Сьӧд удмуртарня (дунтэм вузкарон)
| Сьӧд Удмуртарня | |
|---|---|
.jpg) Сан-Паулуын телевизоръёсын дунтэм вузкарон | |
| Мукет сямен | Black Friday |
| Валатонэз | Со нуналысен кутске Толсурлы сӥзем дунтэм вузкарон |
| Юнматэмын | XIX даур |
| Пусъё |
 США |
| Дырыз | Шуркынмонлэн ньылетӥ покчиарняез бере вуись удмуртарня (Таукарон нунал бере) |
| Пусъён ужрадъёс | Вузкаронниос вазь усьтӥсько, кассаос дорын бадӟым черодъёс кылдыло |
| Сям-йылолъёс | Нимаз но онлайн вузкаронниосын бадӟым дун кулэстонъёс (90%-тозь) |
 Медиафайлъёс РувикиМедиа пушкын | |
Сьӧд удмуртарня (ӟуч: Чёрная пятница, англ. Black Friday) — США-ын Таукарон нунал бере вуисез удмуртарня. Со нуналысен кутске Толсурлы сӥзем дунтэм вузкарон. Та сям улонэ пыӵатэмын вал XIX дауре, ачиз нимыз «чёрная пятница» кылдӥз 1966-тӥ арын, нырысь-валысь США-лэн Шундыӝужанпал ярдураз гинэ кутӥськылӥз. Таукарон нуналлэн шуркынмон толэзьлэн ньылетӥ покчиарняезлы тупамен, Сьӧд удмуртарня 23-тӥ шуркынмонысен 29-тӥ шуркынмонозь кыстӥське[1].
Сьӧд удмуртарня официально юнматэм праздникен уг ке но лыдъяськы, тросэз ужасьёс та нуналъёсы ужъёсысьтызы куриськыса, шутэтскон нунал басьто. Нош вузкарон удысын тыршисьёслэн та вакытэ кысык дырзы кутске. Со нуналэ вузкаронниос туж вазь ужаны кутско — 5 час ӵукнаысен, куд-ог бадӟым вузкарон вотэсъёс ― уйшоре ик. Вузкаронниосы тросгес калыкез кыскон понна, нырысетӥ басьяськисьёслы бадӟым дун кулэсмытон дэмлало — 50%-ысен кутскыса, 80 %-тозь.
«Чёрная пятница» термин нырысьсэ Филадельфиын кылдӥз но Таукарон нунал бере сюресъёс вылын кылдэм пробкаос шуэмез возьматъяз[2][3]. Терминлэн туала валатонэз англи кылын «in the black» — «положительной баланс» идиомаен герӟаськемын (солы пумит «in the red»). Со веран та нуналэ вузкарисьёслэн «табышсы уноялоз» шуэмез возьматэ[4].
2000-тӥ аръёсысен кутскыса, куд-ог компаниос со выллем дун кулэсмытонъёс дуннелэн мукет кунъёсаз но ортчытъяло, Россиын — 2010-тӥ арысен [5].
Толсур дун кулэсмытонлэн «атаез»
Толсур азьын дун кулэсмытон сямез кылдытӥз Фрэнк Вулворт (англ. Franklin Woolworth). Со 1873-тӥ арын Ланкастер карын (Пенсильвания штат) нырысьсэ дунъёсты кулэсмытыса вузкарон радъяз. Вулворт ачиз гуртын крестьян семьяын будэмын, озьы ке но, секыт ужез ӧз яратылы. Дышетскыны солэн луонлыкез ӧй вал, ортчыт вылӥ быгатонлыкъёсыныз ӧз висъяськылы. Соин атаез 21 аресъем пизэ огаз вузъюртэ вузкарисьлы юрттӥсе уже интыяз[6]. Со вакытэ вузкарисьёс асьсэос вузъёслы дун юнматылӥзы: басьяськисьёслэсь луонлыкъёссэс лыдэ басьтыса, вузъёссэс дэмлаллязы. Вулворт сокем ӟеч ик ӧз ужа, трос пол уллянэн кышкатъязы. Соку со кескич амал малпаз. Прилавок вылэ вань сезонной вузъёссэ поттылыса, «Котькудӥз 5 цент тыр вузаське» шуыса ялӥз. США-ын со нырысетӥез дун кулэсмытон учыр лыдъяське. Вулвортлэн одӥг ужан нунал куспын поттэм табышез азьвыл куать нунал ӵоже ужаса поттэм табышез мында люкаськиз . Та учыр бере со аслэсьтыз лавказэ усьтыны малпаз. Вань вузъёссэ со юнматэм дунъёсъя вузалляз, но ялан дун кулэсмытонъёс радъялляз. Озьы кылдӥз XX даурысь тужгес бадӟым нимаз вузкарон вотэсъёс пӧлысь одӥгез[7].
США-ысь дунтэм вузкаронъёс (статистика)
США-ысь Нимаз вузкаронъя йӧскалык фелерация ялан печатлалля Таукарон нуналэ вузкарон сярысь тодэтъёсты[8]. Берло аръёсы басьяськисьёслэн огъя лыдзы та нуналэ 200 миллионлэсь ятыр луэ; шорлыкоез чек — 400 доллар котыр.
Статистикалэн тодэтъёсызъя, США-ысь быдэсак нимаз вузкаронлэн 20 %-эз сьӧд удмуртарня но Толсур вискын ортче .
