Конклав 2025
| Папской конклав куартолэзь 2025 | |
|---|---|
| Интыез |
Сикстинской капелла, Апостольской дворец, Ватикан |
| Валтӥсь сановникъёс | |
| Декан | Джованни Баттиста Ре |
| Вице-декан | Леонардо Сандри |
| Камерленго | Кевин Фаррелл |
| Протопресвитер | Михаил Мичаи Китбунчу |
| Протодьякон | Доминик Мамберти |
| Секретарь | Илсон де Джесус Монтанари |
Конкла́в 2025 (ит. Conclave 2025; англ. Conclave 2025) — Франциск Папа кулэм бере, выльзэ Римской Папаез быръён понна, 2025-тӥ арын 21-тӥ оштолэзе люкам конклав (бырйиськонэ пыриськем кардиналъёслэн собранизы).
Конклавлэн шонеррадэз
Конклав «Universi Dominici Gregis» Апостольской конституцилэн куронъёсызъя люкаське. Со куронъёсты печатлаз вал Иоанн Павел II 1996-тӥ арын, выльдӥз Бенедикт XVI[1]. Конклав ӧтчаське Папалэн кулэмез яке отставкае кошкемез дырысен 15 нунал ортчыса (солэсь вазьгес но, 20 нуналлэсь бергес но ортчытыны уг яра). «Бырйиськонэ пыриськись кардиналъёс ваньмыз люкаськемын ке», соку одӥг-ог нуналлы вазьгес кутскыны луэ[2].
Конклавын куаразэс сётыны быгато 80 ареслэсь егитгес луись кардиналъёс гинэ (соосты кардинал-выборщик шуыса нимало). Папа кулэм яке отставкае кошкем бере, Кардиналъёслэн коллегизылэн деканэз вань кардиналъёслы ивор сётэ но конклав люка. Конклавез ортчытон понна, бырйиськонэ пыриськись кардиналъёс ӝегатскытэк Ватиканэ лыкто но Domus Sanctae Marthae — Вӧсьлыко Пётрлэн соборез вӧзы нимысьтыз пуктэм юртэ интыясько[3]. Отын кардиналъёс огшоры улонлэсь ворсасько. Телефон, телевизор, радио но газетъёс конклав ортчон дыре соос понна алэмын луо[4].
Таяз дыре кардиналъёслэн коллегизылэн деканэз луэ 91 аресъем Джованни Батиста Ре, со ик радъя но ортчытэ конклавез[5].
Конклав кутскон азьын вань крдиналъёс, соос пӧлын ик 80 ареслэсь мӧйыосызгес но, генеральной но частной «конгрегациосы» пырисько. Апостольской конституция «Генеральной конгрегацие» ваньмыз кардиналъёс пыро но кулэлыко ужпумъёсты эскеро. Нуналлы быдэ ӝутӥськись юанъёсты но мукет чыры-пырыосты «частной конгрегациын» сэртто-пертчо.
Кылсярысь, Генеральной конгрегация выльзэ Папаез быйыны Сикстинской капеллаез дасян понна кылкутэ. Озьы ик — кык «тужгес визьмо, тодӥсь-валась но адӟем карымон» священнослужительёслы черкез сюлэмшугъяськытӥсь югдурен тодматыны но выльзэ Папаез быръён сярысь кыл дасяны куре[2].
Тодосчиослэн малпамзыя, 2025-тӥ арын ортчись конклавлэн тужгес бадӟымез сюлмаськонэз ― католик черклэсь данзэ саптась аймес ужпумъёсын герӟаськем ченгешонъёс[6].
Кардиналъёс бырйыны быгато католик черке пыртэм котькуд воргоронэз, но 1389-тӥ арысен соос котьку но асьсэ кадь луись кардиналэз бырйылӥзы. Папае быръёнъёсты чакласьёс, котьку сямен, тужгес тупамонъёссэ кандидатъёсты пусъё — со «папабильёс», трос лыдыз papabile итальян кыллэсь пӧрмемын, «папа луыны быгатэ» шуыса берыктӥське. Котьку сямен, быръёнъёс азьын пресса «папабильёслы» укыр трос саклык висъя, озьы ке но, кардиналъёс ӵемысь огшоры муртэ быръё . Кылсярысь, Иоанн XXIII, Иоанн Павел I но Иоанн Павел II папабильёс пӧлын ӧй вал[4].
2025-тӥ арын 21-тӥ оштолэзе басьтэм лыдпусъёсъя Рим Католик черкын 252 кардинал лыдъяське, соос пӧлысь 135-ез — 80 арлэсь егитэсьгес. Соин валче, Romano Pontifici eligendo-лэн куронъёсызъя конклаве 120 кардинал гинэ пыриськыны быгатэ[7].
2025-тӥ арын оштолэзе ортчись конклавлэн кыстӥськемез сярысь вераны шуг, малы ке шуоно, 1268-тӥ арын со кык арлэсь кема кыстӥськиз[4].
Папабильёс 2025
Ивор вӧлмытӥсь ёзэтъёслэн тодэтъёссыя 2025-тӥ арын «папабильёс» пӧлысь тужгес ӵем поттылӥзы таосыз сярысь:
Кардинал Пьетро Паролин (Италия). Сое «Ватиканысь тужгес ӟечез дипломат» шуыса нимало. 70 аресъем кардинал Франциск Папалэн кун секретарез вал. 2015-тӥ арын США но Куба куспын миръясь чотын вал. 2018-тӥ арын Ватикан но Китай куспын тупанкыл дасянэ пыриськиз[8].
