Белка но Стрелка

Википедиысь материал
Эскерем гожтос
Белка но Стрелка
Белка (паллян палаз) но Стрелка (бур палаз)
Белка (паллян палаз) но Стрелка (бур палаз)
Мукет нимъёсыз Вильна но Капля
Выжыез Выжытэм пуны
Айы- яке мумывыжы Мумы пуныос
Кун СССРFlag of the Soviet Union.svg СССР
Ужудысэз космонавтъёс
Ужан аръёсыз 1960-тӥ
Логотип РУВИКИ.Медиа Медиафайлъёс РувикиМедиа пушкын

Белка но Стрелка — нырысетӥосыз пуны-космонавтъёс, кудъёсыз инсьӧр вӧлметэ лобемзы сяна, улэпен берытскизы Музъем вылэ (соослэсь азьвылгес, 1957- тӥ арын, шуркынмонэ, берытскыны луонлыктэк инсьӧре келямын вал Лайка нимо пуны-космонавт). Белка но Стрелка лобизы 1960-тӥ арын 19-тӥ гудырикошконэ «Спутник-5»[1] совето корабльын.

Лобонлэн мугез — инсьӧр вӧлметлэн излучениезлэсь луло организмъёс вылын шӧдӥськемзэ эскерон (исследование). Озьы ик перегрузкаос, капчилыкын (невесомостьын) кема дыр ӵоже улон но перегрузкаысь капчилыке выльысь выжыны быгатон. Озьы ик эскеремын вал кышкыттэк лобынз но Музъе вылэ берлань азинлыко берытскон луонлыкез. Лобон дыръя кулэ луись пӧртэм системаослэсь эффективностьсэс эскеризы: сиськыны, юыны, педло потаны луонлыкъёсыз. Озьы ик кӧня ке медико-биологической экспериментъёс но инсьӧр вӧлмет сярысь научной исследованиос ортчытэмын вал[2]. Корабле пуктэмын вал аппаратура, кудӥз пуныослэн организмазы воштиськонъёсты быдэс лобан дыр ӵоже пусйылӥз[3].

20-тӥ гудырикошконэ пуныосын спасательной капсула пуксиз пырак лыдъям интые. Белкаен Стрелка инсьӧр вӧлметын 25 час пала улӥзы. Та дыр куспын корабль-спутник соосын валче 17 пол (куд-ог тодэтъёсъя 18 пол) Музъемез котыртӥз[3][4].

Лобонлы дасяськон

1957-тӥ арын главной конструктор Сергей Павлович Королёв пуныосты 1 сутка ӵоже орбитальной лобонлы дасяны задание сетӥз. Кулэ вал лэзиськись аппаратэн Музъем вылэ берытскыны луонлыксы мед луоз шуыса[2]. Луло пудоосын корабль-спутникез инсьӧре келян но выльысь Музъем вылэ берыктон понна, пӧртэм пумо научно-технической ужпумъёсты сэрттоно луиз:

  • корабль-спутниклэсь кытӥ лобӟемзэ тодыса улоно но пуксёнзэ азьло ик лыдъям точной интые радъяно;
  • корабль пушкын луло пудоослы ярамон улонрадлык тупатоно;
  • инсьӧр корабль-спутникен радио-но телевизионной герӟет возёно[5].

Кабина пушкын улыны ярамон температураез радъяны кематэк ӧз пӧрмы— пуныос пӧсез туж секытэн чидазы.[6].

Эксперимент лэсьтон понна 12 пуны быръемын вал. Соос ваньзы мумы пуныос луыны кулэ вал, малы ке шуоно, мумы пуныослы ассенизационной устройство (туалет) лэсьтыны капчигес. Секталазы куать килограммлэсь капчигес мед луоз, жуждалазы — 35 сантиметрозь, арлыдзы — кык аресысен куатёзь. Бырйизы югыт гоно пуныосты — соос мониторын умойгес адӟисько шуыса. Озьы ик учкымон тусоесь луыны кулэ (калыклы берло возьматон понна)[7][8].