Сьӧд удмуртарня Китайын
Китайын вань асьсэлэн кулэсмытэм дунъёсын вузаськон нуналзы. Со арлы быдэ 11-тӥ шуркынмонэ но со котыр нуналъёсы ортче.
Китайын со нырысьсэ ортчытэмын вал 2009-тӥ арын, Alibaba Group компанилэн кичӧлтэмезъя. Со аслэсьтыз «сьӧд удмуртарнязэ» Огназы улӥсь воргоронъёслэн нуналазы ортчытыны мылкыд кариз.
Сьӧд удмуртарня Россиын
Нырысьсэ Россиын «чёрная пятница» нимын кулэсмытэм дунъёсын вузкаронъёс ортчизы 2013-тӥ арын 6-тӥ толсуре, быдэс дуннеен ӵошатыса, одӥг арнялы бергес. 2014-тӥ арысен кутскыса, Россиын дунтэм вузкаронъёс дуннеысь кунъёсын огвакытгес ортчыло, покчиарняе 19:00 часысен кутскыса, арнянуналозь[9]. Сьӧд удмуртарня шуркынмонэ ортче ке но, куд-ог вузкарисьёс со терминэз кутыса, дунтэм вузкарон нуналъёссэс быдэс ар ӵоже радъялляло. Сьӧд удмуртарняысен кутске выль арлы сӥзем дунтэм вузаськон вакыт[10]
2018-тӥ арын сьӧд удмуртарняе кулэсмытэм дунъёсын онлайн амалэн вузкаронлэн табышез 15 млрд манетлэсь ятыр луиз, кылем арен ӵошатыса,со лыдпус кык поллы тросгэс[11]. 2019-тӥ арын со 22,3 млрд манет тыр люкаськиз[12].
«Black Friday» вузкарон пус сярысь Россиын эчешонъёс
2016-тӥ арын «Блэк Фрайдэй» ООО-лэн росси компани «Black Friday» вузкарон пусэз ас вылаз регистрировать кариз[13]. Озьы, онлайн амалэн кулэсмытэм дунъёсын вузкаронын кутӥськись «Black Friday» нимез компания быдэсак киултӥз, шуыны луоз.
2017-тӥ арын Атимонопольной федерал служба Интернет-вузкаронъя компаниослэсь ассоциацизылэсь вазиськонзэ эскеремез бере (ог 30 ретейлеръёсты огазея, соос пӧлын «М.Видео», Media Markt и KupiVip), «Блэк Фрайдэй» ООО-лэсь «Black Friday» пусэз басьтэмзэ но сое кутэмзэ «шонерлыктэм конкуренциен» лыдъяз[14][15].
2018-тӥ арын Визьбур эрикрадъёсъя суд Антимонопольной федерал службалэсь решенизэ шонерен лыдъяз[16].
Валэктонъёс
- ↑ Черная пятница (Black Friday) 2020 в Фокстроте - распродажа, скидки, акции на Блекфрайдей в Киеве и Украине [ӟуч] Эскеремын 2020-11-21 арын
- ↑ [1966 «Black Friday» (day after Thanksgiving)] [англи] American Dialect Society. Эскеремын 2012-11-19 арын
- ↑ Ben Zimmer The Origins of "Black Friday" [англи] Thinkmap Visual Thesaurus. Эскеремын 2012-11-19 арын
- ↑ Zimmer, Ben The Origins of "Black Friday" (англ.) Word Routes.
- ↑ Почему «черная пятница» не работает в России и ждать ли улучшений — Мнение управляющего директора Criteo Архивная копия от 7 шуркынмонэ 2016 на Wayback Machine // vc.ru, 4 ноября 2016
- ↑ История Черной пятницы. Почему ее так любят американцы?, Habr (18 шуркынмонэ 2016). Эскеремын: 14 шуркынмонэ 2024 арын.
- ↑ Почему «Черную пятницу» называют черной, откуда берутся огромные скидки и причем тут два американских президента, Культурология. Эскеремын: 14 шуркынмонэ 2024 арын.
- ↑ Black Friday Weekend Shines as Shoppers Line up for Deals Эскеремын 2011-11-30 арын
- ↑ "Черная пятница" вышла за рамки // Коммерсантъ. — 2014-01-12. Архивировано 19 толсуре 2018 арын.
- ↑ Черная пятница-2024: когда будет, что выгодно покупать, советы экспертов, РИА Новости (19.11.2024). Эскеремын: 5 толсуре 2024 арын.
- ↑ Онлайн-продажи в России во время "Черной пятницы" выросли в два раза ТАСС. Эскеремын 2018-12-19 арын
- ↑ Россияне за три дня черной пятницы потратили в интернет-магазинах 22,3 млрд рублей - Hi-Tech Mail.ru
- ↑ Товарный знак "Black Friday" в реестре товарных знаков Роспатента new.fips.ru. Эскеремын 2019-12-16 арын
- ↑ Исключительное использование бренда Black Friday признали незаконным РБК. Эскеремын 2019-12-16 арын
- ↑ Ритейлеры отстояли «черную пятницу» [ӟуч] Ведомости. Эскеремын 2019-12-16 арын
- ↑ Карточка дела № СИП-491/2017 в системе "Мой арбитр" kad.arbitr.ru. Эскеремын 2019-12-16 арын