ГТРК «Удмуртия» (радио)

ГТРК «Удмурт» радио — Удмуртиысь тужгес кема ужась радиостанци. Ужаны кутскиз 1932-тӥ арын 5-тӥ шуркынмонэ. Диктор Василий Бутаев быдэс шаерлы кылымон: "Кылзэлэ, кылзэлэ! Вераське Ижкар! Туннэ нуналысен ужаны кутске Удмурт радио!" шуыса ивортӥз. Соку ик эфирын чузъяськиз нырысетӥез удмурт кылын дасям передача. Со луиз Удмурт радиолэн вордскем нуналыз. Нырысь студилы инты висъямын вал Связья ӝутӥськись юртын. Радио ужаны кутскем бере, гуртъёсын усьтӥськизы радиоточкаос. Быдӟым ож кутскон азьын шаерамы 28 сюрс радиоточка лыдъяське вал. Война аръёсы радиопередачаос телефон езъёс пыр «кошкылӥзы». Нуналаз куинь пол Совинформбюролэсь сводкаоссэ сётъязы. Ож йылпумъяськем бере радио уката паськыт вӧлмиз.

1958-тӥ арын нырысьсэ чузъяськиз "Между Волгой и Уралом" радиожурнал. Со артэ интыяськем 6 улосъёсысь иворъёсын тодматылӥз.

1960-тӥ арын Ижын Радиолэсь юртсэ лэсьтыны кутскизы. Сое 5 ар куспын ӝутӥзы. Татын нимысьтыз проектъя лэсьтэмын вал студиос, куараез гожтыны ӟеч условиос кылдытэмын вал. Крезьгур гожтонъя залэ огвакытэ бадӟым коллектив тэрыны быгатылӥз. Со аръёсы удмурт кырӟанъёсын узыр архив люкаса кельтэмын. Али дыре та юртэ мукет ужъюрт интыяськемын. Нош Удмурт радио город пумысь телестудие выжтэмын.

Ас вакытаз Удмурт радиоез быдэс элькун кылзӥз. 1968-тӥ арын Балезино каргуртын радио вӧлмытонъя передатчик пуктэмын вал. Соку Удмуртиысь 85 процентэз улӥсьёс УКВ частотаын Удмурт радиоез кылзыны быгатылӥзы. Туннэ радио удысын 50-лэсь ятыр мурт тырше. Нуналлы быдэ эфир 4-5 час ӵоже кыстӥське. Передачаос мыно удмурт но ӟуч кылын. Азьвыл аръёсын ӵошатыса, али анай кылын мынӥсь передачаослы висъям дыр ичигес кельтэмын. Иворъёсын «Визыл» программаез воштӥзы "Иворъёс", али дыре уг чузъяськы нылпиослы чаклам «Чагыр, чагыр, дыдыке» передача но мукет радиоочеркъёс. Туннэ соосты кылзыны луэ архивысь гинэ. Радиолэн удмурт ёзаз кема аръёс ӵоже тыршизы тодмо удмурт радиожурналистъёс: Милитина Гаврилова, Галина Баженова, Иван Аркашев, Виктор Ивашкин, Владимир Михайлов, Виктор Занчаров. Анастасия Гребиналэсь но Владимир Михайловлэсь куараоссэс али но кылзыны луэ меӵак эфирын.

1995-тӥ арын ГТРК радио улсын кылдытэмын вал нырысетӥез вакчи тулкымъёс вылын ужась удмурт «Ингур» радио. Татын трос чузъяськизы кырӟанъёс, егитъёслы но ны лпиослы сӥзем передачаос, нимысьтыз дыр висъямын вал радиоконцертъёслы. Элькунын воштӥськонъёс ортчемен сэрен, "Ингур" радио ворсамын вал.