Антиохия
| Древний город | |
| Антиохия | |
|---|---|
| др.-греч. Ἀντιόχεια ἡ Μεγάλη | |
 Антиохиялэн мутусыз туж вашкала но вашкала дыръёсы. | |
| 36°12′17″ с. ш. 36°10′54″ в. д.GЯO | |
| Кун | |
| Инъямын | 300 ар асьме вапумозь. |
| Кылдытӥсез | Селевк I Никатор |
| Куашкатэмын | 1268-тӥ ар |
| Йӧскалыкъёс | грекъёс, сириецъёс, арабъёс, армянъёс |
|
|
|
 Медиафайлъёс РувикиМедиа пушкын | |
.svg)
Антио́хия[2], озьы ик Антио́хия-на-Оро́нте (др.-греч. Ἀντιόχεια ἡ ἐπὶ Ὀρόντου, Антиохия-на-Да́фне, др.-греч. Ἀντιόχεια ἡ ἐπὶ Δάφνῃ, Антиохия Великая, др.-греч. Ἀντιόχεια ἡ Μεγάλη) — вашкала кар, интыяськемын Анатолиялэн но Сириялэн ярдуръёсыз вискын, туала Турцилэн интывылаз. Али дыре карлэн вашкала куашкам бервылыз Антакья кар пушкы пыре — турок вилайетлэн Хатай шоркараз.
Кыкетӥ Храм вакытлэн пумаз Антиохия эллинистической иудаизмлэн валтӥсь центрез луэ вал. Вазь христианстволэн кылдоназ валтӥсь инты басьтэменыз но кема дыр ӵоже возькыны быгатэменыз «христианстволэн кӧкыеныз» лыдъяськиз[3]. Выль Заветъя, Антиохиын Христослэсь дышетскисьёссэ нырысьсэ «христиан» нимын вераллям (Деян. 11:26).
Шор дауръёсы ожъёсын, музъемзурканъёсын но вузкарон сюреслэн воштӥськеменыз сэрен, карлэн кулэлыкез лябӟиз. Озьы ке но, солэн нимыз Антиохийской православной патриархатэн али дыре но возиське но Левантын но шундыӝужан палась Средиземноморьеын валтӥсь инты басьтэ.
Карез ӝутон
Антиохия инъямын вал тулыс 300-тӥ арын асьме вапумозь, инъясез ― Селевк I Никатор, Александр Македонскийлэн полководецъёсыз пӧлысь одӥгез. Архитекторез ― Ксенео (Ксеней), лэсьтӥськонэн кивалтӥзы Аттай, Перит но Анаксикрат. Лополис, Иоппа, Мероэ но Боттия пичи каръёсты огазеяса, кылдӥз бадӟым кар. Отчы грекъёсты но еврейёсты интыяськыны лэзизы. Карын сенатэн валче демократической муниципальной кивалтэт кылдытэмын вал . Иоанн Малалаен мадем легендая, фундамент кисьтон азьын, Аматея нимо нылашез курбон сётӥллям, берлогес сое инмар радэ пыртӥллям , нош берло солэн вӧсяськон интыез выль карын улӥсьёслэн тужгес яратоно интызылы пӧрмем. Кивалтӥсьлэн косэмезъя, скульптор Евтихид нылашлэсь статуязэ кылдытэм. Та сяна, Селевк озьы ик мукет вӧсяськон интыосты но инъяз, кылсярысь, Афиныысь храмез[4].
Карлэн урамъёсыз шонер сэрег улсын кечат луылӥзы, нош интыысь ужъюртъёс (Буле но Архонт) сое асэрико штатлы пӧрмытӥзы[5].
Антиохиез мукет сыӵе нимо каръёслэсь висъян понна, сое Антиохия Оронта (Оронт шурлэн нимызъя) яке Дафной (Дафна мугыркъя) нималлязы[3].
