Вордскем кыл: журналлэн кылдэмез но азинскемез

Рецензировать карем гожтос

Рецензент: Клементьев Андрей Александрович, Тимирзянова Ирина Фёдоровна, Хайдарова Надежда Васильевна

Вордскем кыл ӟуч Родное слово
Вордскем кыл
«Вордскем кыл» журнал
Ӧнер удысэз	амалтодослыко журнал
Потон дырыз	арскын 10 номер
Кылыз	удмурт
Редакцилэн адресэз	Ижкар, К.Маркс нимо урам, 262 номеро юрт
Валтӥсь редакторез	Клементьев, Андрей Александрович
Учредительёсыз	Удмурт Элькунысь Йӧскалык прессалэн юртэз
Кун	Удмуртия Удмуртия
Поттӥсез	Удмурт Элькунысь Йӧскалык прессалэн юртэз
Кылдон дырыз	1990-тӥ ар
Тиражез	600

«Вордскем кыл» (ӟуч «Родное слово») ― амалтодослыко журнал. Сое поттэ Удмурт Элькунысь Йӧскалык прессалэн юртэз. Чакламын нылпи садысь визьнодасьёслы, покчи классъёсын ужась дышетӥсьёслы, удмурт кылъя но литературая дышетӥсьёслы, тодосчиослы-филологъёслы, методистъёслы, озьы ик ваньзылы, кинлэн ужез герӟаськемын удмурт кыллы но лулчеберетлы дышетон удысэн. Потыны кутскиз 1990-тӥ арын. Пуштросэз радъяське удмурт но ӟуч кылын.

1990-2000-тӥ аръёс: кылдон но пыд вылэ султон

1980-тӥ аръёслэн пумазы каръёсысь но ёрос центръёсысь школаосын усьтӥськыны ӧдъязы удмурт классъёс, нош нылпи садъёсын — удмурт группаос. Со вакытэ калыкез дышетонъя министрлэн йӧскалык ужпумъёсъя воштӥсез Валентина Ившина министрлы Антонина Лисиналы школаослы но нылпи садъёслы огъя йӧскалык дышетон сӧзнэтэз огазеясь журнал кылдытон-поттон пумысен кичӧлтонэн вазиськиз. Озьы 1990-тӥ арын Калыкез дышетонъя министерстволэн бурд улаз «Вордскем кыл» журнал кылдӥз.

Нырысетӥ араз, «Кенеш» журналлэн приложениез чотын, кык номерез потӥз, вуоно араз — ньыль номер. Выль приложенилы редакторе юнматӥзы литературатодосчиез, кылосбур тодосъёсъя кандидатэз Анатолий Николаевич Уваровез. Журналэз радъяны юрттӥзы гожъясьчи Галина Васильевна Романова но Дышетӥсьёслэсь тодон-валанзэс будэтонъя институтысь (али — Дышетонэз азинтонъя институт) методист Раиса Спиридоновна Пчельникова. Вуоно араз шугъяськонъёс кылдӥзы: журналэз дасян-радъян понна кулэ вал коллектив но ужан инты.

Озьы 1991-тӥ арын 15-тӥ шуркынмонэ редакциез кылдӥз. Валтӥсь редакторе юнматӥзы Удмурт Элькунысь Вылӥ Кенешысь депутатэз, «Советской Удмуртия» газетлэсь собкорзэ Ильтимир Минтимирович Байметовез. Со люказ коллектив: Рашит Осипович Хайдаров валтӥсь редакторлэн воштӥсез луиз, Валентина Викторовна Андреева — валтӥсь бухгалтер, Надежда Васильевна Хайдарова — машинкаен бичась но корректор. Редакцилы Ижкарысь Карл Маркс урамысь 262-тӥ номеро юртэ инты висъязы.

Журнал кылдон, пыд йылаз султон вакытэ редакциын пӧртэм аръёсы ужазы Галина Васильевна Романова, Людмила Дмитриевна Кутянова (Айтуганова), Татьяна Николаевна Чернова, Фёдор Степанович Никитин, Василий Леонидович Андреев, Надежда Гавриловна Шакирова, Фёдор Александрович Суворов, Георгий Александрович Юсаев. Журнал печатласькиз электромеханикая заводлэн типографияз. Озьы 1992-тӥ арын 2-тӥ тулыспалэ (2500 тиражен но 104 бамен) «Вордскем кыл» журналлэн нимысьтыз нырысетӥ номерез лыдӟисьёс кие вуиз. 1990-тӥ аръёсы журналлэсь 2500-3000 экземплярен потӥсь куиньмос люкетсэ Алнаш ёросысь дышетӥсьёс но визьнодасьёс басьто вал.