Кардинал Луис Антонио Тагле (Филиппины) — инклюзивностьлэн но евангелизацилэн дурбасьтӥсез шуыса тодмо. Калыкъёслэн евангелизацизылэн конгрегациеныз кивалтӥз. 67 аресъем кардинал Францисклэн оскем муртэз вал[6].
Кардинал Петер Эрдё (Венгрия) — 72 аресъем канонической правоя тодосчи, сяме пыӵам католик учениосты но доктринаосты азьланьтӥсь. Азьвылгес Европаысь епископ конференциослэн кенешенызы кивалтӥз[6].
Кардинал Питер Тарксон (Гана) — 76 аресъем библеист. Каньыл сямо кардинал. Озьы ке но, солэн гомосексуализм, инкуазен герӟаськем югдур но мерлыко эрикрад пумысен либерал мылкыдыз мукет куд-ог кардиналъёсын но аслаз кунысьтыз епископъёсын ваче пумит вуттэ. Со сяна, мукетыз Папа Африкаысь луыны кулэ шуыса, дуннеын ӵем вераськонъёс ветло. Берпуметӥез бербер выжыысь сьӧд куо понтифик вал Папа Геласий I, 492-тӥ—496-тӥ аръёсы[6].
Кардинал Марио Грек (Мальта) — Мальтаысь епископъёслэн синодзылэн секретарез, 68 арес. Францисклэн Черкын ортчытэм реформаосызлы дурбасьтӥсь.
Кардинал Хуан Хосе Омелла (Испания) — Барселонаысь архиепископ, 79 арес. Ассэ быдэсак пастырской службалы сётэ. Католицизмез инклюзивностен но жалясь луонэн герӟа. Черкын кужмысь карон понна трос пол прощение курылӥз. Солэн малпамезъя, шуг учыре шедем нылпиослэн лыдзы бадӟыматыса возьматэмын, малы ке шуоно, Черклэн пуш эскронъёсызъя, 1940-тӥ арысен кутскыса, 927 сяна пусъемын ӧвӧл. «Лыдпусъёс асьмедыз нокытчы уз вуттэ. Нырысь ик адямиос — но адямиослы пунэмзэ берыктон. Янгыш карон — со умойтэм сюрес. Шуг-секыт Черкын гинэ ӧвӧл, со быдэс мерлык пушкын», — шуиз архиепископ. 2023-тӥ арын Франциск Омеллаез черкен кивалтон ужпумъёсын вырись аслаз матысь кардиналъёсыз пӧлы пыртӥз.
Маттео Мария Дзуппи (Италия) — Болоньяысь архиепископ, 69 арес. Франциск Папаен матысь кусып воземысьтыз, итальян газет-журналъёс сое «итальян Бергольо» шуыса нимазы (вордӥськыкуз сётэм нимыз Хорхе Марио Бергольо). Юн кусып возе Вӧсьлыко Эгидийлэн дэменлыкеныз — тупаса улон но шонеррад понна вырись быдэс дуннеысь католик огин. Россиен Украинаен вачевуонын Папалэн оскем муртэз.
Жан-Марк Авелин (Франция) — Марсельысь архиепископ, 66 арес. Тодмо луэ ваньмыныз огкыл шедьтыны быгатэменыз, капчи мылкыдо но идеологи ласянь Францисклы матысь луэменыз, тужгес но иммиграци но мусульман дунне пумысен. Со сяна, со теологи но философи тодосъёсъя доктор луэ[9].
| 2025-тӥ арын 21-тӥ оштолэзе ортчись конклаве пыриськемъёс кунъёсъя но улосъёсъя | |
| Италия | 17 |
| Кылемез Европа | 36 |
| Уйпал Америка | 20 |
| Лымшор Америка | 17 |
| Африка | 18 |
| Азия | 23 |
| Океания | 4 |
| Ваньмыз бырйисьёс | 135 |
|---|---|
Валэктонъёс
- ↑ Losacco, Riccardo Maria. Что такое Конклав и как избирается новый Папа?, Agenzia Nova (21 оштолэзе 2025). Дата обращения: 21 оштолэзе 2025.
- ↑ 1 2 Cindy Wooden Pope Francis has died. Here’s what happens next. - OSV News(англи)
- ↑ Papal Conclave: how the next pope is elected, Theos Think Tank (24 тулыспалэ 2025). Дата обращения: 21 оштолэзе 2025.
- ↑ 1 2 3 How is a new pope chosen? The papal conclave process explained., Business Insider (21 оштолэзе 2025). Дата обращения: 21 оштолэзе 2025.
- ↑ What happens after a Pope dies: The Vatican’s process of papal succession explained - CNBC TV18, CNBCTV18 (21 оштолэзе 2025). Дата обращения: 21 оштолэзе 2025.
- ↑ 1 2 3 4 The Next Pope: Who Are The Frontrunners to Succeed Pope Francis?(англи) The Newsweek.
- ↑ Here's how a conclave elects a new pope | CBC News, CBC. Дата обращения: 21 оштолэзе 2025.
- ↑ Who will the next pope be – and how are they chosen?, The Week (5 оштолэзе 2023). Дата обращения: 21 оштолэзе 2025.
- ↑ Who might succeed Pope Francis? Nine possible candidates(англи) Reuter's.
|
Та материаллэн правообладателез АНО «РУВИКИ» Интернет-энциклопедия». Мукет сайтъёсын тае АНО «РУВИКИ» Интернет-энциклопедия» лэземъя гинэ кутыны луэ |