Селевкидъёслэн кунзылэн ньыль шоркаръёсыз пӧлысь одӥгез луиз Антиохия. Умой интые пуксеменыз, карын улӥсьёс географи, ожгар но экономика ласянь азьбуро вылӥллям : огласянь ― Антиохия Буртчин сюреслы но Эксэй сюреслы матын интыяськемын, соин мыло-кыдо вузкарылӥз шӧмтурынъёсын; мукет ласянь ― удалтоно Амука ӵошалын Стаурун но Сильпионгурезьёслы матын, оборонительной крепостьёс ӝутыны туж умой инты[6]. Пумен паськытамезъя, сое Тетраполис (ньыль люкетъем кар) ниманы кутскизы, Страбонлэн тодэ ваемезъя, карлэн лымшор палаз интыяськемын вал Епифаний квартал (Эпифания), кудзэ ас вакытаз Антиох IV Эпифан ӝутӥз вал. Татын тросгес грекъёс, сириецъёс но еврейёс улӥллям, вузкарон но промышленность туж зол азинскемын ке но вал, лулчеберетлэн азинскемезъя Пергамлэсь но Александриялэсь Антиохия берегес кылиз[5].
Рим империын
Антиохия 64-тӥ арозь асьме вапумлэсь азьпал, римлянъёс киултытозь, Селевкидъёслэн шоркарзы луэ вал. Выль кивалтэт улсын со рим провинцилэн Сирилэн шоркарез луиз. Азьмалпанъя, Антиохиын улӥсь калыклэн лыдыз уката йылӥз, 500 сюрс муртлэсь ятыр, бер эллинизм вапуме, Рим империя вакытэ. Солы луыса, Антиохия быдӟалаезъя империысь куинетӥез кар луиз, Рим но Александрия бере, но шундыӝужанпал Средиземноморьеысь тужгес валтӥсез кар[5]. Озьы ик Антиохия империлэсь шундыӝужанпал висгожъёссэ персъёслэсь утись рим гарнизонлэн штаб-квартираеныз лыдъяськиз[3]. Карын пӧртэм храмъёс, театръёс, акведукъёс но мунчоос вылэм.
Тиберий кивалтон аръёсы кар уката паськытаз. Отын Епифанийез Тетраполислэсь мукет люкетъёсызлэсь висъясь 3200 колоннаослэсь проспект ӝутэмын вал. Берлогес Антиохиялэн проектэз типовой лыдъяськыны кутскиз но мукет рим каръёсты ӝутонын кутӥськиз[7].
37-тӥ арын луэм музъемзуркан карез зол куашкатӥз , но Калигула в цезарь выльысь ӝутӥз Антиохиез. Тит пуктӥз выль театр. Домициан — кӧня ке мунчоос но Асклепийлы сӥзем храм. Траян — выж, цирк но термальной ваннаос. Траян кивалтон вакытэ, 115-тӥ арын, карын эшшо одӥг музъемзуркан луиз. Тупатъям-выльдэм бере, кар эшшо бадӟымгес луиз. Адриан Артемидалы сӥзем кык храм но инмар радэ пуктэм Траянлы сӥзем храм ӝутӥз[7].
252-тӥ арын, Шапур I кивалтэм улсын, Сирие кужмысьсасанидъёс пыризы , соку тӧрлык персъёс пала дурбасьтӥсь Антиохиысь дворянин Мариадес кие выжиз. Карлэн оглюкетэз нош ик куашкатэмын вал, нош тросэз улӥсьёс Персие (Сузианае) кужмысь келямын. Валериан I выльысь Антиохиез ӝутӥз, но 260-тӥ арын отчы нош ик персъёс берытскизы. 266-тӥ арысен 272-тӥ арозь карен кивалтӥз Зенобия[7].
