Ионов, Виктор Петрович

Виктор Петрович Ионов
Вордӥськем нуналыз	26-тӥ инвожое 1934({{padleft:1934|4|0}}-{{padleft:6|2|0}}-{{padleft:26|2|0}})
Вордӥськем интыез	Иж, Горький улос, РСФСР, СССР
Кулон нуналыз	25-тӥ южтолэзе 2026({{padleft:2026|4|0}}-{{padleft:3|2|0}}-{{padleft:25|2|0}}) (91 год)
Кулэм интыез	Иж, Россия
Кун	СССР  Россия
Ужудысэз	оружейник
Данъетъёсыз

Виктор Петрович Ионов (26-тӥ инвожое 1934, Иж, Горький улос — 25-тӥ южтолэзе 2026, Иж) — совето но росси оружейник. 1976-тӥ—1986-тӥ аръёсы — механосборочной производствоя «Ижмаш» заводлэн директорез, «Ижмашлэн» историезъя музейлэн директорез вал. Социалистической Ужысь Герой (1982). Удмурт Элькунлэн дано муртэз (2006).

Улон сюресэз

Виктор Петрович Ионов 1934-тӥ арын 26-тӥ инвожое ужасьёслэн семьяязы Ижкарын вордӥськиз. 1952-тӥ арын Ижысь 30-тӥ шор ёзо школаез йылпумъяз, 1957-тӥ арын — Ижысь механикая институтэз (али — Ижысь М. Т. Калашников нимо техникая кун университет). Вузэз йылпумъямез бере егит ӧнерчи медэ вал Ульяновске самолётъёс лэсьтыны мыныны, но вордскем караз кыльыны мылкыдзэ ӝутӥзы, Ижысь машиностроительной заводысь пыӵалтӥрлык лэсьтонын инженер-технологе ужинты ӵектыса. Предприятиын Виктор Петрович профессия ласянь будонъя вань тубатъёстӥ ортчиз — механосборочной производствоя мастерысен директорозь.

Тужгес секыт но кылкутымон 102 номеро гумы лэсьтон цехен Виктор Петрович кивалтон вакытэ, 1971-тӥ арын 7,62-мм модернизированной Калашников автоматэз поттонэз радъякузы, предприятие вуиз импортэн басьтэм австрийской партия, солэсь SHK-10 машинаосын редуцирование амалэн гумыосты лэсьтыны чакламын вал. Производство лушкем радъяськиз бере, Австрияысь ӧнерчиосты заводэ ӧз лэзе, таин валче интыысь ужасьёслы выль тӥрлыкен ужаны асьсэлы дышетсконо луиз. Пуктэм ужпумез быдэстӥзы, со дыре ик технологияя процессысь валтӥсь тӥрлыкез — дорнэз — умоятӥзы-выльдӥзы на. Редуцирование амалъя гумыосты дурон технологиез автоматъёсты лачак поттонэ пыӵатэмез понна Виктор Петрович Ионов 1976-тӥ арын пусъемын Ленин нимо орденэн.

Ионов кивалтэм улсын производствоысь коллектив куать выль ыбылӥськон пыӵалтӥрлык поттонэз радъяз, азьвыл лэсьтыны кутскем вузлэсь лыдзэ но быдӟалазэ кулэстытэк. Вакчи дыр куспын выль цех пуктэмын но оптикая прицелъёсты лэсьтыны кутскемын вал, производствоя быдэс ужез механизацие поттонъя выль ӝутэм корпусысь эксплуатацие лэзизы 100 сюрс квадрат метр выль площадьёсты, 8 километр конвейеръёсты, 600 единицалэсь ятыр выль вылӥ производствоя тӥрлыкез уже кутӥзы. 10-тӥ пятилетка ӵоже технологияя процессъёсты выльдон-умоятон юрттӥз выль тӥрлыкез кылдытонъя но поттонъя кун ужпумез быдэстыны, соос пӧлын АК-74 но АК-74У автоматъёс но вал. Вуз поттонлэн быдӟалаез 1,5 поллы йылӥз, нош ужазинлык — 63 %, со дыре ик ог одӥг миллион манет тыр коньдонзэс ширъяны быгатӥзы.

СССР-ысь Вылӥ Кенешлэн Президиумезлэн 1982-тӥ арын 30-тӥ гудырикошконэ кутэм указэныз азинсконъёсыз но калык хозяйствоя ужпумъёсты быдэстонын ас кужыменыз юн тыршемез понна Виктор Петрович Ионовез пусйизы Социалистической Ужысь Герой нимын, солы Ленин орден но «Серп и Молот» зарни медаль сётӥзы.

Бератаз Виктор Петрович «Ижмашысь» валтӥсь инженерлэн воштӥсез но валтӥсь директорлэн ӟечлыкъя воштӥсез луыса тыршиз, нош 1998-тӥ арысен, пенсие потэмез бере, «Ижмаш» завод музейлэн директорез луыса ужаз, предприятилэн историысь узырлыкез но вормонъёсыз сярысь вӧлмытонъя бадӟым уж нуиз. Солэн кивалтэмез улсын музейын усьтӥськиз «Соос Родина понна фронтъёсын но ож мышкын ожмаськизы» ялан ужась рубрика.

Удмурт Элькунлэн Президентэз 2006-тӥ арын 25-тӥ коньывуонэ 165 номеро указ кутӥз, соя Удмурт Элькунэз улон-вылонын но экономикаын азинтыны юрттэмез понна Виктор Петрович Ионов сӥлы каремын «Удмурт Элькунлэн дано кунмуртэз» дано нимын.

Тунсыко фактъёс

• 2019-тӥ арын стрит-артъя но ульча искусствоя фестиваль улсын Ижысь огез коркалэн фасадаз (Лихвинцевлэн урамез, 56-тӥ юрт) Виктор Петровичлэн портретэз суредамын вал.

Валэктонъёс

Литература

• Удмуртская Республика: Энциклопедия / Туганаев, Виктор Васильевич. — Ижевск: Удмуртия, 2008. — С. 368. — 767 с.