Звёздочка (пуны-космонавт)
| Звёздочка | |
|---|---|
| Звёздочка (пуны-космонавт) Звёздочка (пуны-космонавт) | |
| Айы- яке мумывыжы | Мумы пуны |
| Кун |
 СССР |
| Ужудысэз | космонавт |
Звёздочка — пуны-космонавт, Музъемлэн орбитаяз 1961-тӥ арын 25-тӥ южтолэзе «Восток-3КА-2» инсьӧр кораблен лэземын но азинлыко лобаса берытскемын. Лобан аппаратлэн официальной нимыз — «Спутник-10».
Нырысетӥ адямиез инсьӧре келян азьын, та вал берпуметӥез пудо-животъёсын эскерон.
Пунылэн аслаз нимыз «Удача» вал, но син усемлэсь кышкаса, «Звёздочка» нимазы. Инсьӧры Звездочкаез вуоно космонавтъёс келязы. Пӧлазы вал Юрий Гагарин но Герман Титов[1].
Валтӥсь ужпумъёс
Лобонлэн мугез — инсьӧр аппаратлэн вань системаосызлэсь но музъем вылысь службаослэсь огъя ужаны быгатэмзэс эскерон.
Нош валтӥсь ужпумез — адямилэн инсьӧр вӧлметын улыны быгатэмзэ чаклан но берытскем бераз ассэ воземзэ эскерон. Озьы ик инсьӧрын но околоземной орбитаын луон дыръяз, луло организм вылын пӧртэм факторъёслэн шӧдӥськемзы.
Инсьӧре лобон но Музъем вылэ пуксён
«Восток-3КА-2/Спутник-10» совето кораблез инсьӧре лэзён ужрад 1961-тӥ арын 25-тӥ оштолэзе ортчиз.
Звёздочкаез урамын улӥсь выжытэм пуныос пӧлысь бырйизы, малы ке шуоно, соос тужгес чидасесь, мултэс тэргаськисьтэмесь, сиён но соослы дунтэмгес усе. Пуны сяна, корабльлэн капсулаяз мукет но подопытной биологической объектъёс вал, озьы ик инсьӧрчи-манекен Иван Иванович. 2 час пала лобемез бере, корабль орбитаысь поттэмын вал. Со вакыт отысь люкиськиз ( креслоен валче катапультироваться кариськиз) инсьӧрчи-манекен.
Музъем вылэ васькемез бере, пуныез шедьтон понна, пусъем интые юри дышетэм группа келямын вал. Но куазь уродэн соку ик шедьтыны ӧз луы. Пуныез утчаны но сое Ижкаре келяны юрттыны аэропортысь ужасьёс юнматэмын вал. Пусъем интые 2 самолётъёсын лобизы : спасательёсын Ил-14 но Як-12 лобась поисковой лабораториен , 61-тӥ номеро эскадрильялы кивалтӥсе юнматэмын вал Лев Оккельман. Лев Карловичлэн урод куазен но улӥетӥ лобанын бадӟым опытэз вал. Со сяна, возаз юрттыны КГБ-ысь 2 муртэ лэзизы на.
Оккельман ик шедьтӥз пуны-космонавтэн лэзем контейнерез. Со Пермь улосвылысь Чайковск ёросысь Карша гурт вӧзын усемын вылэм. Испытаниос пыр потэм бере, пуны кынме шуыса адӟиське вал. Лев Карлович сое капсулаысь поттӥз но бордаз ӝиптӥз, лымыен сюдӥз-люктаз. Куазь тупатскымтэен, соос мукет нуналаз гинэ Ижкаре вуизы. Солы луыса ик, корабль но ассэ быдтэмезлэсь (нештатной ситуация кылдон дыръя пуштыны кулэ вал), пуны но быронлэсь утемын вал[2].
Кӧня ке дыр ӵоже Звёздочка аэропортын улӥз. Лев Оккельман верамъя, аэропортысь ужасьёс лумбыт пуны-космонавт шоры учкыны ветлылӥзы. Звёздочкаез, кӧня ке дыр ортчыса, Москвае нуизы но, жаляса верано, берло улонэз солэн тодмо ӧвӧл ни. [3]. «Иван Иванович» манекенэз берлогес шедьтӥзы. Со парашютлэн стропаосыныз писпу борды когӟаськем. Кресло но, люклэн восрсэтэз но (сое кин ке лушкемен интыысь сельсоветэ куштыса кельтэм) сюризы.