Лобонлы дасяськонъёс трос дыр ӵоже ортчылӥзы Москваысь медико-биологической проблемаосъя институтлэн базаяз. Пуныосыз кӧня ке толэзь ӵоже дышетӥзы кема дыр ӵоже ӟоскыт геометрической кабинкаосын улыны, чиданы изоляциез но ӵашетэмез. Тужгес но секыт луиз ворсам пространствоын улыны дышетон. Нырысь со понна размеръёсызъя лэзён аппаратлы тупась корт коробъёс тупатэмын вал, берлогес корабль-спутниклэсь макетсэ но уже басьтизы. Тренировкалэн берпуметӥ этапез ортчиз геометрической кабинаосын, зэмос условиослы тужгес матэктыса. Пуныослы вань датчикъёс думемын вал, инсьӧрэ лобон дӥськут дӥсямын но ассенизационной устройство пуктэмын. Пуныосыз инсӧре 1 суткалы гинэ келяны чакламын ке но вал, тренировкаосын соосыз 8 суткаозь улыны дасязы. Со куспын пуныос дышизы автоматысь инсьӧр сиён сиыны, инсьӧр дӥсь но датчикъёс нуллыны, туалетэ ветлыны. Инсьӧр сиёнэз кылдытӥз И. С. Балаховский. Со желе порма вал, сиён но ву но интыын[2][9][10][5].

Герметической кабинаын, вибростендын но центрифугаын берпуметӥ тренировкаосты ортчемзы бере, Белкаен Стрелка инсьӧр лобонлы тужгес кыдамъёсыз луизы. Соос ик быръемын вал кыкетӥ инсьӧр корабль-спутникын лобонэ но. Уйен-нуналэн пуныосыз чакласа возизы эмчиос но лаборантъёс. Эскеронъёс дыръя воштӥськонъёсты нимаз журналэ гожъязы.[2][11]. Кыксы ик соос вал ог кык но ӝыны аресъем выжытэм мумы пуныос. Соосыз Москваысь пуныослэн приютысьтызы басьтӥзы. Белка — быдэсак тӧдьы гоно, шаплы но утыны яратӥсь, азьветлӥсьлы укшась, ваньмызлэсь умой тренировкаосты быдэсъясь, нодлыко, мар ке луыку, нырысь ик со дышиз куараеныз сигнал сётыны. Стрелка — тӧдьы вылын курень виштыё, эшлыко, но дӥсьтисьтэм, ӧжыт замкнутой[12].

Белкаен Стрелка инсьӧрын нырысетӥосыз пуныос ӧй вал, соос азьын таӵе манер экспериментъёсын 8 пуны бырыны сюриз.[13]. 1960-тӥ арын, гудырикошконэ, учёнойёс азьвыл инсьӧр корабль-спутникъёслэсь шекъёссэс шедьтыны но тупатыны быгатӥзы. Озьы, 1960-тӥ арын, 28-тӥ пӧсьтолэзе, инсьӧры лэземын вал аппарат Спутник-5-1, кудӥзлэн пушказ иныязы Лисичка но Чайка пуныосты. Соос инсьӧр авариын бырыны шедизы. Телеметрической даннойёслы анализ лэсьтыса, тодмо луиз авариялэн мугез: лобонлэн 23-тӥ секундаяз вылӥ частотаен колебаниосын йырин куашказ ракеталэн урдэс блокезлэн ӝуан камераез. Та учыр бере разработать каремын вал катапультируемой капсула, кудӥз луонлык сётӥз авария кылдыку животъёсыз утьыны. Таӵе ик капсула Спутник-5 корабльын вал, кудаз лобзизы Белка но Стрелка[14].

