Серекъян нунал
| Серекъян нунал | |
|---|---|
 Копенгагенысь метро лэсьтонэн герӟаськем пӧет, 2001-тӥ ар. | |
| Валатонэз | Маскаръяськон |
| Пусъё | 1 оштолэзе |
| Ортче | XVI даурысен кутскыса, али дыре но |
| Пусъён ужрадъёс | Тросгес шундыпуксён палан (Европа, Уйпал Америка), СССР-лэн азьвыл кунъёсаз. |
 Медиафайлъёс РувикиМедиа пушкын | |
Серекъян нунал (April Fools' Day «Шузияськон нунал»[1] (англосфера), Pesce d’ Aprile «Оштолэзь чорыг»(«Апрельская рыбка») (Италия)[2], Jour de Poisson d’avril «Оштолэзь чорыглэн нуналыз» (Франция)[3], El Día de los Santos Inocentes «Дун Сьӧлыктэмъёслэн нуналзы» (Испания)[4], April Gowk Day «Кикылэн нуналыз» (Шотландия)[5] — калыккуспо нунал, кудзэ дуннеысь тросаз кунъёсын 1-тӥ оштолэзе пусъё. Та нунал маскаръяськонэн, эшъёсты но тодмоосты юмоке вуттонэн герӟаськемын[6].
Хаджеттепе Университетысь мер тазалыкез утёнъя но сестринской ужъя ёзэтысь тодосчиослэн (тур. Hacettepe Üniversitesi, Турция) но Россиысь Роспотребнадзорлэн молекулярной диагностикая CMD Центрысьтыз экспертъёслэн верамзыя, серекъян, пе, адямилэсь тазалыксэ умоятэ[7][8].
Кылдэмез сярысь
Маскаръяськон нуналлэн кылдэмез сярысь трос пумо малпанъёс вань. Европаысь куд-ог кунъёс (Франция, Италия, Великобритания но мукет) та праздниклэсь кылдэмзэ асьсэ культураосынызы герӟало[9].
Шундыпуксёнпал Европаын шор дауръёсы Выль арез южтолэзь пумын пусйылӥзы. Солэн берпуметӥ но валтӥсь нуналыз 1-тӥ оштолэзьлы тупалляз. Ӵапак та нуналэ выль ар юмшанъёс но маскаръяськонъёс ортчытъязы[10]. XVI даурлэн шораз (1564-тӥ ар) Францилэн королез Карл IX Франциын Юлиан дырпусэз Григориан дырпусэн воштӥз, солы луыса, Выль ар 1-тӥ толшорлы тупаз[11].
Ирландиын улӥсьёс Серекъян нунал вашкала кельтъёслэн вапумазы кылдӥз шуыса малпало, соин вань серемес веранъёс Маскаръяськон Инмарлы сӥземын вал[6][10]. Исландиын но та праздниклэн историез Кылчинъёсын герӟаськемын (1-тӥ оштолэзе — Скадеяез (Скади), Тиасса (Тьяцци) инмарлэсь нылзэ буре ваён нунал[11].
Индиын улӥсьёс серекъян нуналлэн инъетэныз холи фестивалез (тулыс шумпотон вайись праздник) лыдъяло. Туала итальянецъёс Серекъян нуналэз пусъён сям Италиын кылдӥз шуыса оскыто. Вашкала Римын толалтэ пумын Визьтэмъёслэсь нуналзэс пусйылӥзы, Григориан дырпусэ выжем бере, нуналыз но 1-тӥ оштолэзе выжиз[10][12].
Фольклорист, философ но культураосты эскерись историк М. Шахнович Маскаръяськон нунал толалтэез келянэн, Вашкала Римысь Серекъянлэн инмарезлэн культэныз (грек мифологиын — Гелос) герӟаськемын шуыса валэктэ. Рим империя куашкам бере, оштолэзе ортчись шулдыръяськон Европае выжиз[13].
Нуналэз пусъён сям-йылолъёс
Пӧртэм кунъёсын маскаръяськон нуналэз пусъён сямъёс калыклэн сям-йылолъёсыныз герӟаськемын[9][6]. Кылсярысь, Новой Зеландиын, Великобританиын, Австралиын но мукет кунъёсын нуназеозь гинэ шулдыръясько, нуназе бере маскаръяськыны йӧндырисьёссэ «шузи мурт» шуо[6]. Шотландиын та нунал Кикылэн нуналыз нимаське но бӧрсьысь кык нунал пусйиське[5], нош Германиын 1-тӥ оштолэзез шудтэм нуналэн лыдъяло.
