Михайловка (Камбарка ёрос)

Черкогурт
Михайловка
56°24′53″ с. ш. 54°16′55″ в. д.
Кун	Россия Россия
Федерацилэн асмосэз	Удмуртия
Муниципал ёрос	Камбарка
Гурт поселение	Михайловка
Кылдэмын	1884-тӥ арын
Часовой поясэз	UTC+4:00
Улӥсез
Улӥсез	▲375 мурт (2021)
Официальной луись кыл	удмурт, ӟуч
Цифровой идентификаторъёс
Почта индекс	427943
Код ОКАТО	94220822001
Код ОКТМО	94520000131
Михайловка Москва Ижевск Михайловка

Михайловка — Камбарка ёросысь гурт. Михайловка гурт поселенилэн кивалтон центрез луэ. Гуртлэн азьвыл нимыз — Сляково.

Интыяськемез

Черкогурт интыяськемын элькунлэн лымшор но шундыӝужан палаз, Камбарка карлэсь ог 17 иськемын, шонер сюрес кузя.

Часовой пояс

Михайловка черкогурт, быдэс Удмурт Элькун сямен ик, МСК+1 часовой зонаын интыяськемын. UTC-ъя кутӥськись дырлэн висъяськемез +4:00 луэ.

Историез

1884-тӥ арын Камбаркаысь Кондюрин купец Камбарка шур дурысь музъемзэ но сиксэ камсьӧр крестьянъёслы вузаз. Соос, нюлэсэз кораса, асьсэлы улон коркаос пуктӥзы, бакча заводизы. Интыез нюр луэмен, улон интызэс Сляково шуыса нимазы. Подённой уже тыметлэн паллянпал ярдураз улӥсь Дедюхин помещик доры яке матысь Гоголи гуртысь кулакъёс но бай крестьянъёс доры медъяськылӥзы.

1894-тӥ арын гуртысь кулакъёслэн но бай крестьянъёслэн нылпиоссылы одӥг классъем школа усьтӥськиз, отын одӥг дышетӥсь ужаз. Но кема дышетыны ӧз вуы, туберкулёзэн черласа кулӥз. Со интые дышетӥсь-революционер вуемен, начар семьяосысь пиналъёс но дышетскыны кутскизы. 1902-тӥ арын азьвыл школа интые начальной школа усьтэмын.

1902-тӥ арын купец Василий Степанович Дедюхин Михайлово—Архангельской черк пуктыны кутскиз. 1903-тӥ арын лэсьтӥськон йылпумъямын вал. Со арын ик Епископ Иоанн выль черкез вӧсяз, ачиз купец Вӧсьлыко Анналэн 3-тӥ степенё орденэныз данъетамын. Со арысен Сляково гурт Михайловка черкогурт луиз. Солэсь азьвылгес Дедюхинлэн Михаил пиез тыметэ выйыса быремез бере, гуртлы Михайловка ним сётӥзы вал.

1929-тӥ арын гуртысь крестьянъёс огазеяськыса, «Баржевик» нимо колхоз кылдытӥзы. Нимыз Кам шурысь «кулон баржалы» сӥзьыса быръемын. 1943-тӥ арын тудву кошкон вакытэ Дедюхинлэн тыметэз кыриськиз, соин сэрен ву вуко но куашказ. 1947-тӥ арын тупатъям бере, выль вуко но электростанция пуктӥзы.

1946-тӥ арын гуртын лыдӟиськон юрт усьтӥськиз.

1950-тӥ арын матысь гуртъёсысь пичи колхозъёс «Правда» колхозэ огазеяськизы. Берло солэн инъетэз вылын «Единство» СПК кылдытэмын вал.

1952—1954-тӥ аръёсы пуктэмын выль клуб, 1960-тӥ арын — библиотека. Азьвыл школа интые тямыс аръем трудовой политехнической школа усьтэмын.

1964—1965-тӥ аръёсы пуктэмын гараж, вӧй шуккон завод, пилорама.

1989-тӥ арын усьтэмын фельдшерско-акушерской пункт (ФАП). Со арын ик стадионэн, спортзалэн, теплицаен но столовоен кык этажъем выль школа пуктэмын.

1960-тӥ арозь Михайловка Пермь улосвыллэн пушпӧлаз пыртэмын вал. 1962-тӥ арын, Камбарка ёросэз быдтэмен валче, УАССР-ысь Вылӥ Кенешлэн Президиумезлэн Постановлениезъя, Михайловка сельсоветэ пырись «Правда» колхоз Сарапул ёросэ пыртэмын. 1967-тӥ арын УАССР-ысь Вылӥ Кенешлэн косэтэзъя выльысь кылдытэмын Камбарка ёрос, соку ик «Правда» нимо колхоз Камбарка ёрослэн пушпӧлаз пыртэмын вал.

Улӥсез

Улӥсь калыклэн лыдыз

2010	2012	2021
260	↘246	↗375

100

200

300

400

2010

2012

2021

2002-тӥ арын ортчытэм огъя союзной переписья, гуртын улӥсь 349 мурт пӧлысь 95%-эз ӟучъёс вал.

Инкуазь синпелет

Михайловка черкогурт котырын Камбарка лесничестволэн интывылаз интыяськемын ог 700 гектаръем Валяй урочище. 1996-тӥ арысен со кун инкуазь синпелет луэ шуыса пусъемын. Татын бырон калэ вуэм: 87 пумо будосъёсты,3 пӧртэм губи но 24 пумо пӧйшуръёсты пумитаны луэ. Озьы ик татын Уралысь тодмо горнопромышленниклэн Демидовлэн дача бервылыз кылемын. Трос ужаменыз сэрен, татчы ӵем вуылыны, шутэтсыны, небыт турын выллын кылльыны дырыз ӧй вал. Озьы ке но, интылы «Валяй» ним пыраклы лякиськиз.

Валэктонъёс