1992-тӥ арын редакцилэн кенешез кылдӥз. Отчы дышетон удысысь ӧнерчиос но тодосчиос пыризы. Журналын печатланы дасям ужъёс редакцилэн кенешез пыр потылӥзы. Журналлэсь пуштросэзлэсь ӟечлыксэ будэтон понна солэсь вылтуссэ но вошъяно луиз. 1995-тӥ арын вылтуссэ нош ик выльдыны малпамын вал. Со ужез редакция оскиз суредасьёслы Александр Абрамовлы но Касим Галихановлы. Соослэн лэсьтэм вылбамазы висъяськиз ӵӧж пус (логотип). Редакцилэн кенешез сое юнматӥз. Озьы 1996-тӥ арын журналлэн вылбамез логотипен потыны кутскиз.

Ӵӧж пужы логотипе юнме быръемын ӧй вал. Со урал кыл выжые пырись калыкъёслэн тодметпуссы (символзы) луэ. Ӵӧж, Инмарлы юрттыса, дуннеез кылдытэ. Кышномуртлэн, анайлэн, анай-атай юртлэн тодметпусэз луэ. Солэн утён кужымез бадӟым. Нош анай-атай юртлэн одӥгез валтӥсь тодметэз — вордскем кыл. Таин валче ӵӧж пус уте анай кылэз но, соин ӵош — «Вордскем кыл» журналэз но.

1998-тӥ арозь журнал кык толэзьлы огпол потылӥз, нош 1998-тӥ арысен толэзьлы быдэ потыны кутскиз.

1990-тӥ аръёсы валтӥсь редакторлэн воштӥсезлэн Рашит Осипович Хайдаровлэн кичӧлтэменыз валче журнал пушкын пичи книжкаос потыны кутскизы. «Вордскем кыллэн» книжкаяз печатласькизы кылбуръёс, веросъёс, выжыкылъёс, буёло суредъёс. Со гожтӥсьлэн книгаез мед лыдъяськоз шуыса, Рашит Осипович, Москвае ветлыса, лицензия басьтӥз. Укмыстонэтӥ аръёсы, кылдон но пыд вылэ султон вакытэ, редакция котыраз зэмос эшъёссэ, визьнодасьёсты но дышетӥсьёсты люканы быгатӥз. Соос ик журналлэсь пуштроссэ занятиослы но урокъёслы сценарийёсын узырмытӥзы.

2001-2010-тӥ аръёс: юнман но кыдан

2000-тӥ аръёсы огъя мерлыкын но, соин валче дышетон удысын но пӧртэм воштӥськонъёс ортчизы. 2001-тӥ арын Удмурт Элькунысь Кун Кенеш «Удмурт Республикалэн кун кылъёсыз но Удмурт Республикаысь мукет калыкъёслэн кылъёссы сярысь» кат кутӥз. Та законъя удмурт кыл элькунамы ӟуч кылэн ӵош кун кылэн лыдъяськыны кутскиз. Сокугес ик кутэмын вал мукетыз ужкагаз — «Закон о полномочиях Удмуртской Республики в области образования». 2001-тӥ арын дышетон удысэ кун стандарт вуиз.

Дышетон удысын 2000-тӥ аръёсы азьпала потӥз азинскытӥсь (развивающей) дышетон сӧзнэт. Ваньмыз со журналлэн пуштросэз вылын шӧдӥськиз. 2010-тӥ арозь журналэз азинтонъя концепция кылдытэмын вал. Сое дасянэ пыриськизы тодмо тодосчиос, методистъёс. Та ужен кивалтӥз редакцилэн кенешезлэн ёзчиез, педагогика наукаосъя доктор, профессор Геннадий Афанасьевич Ушаков. Концепциын пусъемын, журналлэн валтӥсь мугез удмурт кылэз пыӵатӥсь ӧнерчиосты йӧскалык дышетон удысысь валтӥсь ӧръёсын но ужан амалъёсын тодматоно, предметэз дышетонэн герӟаськем тодон-быгатонъёс сётоно шуыса. Озьы журналын «Ужаськом выль технологиосъя» рубрика усьтӥське, кытын дышетӥсьёс номерысь номере туала куронъёсъя дасям ужъёсын тодматско, асьсэос но тодмато. Печатласько критика мышлениез азинтӥсь, шудон, педагогика мастерской технологиосъя урокъёслэн сценарийёссы. Нимысьтыз саклык висъяськиз удмурт кылъя урокъёсын информационно-коммуникационной технологиослэн луонлыкъёссылы, цикло-блочной (Алнаш ёросысь Вуж Утчан но Вуж Шудья школаос) но предметъёсты герӟаса (интеграция) дышетонлы, Г. Н. Кудиналэн но З. Н. Новлянскаялэн «Литература как предмет эстетического цикла» методиказылы.