Италия
Италиын Серекъян нуналэз Pesce d’ Aprile — Оштолэзь чорыг («Апрельская рыбка») шуо[2]. Та нуналэ итальянецъёс тыбыразы ас киынызы суредам серемес чорыг тусъет ошо. Со ик та праздниклэн пусэз но луэ. Маскаръяськон нунал азьын вузаськонниосын шоколадлэсь лэсьтэм чорыг тусо кампетъёс потто[14]. Та сямлэн кылдэмез сярысь трос пумо веранъёс пумисько. Одӥгез соос пӧлысь Юлиан дырпусысь Григориан дырпусэ выжонэн герӟаськемын. Солы луыса, Выль арез пусъён но 1-тӥ оштолэзьысь 1-тӥ толшоре выжиз, нош калык маскаръяськыса сое кык пол пусъе[2]. Та вакытэ шунды Чорыглэн кизили сузьетаз луэмен сэрен ик нимыз но чорыген герӟаськемын[15].
Испания
Испаниын калык сямъя та калыккуспо нуналэз 28-тӥ толсуре пусъё[6]. Дун Сьӧлыктэмъёслэн нуналзы (el Día de los Santos Inocentes). Та нуналлэн кылдэмез библейской вакытэ вож нуныосты виылонэн герӟаськемын. Ог 2 сюрс ар талэсь азьвыл Иудей царь Ирод Вифлеемысь вань вож нуныосты быдтыны косэм[4]. Мукет версиез учконо ке, Серекъян нунал кылдэм XVI дауре, куке Выль ар азьын вань кураськисьёслы но юродивойёслы — «дун сьӧлыктэм муртъёслы» милостыня сёто вылэм. Праздниклэн пусэз но ― кагазысь вандэм адямилэн тусъетэз (colgar un monigote de la espalda). Та нуналэ испанецъёс со пусэз асьсэ тодмоссылы, ӵыжы-выжызылы лушкем лякылыны тыршо[16].
Индия
Индусъёс маскаръяськон нунал вашкала вапумъёсы одно ик Индиын вордскиз шуыса оскыто. Сое тулыс сяськаянлы но огъя шумпотонлы сӥзем туала Холи (Holi Festival) фестивален герӟало. Сое ортчытон дыр вошъяське. Пхалгун (февраль-март) толэзе тыр толэзьлэн берпум нуналаз кутске но чайтра (март-апрель) толэзьлэн кутсконаз йылпумъяське[10][17]. Та нуналэ индусъёс ог-огзэс юмоке вуттыны тыршо, ого-огзы шоры пӧртэм специосын лэзьяло но вӧсьлыко Ганг шурын пыласько[5].
Великобритания
Англиын но Уйпал Ирландиын нуназеозь гинэ маскаръясько. Великобританиын нуназе бере маскаръяськод — шуддэ ыштод шуо[11]. Шотландиын 1-тӥ оштолэзь — April Gowk Day «Кикылэн нуналыз». Сое кык нунал пусъё[5]. Кыкетӥзэ нуналэз (Taily Day) «Быж нунал»шуо[11]. Шотландиын улӥсьёс ог-огзылы ӝӧк вылэ пӧртэм резина мешокъёс тыро, кудъёсыз вылэ зӥбиськод ке, возьыттэм куара кылӥське. Нош Быж нуналлэн девизэз — маскара веран: «Мырӟы мыным».
Британ маскаръяськон Нырысетӥ дунне ожын но шараяськылӥз. кылсярысь, 1915-тӥ арын 1-тӥ ошт олэзе Великобританысь ВВС-лэн самолётэз немец лагерь вылэ бомба куштӥз. Немецыъёс кир-пазь пегӟыны кутскизы, нош бомба ӧз пушты, со вылын бадӟым букваосын «Нырысетӥ оштолэзен!» гожтэмын вал[18].