Инсьӧр вӧлметэ лобон аппарат

Белкалэн но Стрелкалэн катапультироваться кариськем контейнерзы Космонавтикая музейын

Белка но Стрелка Музъемлэн орбитаяз потӥзы «Спутник» сериысь «Спутник-5» космической аппарат пушкын. Та аппаратлэсь конструкцизэ кылдытӥзы Королёв карысь ОКБ-1 бюроын С. П. Королёвлэн кивалтэм улсаз. Корабльлэн кабинаез но приборъёсын отсекез[5] вал.

Инсьӧр вӧлметэ лобон

1-тӥ номеро Стартовой комплекс

Кыкетӥ корабль-спутникез инсьӧре лэзизы 19-тӥ гудырикошконэ 1960-тӥ арын 11 час 44 минутэ Москвая 1-тӥ номеро стратовой комплексысь (45°55′00″ с. ш. 63°20′00″ в. д.GЯO) Байконур космодромысь. Кораблез инсьӧре лэзьыны дасянэз Сергей Павлович Королёв ачиз эскериз. Белкаез но Стрелкаез корабльысь кабинае пуктӥзы стартозь кык час кылем бере гинэ. Старт дыръя но вылӥе ӝутскон вакыт пуныослэн шокамзы но сюлэмжугиськонзы туж юн вал, но корабль орбитае потэм бере, каньылаз[15][10][13].

Медико-биологической Институтлэн огмуртэзлэн верамезъя, «пуныосты инсьӧре лэзьыны ӧдъяло вал ини 17-тӥ гудырикошконэ, но ракета-носительысь кислородной клапанын шекъёсыз шедьтэмын вал, соосты тупатытэк ӧз луы»[13].

Корабль-спутниклэн кабинаяз пуктэмын вал улонрадлыкез тупатыны юрттӥсь сӧзнэт, солы луыса, кабинаын омырзӥбет, температура но омырлэн мускытлыкез эсэпаз возиськизы. Омырез кислородэн тырмытон понна пуктэмын вал на лэсьтэт, кудӥз омырысь углекислотаез но вубусэз кыскыса, кулэ луымон кислород поттэ. Пуныосты сюдӥзы уй-нуналаз кык пол, юромо лэсьтэм сюдон автоматысь. Лобон вакыт соослэсь тазалыксэс эскеризы эмтодос аппаратэн, кудтӥз гожъяз пуныослэсь шоканзылэсь ӵемлыксэ, сюлэм йыгаськемзылэсь ӝоглыксэ, вирзӥбетсэс, сюлэмзылэсь огъя ужамзэ, сэзь луэмзэс но мугорзылэсь температуразэ. Корабль-спутникысь ваньмыз та ивортодэтъёсты келяллязы музъем вылын ужась радиотелеметрической люкетъёсы, со тодэтъёсты бичазы но соос бордын ужазы врачъёс-физиологъёс но собере лобон управление келяллязы[2].

Таяз лобонэ нырысьсэ саклазы пуныослэсь асьсэды воземзэс телевизионной система пыр. Корабль-спутник музъем вылысь приёмникъёс палтӥ лобыку, отысь видеоивортодэт гожтӥськиз киноплёнка вылэ, собере сое учкылӥзы, котькыӵе учыре эскеризы пуныослэсь воштӥськонъёссэс но асьсэды воземзэс. Корабль адӟиськонтэм дыръя, ивортодэтъёсты люкаллязы, собере, дыр сюрон дыръя, лэзьязы Музъем вылэ. Со сяна, пуныослэсь интызэс вошъямзэс эскеризы телеметрия пыр келям контактно-реостатной датчикъёсысь тодэтъёсъя[2].