IV дауре Антиохия выльысь валтӥсез кар но Констанций Галла цезарьлэн резиденциез луиз. 387-тӥ арын выль юнматэм выт калык пӧлын бугыръяськонъёс ӝутӥз. «Статуяослэн восстанизы» дыръя калык цезарьёслы но соослэн семьяоссылы сӥзем статуяосты куашкатӥзы[7].
Христианстволэн шорсюлмыз
Рим империлэн тӧрлык улсаз Антиохия вазь христианстволэн валтӥсь центрез луиз. Карын трос еврей калык улӥз, соин но со бордаз нырысетӥ миссионеръёсты кыскиз. Берлогес Антиохиез христиан богословилэн кӧкыез шуыны кутскизы, соин герӟаськемын Антиохиысь богословиея школа. Татын вордӥськиз но служенизэ кутскиз проповедник Иоанн Златоуст. Антиохиын интыяськемын вал автокефальной черкъёс пӧлысь одӥгезлэн центрез — Антиохийской черк (кар бырем бере патриархатлэн кивалтон центрез Дамаске выжтэмын вал)[8].
Кар котырын грек, сири, армян но латин монастырьёс пуктэмын вал. Асьме вапумысь 252-тӥ но 300-тӥ аръёс вискын Антиохиын дас черк собраниос ортчытэмын вал, но со вить нырысетӥ патриархатъёс пӧлысь одӥгезлэн резиденциез луиз, Константинополь, Иерусалим, Александрия но Рим сямен ик[8].
IV дауре Антиохийской черк, кулэлыксыя Римской но Александрийской черкъёс бере куинетӥез лыдъяське вал. Со ик вал нырысетӥез черк, кудӥз 327-тӥ но 341-тӥ аръёс вискын куполэн но мозаикаен собор ӝутӥз. Берлогес, Константинопольлэн ӝутскеменыз но Иерусалимез патриархат интые ӝутэм бере, озьы ик арианской ересьлэн тыршеменыз, Антиохийской черклэн кулэлыкез кулэсмиз[8].
Византи империын
IV—VII дауръёсы Антиохия Византилэн пушпӧлаз пыртэмын вал. IV даурлэн кыкетӥ ӝыныяз Антиохия римско-византийской Шундыӝужан палан тужгес бадӟымез лулчеберето но визьнодо центр луиз. Лев I Макелла (457—474) кивалтон аръёсы эшшо одӥгез музъемзуркан луиз, собере еврейёсты тросэн быдтон учыръёс но кунъёс куспын ожмаськонъёс кылдӥзы. 526-тӥ арын музъемзурканэн валче, миллионлэн ньыльмос палаез отын улӥсь калык бырыны шедиз. Карез нош ик тупатъяз-выльдӥз Антиохилэн мукетыз кивалтӥсез Ефрем, Шундыӝужанпал комитетэн но патриархен ӵош. Юстиниан I кивалтон вакытэ Антиохия паськытаз, эшшо чебергес луиз, но 535-тӥ ар котырын выль музъемзурканэн валче нош ик оглюкетэз кушкатэмын вал, нош 538-тӥ арын сое персъёс киултӥзы но быдэсак куашкатӥзы. Отын улӥсь калыкез Экбатанае келязы. Персъёс кошкем бере, Антиохия выльысь тупатъяны луонтэм куашкатэмын вал. Соку Юстиниан I выльзэ карез инъяны косӥз (Феуполис — «Инмарлэн карез»), быдӟалаезъя азьлоезлэсь пичигес, берло озьы ик Антиохия шуыса нимазы. VII даурлэн кутсконаз со кык пол Сасанидъёсын таламын вал — 602-тӥ но 611-тӥ аръёсы, йыружчиосты Ираклий I уллятозь[9].
Ислам кузёяськон, крестовой походъёс но Антиохийской княжество
637-тӥ — 638-тӥ аръёсы Антиохиез арабъёс киултӥзы, Умар ибн аль-Хаттаб халиф кивалтэм улсын, арабъёс кузёяськыку, со пичигес карлы пӧрмиз. Отчы интыяськиз Авасим организацилэн пограничной военной штабез, ачиз кар, 1084-тӥ арын турок-сельджукъёс киултытозь, пограничной укрепление интыын кутӥськиз[10].
