Россиын донорлэн нуналыз
| Донорлэн йӧскалык нуналыз | |
|---|---|
 | |
| Юнматэмын | 2007-тӥ арын 20-тӥ тулыспалысен |
| Пусъё |
 Россия |
| Дырыз | 20-тӥ оштолэзе |
| Пусъён ужрадъёс | арлы быдэ |
| Сям-йылолъёс | данъян ужрадъёс, конференциос |
| Герӟаськемын | Росси империын гемотрансфузилэн нырысьсэ азинлыко ортчеменыз |
Донорлэн йӧскалык нуналыз (ӟуч: Национа́льный де́нь до́нора в Росси́и) — Россиын арлы быдэ 20-тӥ оштолэзе пусйиськись нунал. Ужан кодексъя шутэтскон нуналэн уг лыдъяськы. Сӥземын Росси империын гемотрансфузиез азинлыко ортчытонлы. Нырысьсэ сыӵе процедура ортчытэмын вал 1832-тӥ арын 20-тӥ оштолэзе.
Историез
1832-тӥ арын 20-тӥ оштолэзе Петербургысь акушер Андрей Вольф, Джеймс Бланделлэсь аппаратсэ но методиказэ ужаз кутыса, пиям кышномуртлы нырысьсэ мукет муртлэсь вирзэ лэзиз, процедура азинлыко ортчиз[1]. Солэсь азьпал (1818-тӥ арын 25-тӥ куарусёнэ) Бланделл трансфузиез Лондонын азинлыко ортчытӥз вал[2]. Собере Вольф вир воштон процедураез эшшо куать пол ортчытъяз на. Солэсь ужзэ азьланьтӥз ӟуч эмчи, хирургияя профессор Сергей Коломнин.
2007-тӥ арын 20-тӥ тулыспалэ Росси Федерациысь Кун дума донорстволы сӥзем кенешоназ Донорлэсь йӧскалык нуналзэ юнматӥз[3]. Россиысь Тазалыкез утёнъя министерство но Россиысь Медико-биологической федерал агентство 2008-тӥ арысен ас мылкыдзыя вир сётон программаез улонэ пыӵато. 2024-тӥ арез басьтыса, Вир сётонъя службае 487 огазеяськон но 100 сюрс пала вылӥ ӧнерлыко эмчи пыре[4].
Пусъён сямъёс
Донорлэн йӧскалык нуналаз Россиын эм удысын ужасьёсын пресс-конференциос, тематической адӟытонъёс, конференциос ортчыло. Медициная центръёс но станциос вир сётонъя пӧртэм акциос радъяло[5]. Асьсэлэсь вирзэс но вирлэсь кылдытосъёссэ 40 пол но плазмазэс 60 пол сётэм муртъёс Россиын дано доноръёс шуыса лыдъясько. Гадьпусэн пусъем сяна, дано доноръёс мерлыко транспортын дунтэк ветлыны быгато[6].
Ватсам ивортодэт
- 2005-тӥ арын юнматэмын Донорлэн дунневыл нуналыз. Сое пусъё 14-тӥ инвожое, праздник сӥземын Карл Ландштайнерлэн вордӥськем нуналэзлы, со адями вирлэсь группаоссэ усьтэмез понна физиологияя но медициная Нобель премиен пусъемын[7].
- Медико-биологической федерал агентстволэн ивортэмезъя, Россиын вир люкан 2024-тӥ арын кылем арын сярысь 6%-лы будӥз но 2,6 миллион литр луиз, 458 сюрслэсь трос доноръёс федерал реестре пыртэмын[8].
- Быдӟым Атыкай ож вакытэ доноръёслэн лыдзы 5,5 миллионозь вуиз; действующей армие 1,7 миллион литрлэсь трос консервировать карем вир вуиз, сое 7 миллион пол вир воштон процедурае кутӥзы. Война вакытэ 15 сюрс мурт «СССР-ысь дано донор» пусэн данъетамын[9].
Тодмо муртъёс пӧлысь доноръёс
- Джеки Чан — ялан вирзэ сётъялля, нош 2002-тӥ арын «Смокинг» фильмез пуктыку Канадаысь вир сётонъя службалэн донорез луиз.
- Криштиану Роналду — 2008-тӥ арын со «Счёт Красного креста» компанилэн ымнырыз вал. Лывиым сётонъя донор луэ.
- Джессика Альба — нылпи госпитальёслы вирзэ сётъялля.
- Екатерина Стриженова — студент аръёсаз ик вирзэ сётъяны кутскиз.
- Татьяна Навка — 2011-тӥ арын LG компанилэн донорствоез азинтон удысын посолэз вал[10].
Валэктонъёс
- ↑ Национальный день донора в России
- ↑ Есть повод гордиться
- ↑ Национальный День донора крови в России, РИА Новости (11 оштолэзе 2025). Эскеремын: 17 оштолэзе 2025 арын.
- ↑ Вероника Скворцова: В России донорство является не только почетной и благородной миссией, но и важнейшей государственной задачей
- ↑ 14 июня — Всемирный день донора крови: традиции, тема и мероприятия 2024 года, Известия (13 инвожое 2024). Эскеремын: 17 оштолэзе 2025 арын.
- ↑ Национальный день донора в России
- ↑ Всемирный день донора крови, РИА Новости (14 инвожое 2024). Эскеремын: 17 оштолэзе 2025 арын.
- ↑ «Единая Россия» организует по всей стране мероприятия к Национальному дню донора крови
- ↑ Любопытные факты
- ↑ Татьяна Навка стала послом донорства