Нырысь ик, корабль-спутник орбитае потэм бере, Белкалэн но Стрелкалэн йыр-пыдъёссы уллань лэзиськизы. Но ӝоген пуныос улӟизы, вырыны кутскизы, дышизы капчилыклы (невесомостьлы). Соос каньыл улӥзы, куддыръя нош тужгес шаплыесь вал; ческытэн сиизы космической сиёнзэс. Озьы ик, тодмо луиз, капчилык зол ӧз люкеты вирберганзылы, мугорзылэн температураез ас эсэпаз возиськиз[2]. Озьы ке но, ньылетӥзэ Музъем котыртӥ берытскыкузы, Белка думетысьтыз мозмытскыны, утыны но вукекъяськыны ӧдъяз. Но лобон бере анализъёс нормалэсь палэнскемзэ ӧз адӟытэ[10].

20-тӥ гудырикошконэ, 13 час 32 минутэ Москвая, Музъемез 18-тӥзэ котыртыкузы, кораблез Музъем вылэ лэзьыны косон вуиз. Тормозной установкаез лэзизы но, корабль орбитаысь потӥз. Белкаен но Стрелкаен, мукет лулоосын контейнер корабль-спутникысь катапультироваться кариськиз но тупатэм интые пуксиз (Орск-Кустанай-Амангельды треугольнике), лыдъям интылэсь 10 километр кеме. Программа пумозяз быдэстэмын вал. Пуксён интые вуыкузы, ӧнерчиос адӟизы, Белкалэн но Стрелкалэн тазалыксы умой шуыса (пуныос уто но адямиос борды кыстӥсько вал), куддыр нош соослы уродгес луэ вал лобон азьын тренировкаос бере но[2][10].

Белкалэн но Стрелкалэн лобон сюрессылэн огъя кузьдалаез луиз 700 сюрс км[5].

Йылпумъянъёс

ЦК КПСС-лэн но СССР-ысь Министръёслэн Советсылэн Белка но Стрелка пуныослэн инсьӧре лобамзы сярысь ивортонзы. 1960-тӥ ар.

Эскертон, кудаз пуныос дуннеын нырысьсэ инсьӧр вӧлметын быдэс уй-нунал улӥзы но улэпкын Музъем вылэ берытскизы, космосэз тодон-валан удысын дуно ватсэт луиз. Солы луыса, эмчиос-тодосчиос, В. И. Яздовский но О. Г. Газенко кивалтэм улсын, валазы, кызьы инсьӧры лобан факторъёс улэп организмъёслэн биохимической, генетической, цитологической но физиологической сöзнэтъёссы вылын шӧдӥсько. Тодосчиос йылпумъянэ вуизы, уй-нунал ӵоже лобан пудо-животъёс понна «стресс» луэ шуыса, озьы ке но, лобон бере эсэпысьтыз потэм вань анализъёссы ӝоген азьло значениосазы ик вуылӥзы, огдырлы гинэ уродэсь вал. Та тодэтъёслы луыса, валамон луиз, адямиез космосэ лобыны дасян ужрадъёс шонер ӧретӥ мыно шуыса[3][2].

Музъем котыртӥ ньылетӥзэ котырскон бере, Белкалы урод луэмез (Стрелкалы со вакыт умой ке но вал) тодосчиосты шуге-леке вуттӥз. Анализъёссы уродэсь ӧй ке но вал, ваньзы огкылэ вуизы, адямиез инсьӧре тужгес но чакласа лэзёно шуыса. Адями космосын кема дыр чоже улыны быгатоз-а, уз-а шуыса, рос-прос тодмо ӧй вал на, соин нырысетӥзэ лобонэз самой ӧжыт пол котырсконэн тырмоз шуыса кенешизы[5][13].

Лобам бере улонзы

Пуныослэн инсьӧр вӧлметысь берытскемзы бере, ТАСС пресс-конференция ортчытӥз. ТАСС ивортӥз: "…Инсьӧр кораблез (кудӥз малпамын но лэсьтэмын вал Советысь тодосчиосын, инженеръёсын, техникъёсын но огшоры ужасьёсын) космосэ лэзён но солэн Музъем вылэ берытсконэз адӟытэ, адями ӝоген инсьӧр вӧлметэ вуоз шуыса "[2].

