Иванова, Степанида Степановна
| Степанида Степановна Иванова | |
|---|---|
| Вордӥськем нуналыз | 29-тӥ гудырикошконэ 1927 |
| Вордӥськем интыез | Шор Тыжма гурт, Малмыж утем, Ватка губерния, РСФСР, СССР |
| Кулон нуналыз | 1981 |
| Ужудысэз | кылбурчи |
Степанида Степановна Иванова (вордӥськиз 1927-тӥ арын 29-тӥ гудырикошконэ) Кизнер ёросысь Шор Тыжма (Средняя Тыжма) гуртын. Нылмуртлэн егит дырыз ортчиз секыт война аръёсы. Соин сэрен солы сизьым классэз гинэ йылпумъяно луиз.
Будӥз со трос нылпиё семьяын, сизьым кузя нылпиоссы вал. Война аръёсы туж курадӟыса улӥллям, кураськыса но ветлӥллям. Анайзы вазь, 50 арескын, улонысь кошкиз, атайзы нылпиёссэ одӥгназ будэтӥз.
Нырысь-валысь Степанида колхозын ужаз, собере, анаез кулэм бере, гуртоос сьӧры Тыжмаысь кошке. Улон сюрес сое вуттэ Свердловск улосысь Первоуральск городэз лэсьтонэ. Семья кылдытыса но ӟеч улонэз ӧз адӟы. Берло аръёссэ улӥз Матӥ сузэрез дорын.
С. Иванова нырысетӥзэ печатласькиз 17 аресказ «Советской Удмуртия» газетын, со вал «Комсомол сярысь частушкаос». Ида (озьы нимазы сое гуртазы) туж тунсыкъяське вал частушкаосын. Миша выныныз но Матӥ сузэреныз ӵош такмакъёс гожъяса лэзьылӥзы Ижкарысь УдНИИ-е. Соос али но возисько институтлэн архиваз.
Ужаз Ижевскысь типографиын, андан поттон заводын, Первоуральск городэз лэсьтонын. 1952-тӥ арысен ужаз чугун сюрес вылын. Литературае со кылбурчи луыса пыриз.
Степанида Ивановалэн кылбурет дуннеез туж тунсыко, тужгес но яратонэз капчи юморен возьматӥсь кылбуръёсыз. Соос лыдӟисьлэсь мылкыдзэ югдыто, либато, шумпотто. Тросэз калыклэн яратоно кырӟанъёсызлы пӧрмизы, кылсярысь: «Сьӧрлось туган», «Ой, эсьмаса, эсьмаса», «Вож тылъёс» но мукетъёсыз.
«Жингыртӥсь возь вылъёсысь» нимамын Степанида Ивановалэн лирической кылбуръёсын бичетэз. Со потӥз 1961-тӥ арын.
Литература
- Фёдорова Л. П. Удмурт нылкышно кылбуретлэн тулкымъёсыз. — Ижевск: Удмуртия, 2007. С. 50-51