъя агентство Ведерников купечлэсь юртъерзэ Росси Федерациысь калыкъёслэн лулчеберетысь вашкала утёно объектъёсызъя элькун инлыкен утёно синпелетэз сямен огъя кун реестре пыртӥз[4][5][6].
Архитектураез
Пулэсь корка — укмыс сэрго — лымшор ымнырыныз ульча шоры учке. Валтӥсь васадаз — ньыль укноез. Вань укноосыз ӝужытэ интыямын. Юртлэн липетэз стропилаосын юнматэмын, тимпанъёсыз пулъёсын шобыртэмын. Корка сиглэн шораз ӟуч тусо бадӟым укно вандэмын[3].
Улыно-вылыно кирпич из планировкаезъя но вылтусызъя Алабгоысь Иван Шишкин суредасьлэн усадьбаезлы укша, соин ик куд-ог экспертъёс лыдъяло, Ведерников юртъерзэ солэсь адӟем карыса пуктӥз шуыса. Куинь осен валтӥсь фасадэз музъем валлин кирпичен чеберъямын. Нырысетӥ этажысь лавкалэн паськыт ӧсэз шорын ик ӵошкыт мычиськем люкетэз вань, кыкна палласянь укноос юнматэмын. Кыкетӥ этажысь укноос пужыё лэсьтэм ӝыныё наличникъёсы котыртэмын. Векчи кирпичлэсь чеберъям юрт аспӧртэм адӟиське[2][3].
Куинь пролётлэсь арка выллем лэсьтэм капкаос лымшор но шундыӝужан палась корка сэрег борды юнматэмын, соос ульча ласянь фасадэз азинто[3].
Валэктонъёс
- ↑ Усадьба купца Иллариона Фотиевича Ведерникова [ӟуч], visitudmurtia.org. Эскеремын: 16 гудырикошконэ 2025 арын.
- ↑ 1 2 Анжела Поздеева. Путешествие по Удмуртии: самая южная точка и родники со «святой» и «мертвой» водой в Каракулинском районе [ӟуч], udmpravda.ru. Эскеремын: 16 гудырикошконэ 2025 арын.
- ↑ 1 2 3 4 Усадьба купца Ведерникова [ӟуч], tehne.com. Эскеремын: 16 гудырикошконэ 2025 арын.
- ↑ 1 2 Усадьба купца Иллариона Фотиевича Ведерникова [ӟуч], karakulinskij-r18.gosweb.gosuslugi.ru. Эскеремын: 16 гудырикошконэ 2025 арын.
- ↑ 1 2 3 Дмитрий Стрелков. Старинную усадьбу в Каракулино внесли в реестр объектов культурного наследия [ӟуч], susanin.news. Эскеремын: 16 гудырикошконэ 2025 арын.
- ↑ Усадьбу купца Иллариона Ведерникова в Каракулино внесли в реестр объектов культурного наследия [ӟуч], kommersant.ru. Эскеремын: 16 гудырикошконэ 2025 арын.