Серемес иворъёс англи газет-журналъёсын но поттылӥзы. Кылсярысь, 1957-тӥ арын BBC Швейцариын будэм макарон писпу сярысь гожтӥз. Нош со вакытэ Великобританиын улӥсьёс понна спагетти кыӵе ке но веръямтэ сиёнэн лыдъяськиз, соин ик та гожтос котырын туж трос вераськонъёс кылдӥзы[19].
Германия
Историкъёслэн верамзыя, 1-тӥ оштолэзе Иуда Искариот вордӥськем, соин ик Герман калык та нуналэз мӧзмыт но шудтэм шуылӥз[6]. Та нуналэ гуртъёсын ӧз ужаллялэ, кыӵе ке выль ужъёс но ӧз мытылэ, пудооссэс гидысь ӧз поттылэ. Мӧйыос но пиналъёс ог-огзэс пӧяны тыршылӥзы, кыӵе ке но луисьтэм ужъёсы ысъяллязы. Туала вакытэ Серекъян нунал сярысь мӧзмыт малпанъёс ӧз ик кыле ни. Нош маскаръяськон но пӧяськон сям, котькытын сямен, паськыт вӧлмиз[20].
Франция
Франциын но, Италиын сямен ик, 1-тӥ оштолэзез — «Оштолэзь чорыглэн нуналыз» (Jour de Poisson d’avril) нимало[3]. Французъёс эшъёссылы, ӵыжы-выжызылы но тодмооссылы тыбыразы лушкемен чорыг лякыны тыршо. 1444-тӥ арын, Парижысь теологиия факультетын «Оштолэзь чорыг» нуналэз утён пумысь петициын тазьы гожтэмын вал:[21]
«Подобная разрядка необходима, поскольку безумие, составляющее наше второе я, и, судя по всему, извечно присущее человеку, благодаря этому может прорываться наружу… Бочки с вином взрываются, если время от времени не вынимать затычку. А мы, люди, — плохо сколоченные бочки, которые вино мудрости разорвало бы, если бы оставалось в постоянном брожении под воздействием набожности и страха перед Господом. Поэтому в определенные дни мы позволяем себе безумства, чтобы потом с еще большим усердием вернуться к служению Господу».
Серекъятонлэсь палэнэ уг кылё француз СМИ-ос но. Кылсярысь, 1986-тӥ арын Le Parisien изданиын Эйфелевой башняез али ик сэрттыны кутскон сярысь гожтӥллям. Серем пыр гожтэм ивор аслэсьтыз ужзэ быдэстэм, редакцие пумит луон сярысь пумтэм гожтэтъёс вуыны кутскиллям[19].
Россия
Россиын Маскаръяськон нуналэз пусъён сям язычествоысен кутске[22]. Христианствое пыремлэсь азьпал, та нуналэ Корка кузёлэсь сайкамзэ пусъё вылэм. Калыклэн оскемезъя, со, пе, быдэс толзэ изе[10]. Корка кузёез шулдыртон понна, адямиос ог-огзэс серекъятыны вырылӥзы, маскаръяськизы[11]. Нырысетӥ огъя пӧет, кудӥз сярысь тодмо луиз пӧртэм тодэ ваёнъёсъя, 1703-тӥ арын Москваын вылэм. Глашатайёс немец театральной труппалэсь представленизэ учкыны ульчаос кузя калыкез ӧтьыса ветлӥзы. Нош занавес усьтӥськем бере, люкаськем калык «Первый апрель — никому не верь!» гожтэмез гинэ адӟиз. (И. Голиков историклэн верамезъя — «Апреля первое число, а тем всё дело кончено, и завеса опущена»)[23]. Фольклорист, философ, культураосты эскерись историк М. Шахнович тодаз вае 1700-тӥ арын луэм та выллем учырез. XVIII даур пумын тросэзлэн ӟуч гожъяськисьёслэн произведениосазы 1-тӥ оштолэзь маскаръяськон сярысь чуръёс кылдылыны кутскизы. 1774-тӥ арын Екатерина II Г. Потёмкинлы огаз яратон сярысь гожтэтаз тазьы гожтэм[24]:
«Ныне вить не апрель первое число, что прислать бумагу и в ней написать ничего. Знатно сие есть следствие Вашего сновидения, чтоб лишней ласкою не избаловать. Но как я лукавству худо выучилась, то статься может, что иногда и я не догадываюсь, что безмолствие значит».