Белкалэн со Стрелкалэн берло улонзы ӟечкын ортчиз. Соос мӧйымытозязы улӥзы авиационной но космической медициная Государственной научно-исследовательской но испытательной институтын, инсьӧре ӧз лобалэ ни. Стрелкалэн, кӧня ке толэзь улыса, куать таза кучапиосыз вордскизы. Бӧрсяз трос выжы кельтӥз, одӥгзэ кучапиез, Пушок нимозэ (кытын ке Пушинка гожтэмын), США-лэн Джон Кеннеди кунмуртэзлэн Каролина нылылызлы кузьмамын вал (мукет гожъямъёсъя Жаклин Кеннедилы, солэн куремезъя), будӥз США-ын кунмуртлэн семьяяз но Белой Домысь Чарли пунылэсь кучапиос вордӥз[16][12][17][13].

Стрелкалэн выжыысьтыз эшшо одӥгез кучапи улӥз СССР-ысь Сюресъёс герӟетъя министерствоысь питомникын, сое учкиз К. С. Ахлебнинский, кудӥз пуныосты инсьӧре келяны дасяз[18].

Белкалэн но Стрелкалэн сульдэръёссы али сыло Москваысь Космонавтикая мемориальной музейын[13].

  • Белкалэн сульдэрез

    Белкалэн сульдэрез

  • Стрелкалэн сульдэрез

    Стрелкалэн сульдэрез

Культура

  • «Звёздная сказка» мультфильм (2004). «Мегаполис» группалэн «Белка но Стрелка» кырӟанэз чузъяське[19].
  • «Настоящие приключения Белки и Стрелки» мультсериал (2008)[20].
  • 3D формато компьютерной анимационной фильм «Белка и Стрелка. Звёздные собаки» (2010) но солэн берло потэм ватсэтъёсыз:
    • «Белка и Стрелка. Озорная семейка» мультфильм(2011);
    • «Белка и Стрелка. Лунные приключения» мультфильм(2014);
    • «Белка и Стрелка. Тайны космоса» мультсериал (2018)[21];
    • «Белка и Стрелка. Карибская тайна» мультфильм (2020).
  • Тодэ ваён марка[22], поттэмын Почта Россиен 50 ар лобонлы тырмонлы.
  • Приднестровьеысь почтовой марка, сӥземын лобонлы 60 артырмонлы.
  • «Белка и Стрелка» мюзикл, «Белка и Стрелка. Звёздные собаки» мультфильмъя снимать каремын.
  • Память
  • СССР-ысь почтовой марка, сӥземын пуныослэн Спутник-5 кораблен лобемзылы

    СССР-ысь почтовой марка, сӥземын пуныослэн Спутник-5 кораблен лобемзылы

  • Белкалэн но Стрелкалэн лобемзы дырысен 50 ар тырмонлы сӥзем памятной марка

    Белкалэн но Стрелкалэн лобемзы дырысен 50 ар тырмонлы сӥзем памятной марка

  • Белкалэн но Стрелкалэн лобемзы дырысен 60 ар тырмонлы сӥзем Приднестровьеысь почтовой марка

    Белкалэн но Стрелкалэн лобемзы дырысен 60 ар тырмонлы сӥзем Приднестровьеысь почтовой марка