1098-тӥ арын, Нырысетӥ крестовой поход дыръя, Антиохиез кема дыр ӵоже котретын воземзы бере, крестоносецъёс киултӥзы, асьсэ княжествооссы пӧлысь одӥгезлы шоркар каризы. Крестоносецъёс сое Византилы ӧз сётэ, татын ик асьсэлэсь кунзэс кылдытӥзы — Антиохийское княжество, кудӥз 1268-тӥ арозь улӥз. Антиохилы князе быръемын вал Боэмунд Тарентский[10][11].
Антиохия княжество Левантысь крестоносецъёслэн кунъёссы пӧлысь быдӟалаезъя куинетӥез вал (солэсь бадӟымезгес Триполи графство гинэ вал). Княжество интыяськемын вал Средиземной зарезьлэн уйпал но шундыӝужанпал вискысь ярдуръёсаз, кусыпъяськиз Киликийской царствоен но уйпалан Эдесской графствоен, лымшор палан — Триполи графствоен. XIII дауре отын улӥсь калыклэн лыдыз 30 000 пала лыдъяське вал, соос пӧлысь бадӟым люкетэз православной грекъёс но армянъёс. Со сяна, карлэн висгож сьӧраз кӧня ке мусульман дэменлыкъёс интыяськемын вал. Антиохие улыны кариськем крестоносецъёс пӧлысь тросэз Нормандиысь но лымшор Италиысь лыктэмъёс[12][13].
Мамлюкъёслэн кузёяськонзы но Антиохийской княжестволэн быремез
1268-тӥ арын карез мамлюкъёс киултӥзы но быдэсак куашкатӥзы. Антиохийской княжествоез мамлюк султан Бейбарс быдтэм бере, карлэн кулэлыкез но быдэсак быриз[11].
1517-тӥ арын Антиохиез турок-османъёс басьтэм бере, со пичи гурт выллем гинэ вал. Нырысетӥ дунне ож йылпумъяськытозь но сое Сирилы француз мандатъя сётытозь, Антиохия Осман империлэн люкетэныз лыдъяськиз. Франция Антиохиялы но солэн котырысьтыз интыослы Турциен валчеяськыны 1939-тӥ арын луонлык сётӥз[10].
Туала кулэлыкез
Али дыре Антиохия Антакья карлы пӧрмытэмын, турок Хатай илллэн сыӵе нимо ик ёросэз но кивалтон центрез луэ[14][15]. 2023-тӥ арын тулыспалэ карын нош ик зол музъемзуркан луиз[16].
Озьы ик учке
- Заяксартской Антиохия, ӟуч Антиохия Заяксартская
- Эллинизм, ӟуч Эллинизм
- Греко-Бактрийской царство, ӟуч Греко-Бактрийское царство
Литература
- Брюн С. П.. Ромеи и франки в Антиохии, Сирии и Киликии XI—XIII в. М.: Маска, 2015. Том I—II.
- Курбатов Г. Л. Основные проблемы внутреннего развития византийского города (Антиохия в IV в.). Л., 1971.
- Смбат Спарапет. Летопись / Пер. с древнеармянского; предисл. и примеч. А. Г. Галстяна. Ереван: Айастан, 1974.
- Степаненко В. П. Государство Филарета Варажнуни (1071—1084/86 гг.) // Античная древность и средние века. Свердловск, 1975. Вып. 12. С. 86—103.
- Степаненко В. П. К датировке печати Тавтука, проедра и катепана Самосаты // Античная древность и средние века. 1995. Вып. 27. С. 58—62.
- Яхья Антиохийский. Летопись (извлечения)
- Antioch-on-the-Orontes: The Excavations. L.; Princeton, 1934—1972. Vol. 1-5.