А. Пушкин 1825-тӥ арын А. Дельвиглы гожтэтаз гожъям[25]:
Брови царь нахмуря,
Говорил: «Вчера
повалила буря
Памятник Петра».
Тот перепугался:
«Я не знал!.. Ужель?» -
Царь расхохотался:
«Первый, брат, апрель!»
Та нуналлы сӥзем серемес иворъёссэс ӟуч кылын потӥсь газет-журналъёс но печатлаллязы. Кылсярысь, 1988-тӥ арын «Известия» газетын Аргентинаысь футболист Д. Марадона Москваысь "Спартакен контракт гожтыны дасяське шуыса ивортӥз[19]. Иворлы оскизы но кӧня ке час куспын Associated Pressэ ивортӥзы. 2000-тӥ арысен Рунетын (VK.ru, Википедиын но мукет сайтъёсын) ӵемысь та нуналэ дореформенной орфографиез кутыса гожъяськылӥзы[19][23].
Озьы ик учке
Валэктонъёс
- ↑ Праздники в Великобритании SkyEng.
- ↑ 1 2 3 1 апреля в Италии Rome with love.
- ↑ 1 2 День смеха во Франции Путеводитель по Парижу.
- ↑ 1 2 28 декабря – День дурака по-испански Ilovevalencia.
- ↑ 1 2 3 4 День смеха: история и традиции праздника РИА Новости.
- ↑ 1 2 3 4 5 6 Bland A. The Big Question: How did the April Fool's Day tradition begin, and what are the best tricks? The Independent.
- ↑ Нилгюн К. А., Донмез А. А. Систематический обзор влияния йоги смеха на физические функции и психосоциальные результаты у пожилых людей // Дополнительные методы лечения в клинической практике. — 2020. — Т. 41.
- ↑ Глинка К. Смейтесь на здоровье! Источник: https://www.cmd-online.ru Центр молекулярной диагностики (CMD).
- ↑ 1 2 Гудкова Е. Когда в России начали отмечать День смеха? История праздника. Культура. РФ.
- ↑ 1 2 3 4 5 1 апреля в России: какого числа празднуется День смеха Комсомольская Правда.
- ↑ 1 2 3 4 5 День смеха: история и традиции праздника(ӟуч) РИА Новости.
- ↑ 1 апреля - День смеха ТАСС.
- ↑ Лещинская В. В. Праздники для старшеклассников. — М.: Аделант, 2009. — С. 132. — 544 с.
- ↑ Праздники Италии Итальянский перекресток.
- ↑ Праздник "Апрельской рыбки" Intergid.ru.
- ↑ День святых простаков в Испании ProEspañol.
- ↑ Филлипова М. Праздники Индии. Холи Туроператор «Кайлаш».
- ↑ Top 100 April Fool's Day Hoaxes of All Time(англи) Museum of Hoaxes.
- ↑ 1 2 3 4 Самые резонансные первоапрельские розыгрыши СМИ ТАСС.
- ↑ Хаметшина Н. 1 Апреля в Германии: как шутят немцы Deutsch Online.
- ↑ Ковалев В. А. Игра на престоле: ритуалы власти в Средние века и современная культура // Vox medii aevi. — 2018. — № 1. — doi:10.24411/2587-6619-2018-00001.
- ↑ День смеха РИА Новости.
- ↑ 1 2 Дню смеха 300 лет Вечерняя Москва.
- ↑ Екатерина II и Г. А. Потёмкин. Личная переписка 1769—1791. — М.: Наука, 1997. — № 390.
- ↑ А.С. Пушкин. Письма. Дельвигу А. А. Русская Виртуальная Библиотека.
Литература
- Иванова Т. А. «Апреля в первый день обман...» // Избранные труды / Под ред С. А. Авериной. — СПб.: Филологический факультет СПбГУ, 2004. — С. 261—266. — 324 с. — ISBN 5-8465-0125-7.
- Шахнович М. И. Приметы верные и суеверные. Атеистические очерки народного знания и бытового суеверия. — Л.: Лениздат, 1984. — 190 с.
- Юдин В. Н. Дни величальные : страницы народного христианского календаря. — Саратов: Приволжское книжное издательство, 1992. — 320 с.