  • Харьковь карысь граффити

    Харьковь карысь граффити

Озьы ик учке

Валэктонъёс

  1. ↑ 55 лет космонавтики за 55 секунд
  2. ↑ 1 2 3 4 5 6 7 8 9 10 Полёты на кораблях-спутниках [ӟуч] — Космическая энциклопедия «Astronote».
  3. ↑ 1 2 3 Белка и Стрелка: четвероногие космонавты на орбите
  4. ↑ Замостьянов А. Собачья работа: как Белка и Стрелка стали героями страны
  5. ↑ 1 2 3 4 5 Научное обоснование возможности космических полётов человека и их медико-биологическая подготовка [ӟуч] — Космическая энциклопедия «Astronote». Эскеремын 2023-10-09 арын
  6. ↑ Литвинов Д. Зачем летали в космос Белка и Стрелка Эскеремын 2023-10-09 арын
  7. ↑ Белка и Стрелка — космические собаки Эскеремын 2023-10-09 арын
  8. ↑ 60-летие полёта Белки и Стрелки Эскеремын 2023-10-09 арын
  9. ↑ Хвостатые космонавты Белка и Стрелка Эскеремын 2023-10-09 арын
  10. ↑ 1 2 3 4 Животные в космосе Эскеремын 2023-10-09 арын
  11. ↑ Хроника освоения космоса [ӟуч] — «Космический мир». Информация о российском космосе. Эскеремын 2023-10-09 арын
  12. ↑ 1 2 «Белка и Стрелка — как всё было на самом деле» [ӟуч] — Сайт Pravda.ru. Эскеремын 2023-10-09 арын
  13. ↑ 1 2 3 4 5 6 Легендарный полёт Белки и Стрелки — РИА Новости. Эскеремын 2023-10-09 арын
  14. ↑ РИК, 2005.
  15. ↑ Документальный фильм «Белка, Стрелка и др» 0:27
  16. ↑ История потомства дворняг, которые проложили путь в космос Hi-News.
  17. ↑ Любимые дворняжки СССР | rg.ru
  18. ↑ Школа для четвероногих друзей // Маяк : газета. — 1999. — 13 оштолэзе.
  19. ↑ «Звёздная сказка» [ӟуч] — RuTube. Канал kefir_n. Эскеремын 2023-10-10 арын
  20. ↑ Настоящие приключения Белки и Стрелки
  21. ↑ Белка и Стрелка. Тайны космоса
  22. ↑ Каталог марок. № 1455. 50 лет космическому полёту Белки и Стрелки. rusmarka.ru. Эскеремын 2023-10-10 арын

Литература

  • Гюрджиан А.А., Дёмин Н.Н., Туточкина Л.Т. и др. Биохимические исследования крови и мочи животных, совершивших полёт в космических кораблях // Проблемы космической биологии. — М.: АН СССР, 1962. — Т. 1. — С. 152—160.
  • Ивановский, О. Г. Ракеты и космос в СССР : Записки секретного конструктора. — М. : Молодая гвардия, 2005. — 318 с. — (Россия и мир). — ISBN 5-235-02772-8.
  • Сисакян Н.М., Парин В.В., Черниговский В.Н., Яздовский В.И. Некоторые проблемы изучения и освоения космического пространства // Проблемы космической биологии. — М.: АН СССР, 1962. — Т. 1. — С. 5—16.
  • Шашков B.C., Антипов В.В., Раушенбах М.О. и др. Влияние факторов космического полёта на уровень серотонина в крови животных // Проблемы космической биологии. — М.: АН СССР, 1962. — Т. 1. — С. 258—264.
  • Яздовский В.И. На тропах Вселенной. — Москва ГНИИИА и КМ, 1990. — Рукопись p.
  • Яздовский В.И., Газенко О.Г., Серяпин А.Д. и др. Отчёт ГНИИИАиКМ по теме: Исследование возможности выживания и жизнедеятельности животного при длительном полёте на объекте «Д». Второй этап. — М.: АН СССР, 1959. — 263 с.
  • Яковлев В.В. Результаты исследования некоторых показателей периферических сосудов у собак во время и после полёта в космическое пространство // Проблемы космической биологии. — М.: АН СССР, 1962. — Т. 1. — С. 166—170.
  • Герд М. А. Реакции и поведение собак в экстремальных условиях. — М.: Наука, 1976. — 136 с.

Чӧлсконъёс

«https://udm.ruwiki.ru/w/index.php?title=Белка_но_Стрелка&oldid=479579»-ысь басьтэмын