Лобон бере йылпумъянъёс
Звёздочкалэсь азьпал инсьӧры лэзьям пуныос ваньзы ик улэпкын ӧз берытскылэ. Куинь толэзь солэсь азьпал Музъем вылэ пуксён азязы пуштыса бырыны шедизы Пчёлка но Мушка пуныос. Соос бере Чернушка пуны азинлыко лобаса, улэпен берытскиз. Звёздочкалэн улэпкын берытсконэз быдэс космической программалэн вуоно сюресэзлы лёгет вал. Угось пуныослэн кык пол азинлыко лобамзы бере гинэ адямиез инсьӧоре лэзьыны быгатысалзы.
«Восток-3КА-2» совето инсьӧр корабль биологической объектъёсын но манекенэн азинлыко лобаса, Музъем вылэ берытскиз. Со вал нырысетӥ адями-космонавт - Юрий Гагарин лобон азьын берпуметӥез эскерон.
Озьы ке но, Звёздочка берпуметӥез инсьӧре лобам пуны ӧвӧл. 1966-тӥ арын кузь орбитальной лобӟонэ потазы Ветерок но Уголёк пуныос.
Пуны-космонавтлы синпелет
2006-тӥ арын 25-тӥ южтолэзе пуны-космонавтлы, Звёздочкалы, Ижкарын синпелет пуктэмын вал. Со сӥземын пунылэн инсьӧр вӧлметэ лолобамез дырысен 45 ар тырмонлы.
Пунылы синпелет пуктон сярысь малпан Ижкарысь тележурналистлы, физико-математической наукаосъя кандидатлы Сергей Пахомовлы йыраз лыктӥз. 2005-тӥ арын школаын дешетскись пиналъёсын ӵош соос лымылэсь пуныез, солэсь лобам аппаратсэ лэсьтӥзы. Пиналъёслэн туж потэ вал, Звёздочкалэн синпелетэз асьме палан но мед луоз шуыса, соин ик асьсэ кисыысьтызы вань коньдонзэс бичазы, но люказы... 300 манет. Та кондонэнызы соос гипслэсь пуны лэсьтӥзы но сое чугунлэсь кадь мед адӟиськоз шуыса, сое буёлэн шобыртӥзы, [4] . Со лэсьтэм ужзэс али адӟыны луэ Шаертодонъя йӧскалык музейысь «Ижкар – усьтэм космос» адӟытонысь.
Синпелетлэн кулэ луонэз сярысь мылкыдъёссэ журналист вераса утчаз Павел Медведев скульпторлы. Со вакчи дыр куспын лэсьтӥз синпелетлы макет, кудзэ Пермь улосысь Чайковский карын чугунлэсь кисьтӥзы. Кызьы вера ачиз скульптор, синпелетлы инты но токма шорысь быръемын ӧй вал. Та интыын, Ижкарысь Молодёжная урамысь 34-тӥ корка дорын, пуныез космосысь пумитазы, татын ик азьло со вакытэ Ижкарысь вуж аэродром интыяськемын вал[5].
Чугунлэсь лэсьтэм лобӟон аппаратын Звёздочка пуке, усьтэм люкысь котыр учке. Аппарат вылын гожтэмын пуны-космонавтлэн историез, со сяна, 50 адямиослэн - инсьӧры сюрес усьтӥсьёслэн - нимъёссы гожтэмын на («Звёздочкалэн списокез» нимаське со). Текстлэн кылъёсыз берыктэмын ляб адӟись, сукыр адямиос понна но[5].
Синпелетэз усьтон ужрадэ ӧтемын вал авиациысь ветеран Лев Оккельман но. Со, кикурзэ пытьыяз поныса эскериз, собере шуиз: «Тупа!»[6].
Валэктонъёс
- ↑ Космические дворняги
- ↑ 8 лет исполнилось памятнику собаке Звёздочке в Ижевске
- ↑ Памятник Звёздочке в Карше
- ↑ Ижевский планетарий.Традиционная ежегодная встреча возле памятника собаке "Звездочке"
- ↑ 5,0 5,1 Скульптура «Проложившим дорогу в космос» (собаке-космонавту Звёздочке) Информационно-аналитическоe управление Администрации города Ижевска.
- ↑ Памятник собаке-космонавту Звёздочке