Анайлэн нуналэз Россиын
| Анайлэн нуналэз Россиын Анайлэн нуналыз Россиын | |
|---|---|
 | |
| Пусъё | шуркынмонлэн берпум арнянуналаз |
Анайлэн нуналэз Россиын — шуркынмонлэн берпуметӥ арнянуналаз пусйиськись праздник (Россилэн азьмуртэзлэн 1998-тӥ арын 30-тӥ толшоре поттэм 120 номеро «Анайлэн нуналэз сярысь» косэтэзъя). Та нуналэ дышем сямъя вань анайёсты но песянайёсты ӟечкылало, нимысьтыз саклык висъяло нылпи будэтонын вормонъёс басьтэм нылкышноослы, трос нылпиё анайёслы но оген кылем анайёслы[1].
Историез
Нырысьсэ таӵе нимын ужрад ортчиз 1988-тӥ арын 30-тӥ коньывуонэ Баку карысь огаз школаын. Праздникез радъяз ӟуч кылъя но литературая дышетӥсь Эльмира Гусейнова. Солэн тыршеменыз анайлыклы сӥзем шулдыр концерт ортчиз. Соку ик школаын дышетскисьёслы вазиськизы, та нуналэз арлы быдэ праздник сямен пусйыны ӵектыса, но данъяны анайёсты гинэ, 8-тӥ южтолэзе сямен, вань нылкышноосты ӧвӧл. Вазиськонзылэн текстэз тросаз газетъёсын печатламын вал. Нош Эльмира Гусейновалэн праздниклы сценариез кӧня ке ар ортчыса – 1992-тӥ арын – «Образование школьников» журналын потӥз[2][3][4].
Тодметэз
Россиын Анайлэн нуналызлэн тодметэз – дыдыксин (ӟуч: незабудка). Калыкын веран вань, та сяська оскымонлыкез но сюлмысь яратонэз возьматэ шуыса — сое, мар тужгес но герӟаськемын анайлэн образэныз[4].
Кызьы пусйиське
Анайлэн нуналаз но праздник азьын быдэс Россиын пӧртэм тематической ужрадъёс радъясько: концертъёс, адӟытонъёс. Нимысьтыз акциос ортчо школаосын но нылпи садъёсын. Со сяна, кунамы Анай нуналлы сӥзем «Анай, мон тонэ яратӥсько!» мерлыко акция ялӥське. Со улсын праздник азьын арня ӵоже анайёслы открыткаос кузьмало но мукет ужрадъёс ортчыто[1].
2022-тӥ арын гудырикошконэ Россилэн азьмуртэз Владимир Путин «Анай-героиня» ним юнматӥз. Со сётӥське 10 но солэсь трос нылпи вордэм но будэтэм нылкышноослы. Со нимын пусъем кышномуртлы одӥг пол миллион манет тыриське[4][5].
СССР-ын но анайёс понна нимысьтыз данъетъёс вал. «Анайлык» медален пусйизы 5 яке 6 нылпи вордэм но будэтэм нылкышноосыз. 7, 8 яке 9 нылпи будэтэм анайёслы «Анай дан» орден сётъязы. Нош 10 но солэсь трос нылпи будэтэм нылкышноосты орденэн но «Анай героиня» нимын пусйылӥзы[6].
Чӧлсконъёс
- ↑ 1 2 День матери: история и традиции празднования в разных странах РИА Новости. Эскеремын 2023-08-28 арын
- ↑ День матери: как появился праздник и где его принято отмечать Рамблер. Эскеремын 2023-08-28 арын
- ↑ День матери - краткая история праздника istmira.com. Эскеремын 2023-08-28 арын
- ↑ 1 2 3 Владислав Шанин День матери в России: История и традиции праздника rg.ru. Эскеремын 2023-08-28 арын
- ↑ Путин подписал указ об учреждении звания «Мать-героиня» ТАСС. Эскеремын 2023-08-28 арын
- ↑ День матери 2023 в России и мире: история и традиции праздника [ӟуч] kp.ru. Эскеремын 2023-08-28 арын