Россиысь калыкъёслэн кылъёссылы сӥзем нунал
| Россиысь калыкъёслэн кылъёссылы сӥзем нунал | |
|---|---|
 | |
| Дырыз | 8-тӥ куарусёнэ |
Россиысь калыкъёслэн кылъёссылы сӥзем нунал (ӟуч: День языков народов России) — выль праздник нунал. Сое кылдытыны ӵектӥз Росси Федерацилэн президентэз Владимир Путин 2025-тӥ арын 5-тӥ инвожое Ӟуч кыллы но Россиысь калыкъёслэсь кылъёссэс азинтон кун политикаез быдэстонъя кенешлэн заседанияз[1]. Со нуналэз пусйыны ӵектэмын 8-тӥ куарусёнэ — кылбурчилэн Расул Гамзатовлэн вордӥськем нуналаз[2].
Та аре ик Россиысь Президентлэн 4-тӥ шуркынмонэ 799 номеро указэныз Росси Федерациысь ичи лыдъем выжы калыкъёслэн нуналзы юнматэмын, со пусйиське 30-тӥ оштолэзе[3].
Россиысь Тодосъёсъя академилэн Языкознания институтэзлэн тодэтъёсызъя, Россиын 277 кыл но вераськет кутӥське[4].
Историез
2025-тӥ арын 5-тӥ инвожое Ӟуч кыллы но Россиысь калыкъёслэн кылъёссылы юрттэт сётон удысын кун политикаез быдэстонъя кенешлэн заседанияз Россиысь калыкъёслэн кылъёссылы сӥзем нунал кылдытыны дэмламын вал[1]. Владимир Путин сое кылбурчилэн Расул Гамзатовлэн вордӥськем нуналаз — 8-тӥ куарусёнэ пусйылыны ӵектӥз[2].
Кылъёсъя кун политикалэн быдэсмемезъя Советлэн кенешаз президент асэстэм кылъёсты вераськонын мултэс кутон пумысен тазьы вераз:
…асэстэм кунгожсьӧр кылъёслэсь калленэн куштӥськыны кулэ, соос асьмелэсь кылмес уг узырмыто, солы пумит, сурало-пожало гинэ.
Со дыре ик Владимир Путин Росси Федерациысь калыкъёслэсь кылъёссэс утёнлэн но азинтонлэн, соослы кун ласянь радлыко юрттэт сётонлэн но элькунысь огъя кыл вӧлметэз утёнлэн кулэлыкез сярысь тодэ вайытӥз[1]. Озьы ик президент Росси Федерациысь калыкъёслэн кылъёссы сярысь катэз выльдон борды кутскыны но Россиысь вань кылъёсъя кун реестр кылдытыны кулэ шуыса вераз[1].
Статистика
- Россиысь Тодосъёсъя академилэн Языкознания институтэзлэн тодэтъёсызъя, Россиын улӥсь 193 пумо калык вераськоназ 277 кылэз но вераськетэз кутэ[4].
- Кылъёслэн лыдзы калыкъёслэсь тросгес луэ, малы ке шуоно, куд-огезлэн официально юнматэм кылъёсыз кык, кылсярысь, поръёслэн, мордваослэн но алтай калыклэн[4].
- Россиысь дышетон системаын 105 кыл кутӥське, со пӧлысь 24-ез — дышетон кыл чотын, нош 81-ез — дышетон предмет сямен[4].
Та нуналлы сӥзьыса
Россиысь калыкъёслэн кылъёссылы сӥзем нуналзылы сӥзьыса, Яндекс аслаз технологиосыз пӧлы, нейросеть амалэз кутыса, удмурт кылэз тодман-валан технологиез ватсаз. Удмурт кыл мукет финн-угор кылъёс пӧлын нырысетӥез но Россиысь вань кылъёс пӧлын ньылетӥез луиз, кудӥз таӵе луонлыкез кутыны быгатэ. Удмурт кылэз тодман технология Россиысь калыкъёслэсь кылъёссэс утёнъя проект улсын быдэстэмын. Со проектэз быдэстон бордын валчеяськыса тыршо: Йӧскалык ужпумъёсъя федерал агентство, Россиысь калыкъёслэн юртыД но улосъёсысь кылъя институтъёс. Удмуртиын проетклэн партнёрез луиз Россиысь наукаосъя академилэн Урал ёзысьтыз Историяя, кылъя но литературая Удмурт институт[5].
Валэктонъёс
- ↑ 1 2 3 4 Заседание Совета по реализации госполитики в сфере поддержки русского языка и языков народов России, Президент России (05.06.2025). Эскеремын: 5 инвожое 2025 арын.
- ↑ 1 2 Путин предложил учредить День языков народов России, РБК (05.06.2025). Эскеремын: 5 инвожое 2025 арын.
- ↑ В России появился новый праздник [ӟуч] РИА Новости. Эскеремын 03-03-2026 арын
- ↑ 1 2 3 4 277 языков и диалектов используют народы России [ӟуч] Минобрнауки (21.02.2021). Эскеремын 08.09.2025 арын
- ↑ Сервисы Яндекса заговорили по-удмуртски [ӟуч] udm-info (8.09.2025). Эскеремын 11 куарусёнэ 2025 арын