- Bouchier Ed. S. A short history of Antioch: 300 B. C.-A. D. 1268. 1921.
- Cribiore R. The School of Libanius in Late Antique Antioch. Princeton: Princeton University Press, 2007.
- Downey G. A history of Antioch in Syria: from Seleucus to the Arab conquest. Princeton University Press, 1961.
- Downey G. Ancient Antioch. Norman, 1963.
- Downey, Glanville, A history of Antioch in Syria from Seleucus to the Arab conquest. Princeton, 1961.
- Liebeschuetz J. H. W. G. Antioch: City and Imperial Administration in the Later Roman Empire. Oxf., 1972.
- Wallace-Hadrill D. S. Christian Antioch: a study of early Christian thought in the East. 1982.
Валэктонъёс
- ↑ GeoNames (англ.) — 2005.
- ↑ Агеенко Ф. Л. Антиохия // Словарь собственных имён русского языка. — М.: ООО «Издательство "Мир и Образование"», 2010. Архивная копия от 9 оштолэзе 2022 на Wayback Machine
- ↑ 1 2 3 Antioch(англи) Encyclopedia Britannica.
- ↑ Иоанн Малала. Книга VIII. Время македонян // Хронография. Книги VI-XII : [рус.]. — Белгород : БелГУ, 2016. — Вып. 7. — (Мир поздней античности. Документы и материалы).
- ↑ 1 2 3 Paul Kloeg. Antioch the Great: Population and economy of second-century Antioch(англи). — Leiden University, 2013.
- ↑ Wilson N. G. Encyclopedia of ancient Greece(англи). — New York: Routledge, 2006. — 592 p. — ISBN 978-0-415-97334-2.
- ↑ 1 2 3 4 Clyde E. Fant, Mitchell G. Reddish. A Guide to Biblical Sites in Greece and Turkey(англи). — Oxford University Press, 2003. — 432 p. — ISBN 0198031890.
- ↑ 1 2 3 The Eerdmans Encyclopedia of Early Christian Art and Archaeology(англи) / Paul Corby Finney. — William B. Eerdmans, 2017. — Vol. 1. — P. 73—74. — ISBN 978-0-8028-9016-0.
- ↑ A Global Chronology of Conflict: From the Ancient World to the Modern Middle East: From the Ancient World to the Modern Middle East(англи) / Spencer C. Tucker. — ABC-CLIO, 2009. — Vol. 6. — 2777 p.
- ↑ 1 2 3 Timothy E. Gregory. A History of Byzantium(англи). — John Wiley & Sons. — ISBN 140518471X.
- ↑ 1 2 Ришар Ж. Латино-Иерусалимское королевство. — С. 41—43.
- ↑ Grousset, René. L'Empire du Levant, Histoire de la Question d'Orient(фр.). — Paris: Payot, 1949. — 648 p. — ISBN 2-228-12530-X.
- ↑ Вильгельм Тирский. История деяний в заморских землях / пер. М. М. Стасюлевича. — История средних веков в ее писателях и исследованиях новейших ученых. — СПб., 1887. — Т. III.
- ↑ Antakya'nın Kuruluşu(тур.) Antakya Belediye Başkanlığı.
- ↑ Büyükşehir İlçe Belediyesi, Turkey Civil Administration Departments Inventory. Retrieved 19 September 2023.
- ↑ Ben Hubbard, Nimet Kirac An Ancient City, Now in Ruins, Struggles to Keep Its Soul(англи) The New York Times.
Вашкала Греция темаосын — Портал: Вашкала Греция | |
|---|---|
| История | |
| Вашкала грекъёс | |
| География | |
| Кивалтӥсьёс | |
| Политика | |
| Ожъёс | |
| Экономика но эрикрад | |
| Лулчеберет | |
| Архитектура | |
| Устолык | |
| Тодос | |
| Кыл но гожъяськет | |