Удмурт Элькунысь педагогикая колледж
| Удмурт Элькунысь педагогикая колледж | |
|---|---|
 | |
 | |
| Кылдон арез | 1921 но 1980 |
| Пытсам арез | 1956 |
| Директорез | Кожина Лилия Анатольевна |
| Сайтэз | ciur.ru/urspk/default.as… |
 |
|
Удмурт Элькунысь педагогикая колледж (вакч. УРСПК; ӟуч: Удмуртский республиканский социально-педагогический колледж) — Удмурт Элькунысь шоро-куспо дышетон ужъюрт. Нылпи садъёслы визьнодасьёсты, покчи школаослы дышетӥсьёсты но ватсаса тодон-валан сётонъя но физкультурая ӧнерчиосты дася.
Историез
1921-тӥ арын Ижкарын усьтӥськиз Ижысь педагогикая вотской техникум, 1922-тӥ арын — Ижысь педагогикая ӟуч техникум. 1934-тӥ арын та кык техникумъёсты огазеязы но Ижысь педагогикая техникум кылдытӥзы. 1937-тӥ арысен нимзэ воштӥзы, со Ижысь школа педагогикая техникум луиз, нимысьтыз пуктэм юртын интыяськылӥз[1].
1938-тӥ арын Ижын эшшо одӥг педагогикая суз усьтӥськиз — Ижысь школа азьын визьнодан педагогикая училище[1].
1941-тӥ арын Ижысь школа азьын визьнодан педагогикая училище луиз педагогикая училище, сое Ижысь Якшур-Бӧдьяе выжтӥзы, юртсэ Ленинградысь эвакуировать карем артиллерияя училище понна бушатӥзы. 1943-тӥ арын педучилище Якшур-Бӧдьяысь Иже выльысь выжиз[2].
1956-тӥ арын кыксэ но иж педучилищеосты быдтӥзы.
1980-тӥ арын гинэ покчи классъёслы дышетӥсьёсты но нылпи садъёслы визьнодасьёсты дасянъя выль педучилище кылдӥз. Солы нимысьтыз юрт пуктӥзы. Дышетон ужъюртлы нырысетӥ директоре юнматэмын вал Владимир Баранов — калыкез югдытон удысысь отличник, УР-ысь калыкез дышетон удысысь дано ужась. Со 1996-тӥ арозь кивалтӥз[3].
1982-тӥ арын гужем училищеысь потӥзы покчи классъёсты нырысетӥ дышетӥсьёс, ваньмыз — 84 мурт, нош 1983-тӥ арын 56 кузя нырысетӥ воспитательёс диплом басьтӥзы[3].
1999-тӥ арын педучилищелэсь нимзэ Ижысь педагогикая колледж каризы, 2014-тӥ арын — БПОУ УР «Удмурт Элькунысь социально-педагогической колледж»[4].
2021-тӥ арын ивортонъёсъя, суз дышетон удыслы 10 сюрслэсь трос ӧнерчиосты дасяз[4]. 2024-тӥ арын ивортонъёсъя, УРСПК-ысь 80 % дышетӥсьёслэн вылӥ квалификацияя категоризы вань.
2020-тӥ арын Удмурт Элькунысь педагогикая колледж «Дышетон» нацпроектъя 13,55 млн манет тыр грант утӥз[4]. Коньдон таӵе мастерскойёсты кылдытыны но соосты тӥрлыкен узырмытыны кутӥськиз: «Школа азьын визьнодан», «Покчи классъёсты дышетон», «Мерлыко (ӟуч: социальной) уж», «Мугорез кыдатон культура, спорт но фитнес». Мастерскойёс WorldSkills Russia стандартъя аккредитация пыр потӥзы. Грантлы луыса колледж юртысь озьы ик воштэмын канализация, ву гумыос, тыл, укноос но выж, басьтэмын туала тӥрлык[5].
Удмурт Элькунысь педагогикая колледжын «Педагогикая колледжысь дышетӥсьёслэсь но студентъёслэсь эскерон культуразэс кылдытон условиос» темая элькунысь эксперимент площадка ужа[6].
Дасян ӧръёс
2024-тӥ арын куарусёнэ ивортонъёсъя, УРСПК техникум таӵе удысъёсъя ӧнерчиосты дася:
9-тӥ класс бере
- Мерлыко уж;
- Школа азьын визьнодан;
- Покчи классъёсты дышетон;
- Ватсаса тодон-валан сётонъя педагогика (ИЗО);
- Ватсаса тодон-валан сётонъя педагогика (робототехника);
- Мугорез кыдатон культура.
11-тӥ класс бере
- Школа азьын визьнодан[7].
Кивалтӥсьёс
- В. П. Баранов (1980—1996);
- Г. А. Исаева (1997—2013);
- Л. А. Кожина (2013-тӥ арысен)[4].
Данъетъёсыз
- «Ижкар — сяськаясь кар» конкурслэн лауреатэз (2001-тӥ арысен арлы быдэ);
- «Могӟетъёстэк дышетон — 2009» адӟытонлэн элькун этапезлэн лауреатэз но калыккуспо этапаз пыриськем колледж (Муско, 2009);
- «Россиысь 100 устоосыз ССУЗъёс» конкурслэн лауреатэз (2010)[3].
Валэктонъёс
- ↑ 1 2 Ижевское педагогическое училище [ӟуч] Фондовый каталог УР. Эскеремын 23-10-2025 арын
- ↑ В. В. Поздеева, М. И. Юдина Подготовка учителей в Удмуртской Республике в 20—50 годы [ӟуч] Архивная служба Удмуртской Республики. Эскеремын 23-10-2025 арын
- ↑ 1 2 3 Листая страницы истории колледжа [ӟуч] ciur.ru. Эскеремын 23-10-2025 арын
- ↑ 1 2 3 4 Лилия Кожина (11-08-2021) Удмуртский социально-педагогический колледж: по восходящей линии успеха [ӟуч] Деловая Репутация. Эскеремын 23-10-2025 арын
- ↑ Анастасия Дворская (19-10-2021) Более 13,5 млн рублей направили за создание новых мастерских в педколледже Ижевска [ӟуч] Удмуртская правда. Эскеремын 23-10-2025 арын
- ↑ Башинова С. Н. (25-03-2024) Профориентационная встреча с выпускниками БПОУ Удмуртской Республики «Удмуртский республиканский социально-педагогический колледж» [ӟуч] kpfu.ru. Эскеремын 23-10-2025 арын
- ↑ Перечень специальностей на 2024-2025 учебный год [ӟуч] БПОУ УР «Удмуртский республиканский социально-педагогический колледж». Эскеремын 23-10-2025 арын
Чӧлсконъёс
 |
|---|