Дышетон технологиослы сӥзьыса, 2009-тӥ арын лыдӟись кие нимысьтыз номер вуиз (№ 5-6). 2006-тӥ арысен кутскыса, покчи классъёслы «Ӟеч-а, бур-а, удмурт кыл!» дышетон книгаез кутонъя ужъёс печатласькылӥзы. Визьнодасьёслы но дышетӥсьёслы азинскыны, пайдалыко ужан амалъёссэс вӧлмытыны юрттӥзы ёросъёсысь но дышетон ужъюртъёсысь йӧскалык дышетонлы сӥзем нимысьтыз номеръёс. 10 ар ӵоже 8 номер поттэмын, пӧлысьтызы 6-ез ёросъёслы сӥземын (Пичи Пурга, Глаз, Дэбес, Можга, Шаркан, Балезино, Татарстанысь Бавлы), 2-ез — дышетон ужъюртъёслы (Алнаш ёросысь Варзи-Ятчи школа, Кузебай Герд нимо удмурт кун йӧскалык гимназия). Лыдӟисьёслэсь куронъёссэс но кулэяськонъёссэс лыдэ басьтыса, нимысьтыз темаосъя номеръёс кылдылӥзы:

• педагогика мастерскойёсъя (2005)
• шаертодонъя (2006)
• удмурт художникъёсъя (2007)
• финн-угор литературая (2008)
• дышетон удысын туала технологиосъя (2009).

Со сяна, дасямын вал нимысьтыз методика юрттэтъёс (разработкаосын бичетъёс):

• «Праздники в детском саду» (Ижкарысь визьнодасьёслэн праздникъёслы сценарийёссы, 2009)
• «Зарни шыкысъёсмес усьтыса» (нылпи садъёслы занятиослы сценарийёс но удмурт кылъя но литературая урокъёслы конспектъёс, 2010).

2010-тӥ арын журналлэн куинь номеръёсаз «Суредасьёс — нылпиослы» сузьетын вераськон мынӥз тодмо нылпи иллюстраторъёс сярысь. Озьы ик юрттэт вылысь дасямын электрон приложениос: шаертодонъя но туала технологиосъя.

«Вордскем кыл» журнал амалтодослыко луэ. Тодослыко пуштроссэ узырмытыны юрттӥзы тодосчиос но методистъёс: Удмурт кун университетысь Геннадий Афанасьевич Ушаков, Валей Кельмакович Кельмаков, Иван Васильевич Тараканов, Виктор Леонидович Шибанов, Светлана Тимофеевна Арекеева, Роза Ивановна Яшина, Татьяна Ивановна Зайцева, Роза Аркадьевна Кузнецова, Тодон-валан сётон удысысь ужасьёслэсь быгатонлыкъёссэс будэтонъя но выльдонъя институтысь Рудольф Фёдорович Березин, Елена Рудольфовна Блинова, Людмила Михайловна Рябец, Любовь Васильевна Вахрушева, Светлана Леонидовна Скопкарёва, Андрей Александрович Клементьев, Дышетон удысысь йӧскалык ужпумъёсты эскеронъя тодос институтысь Алевтина Николаевна Журавлёва, Антонина Михайловна Комарова, Юлия Тихоновна Байтерякова, Надежда Прохоровна Боталова, Галина Анатольевна Турова.

Озьы 2000-тӥ аръёсы дышетӥсьёс огдышем амалэн ужан ӧрысь азинскытӥсь дышетонэ мылысь-кыдысь потӥзы но урокъёсазы но внеурочной ужпӧразы пӧртэм туала технологиосты пыӵатыны кутскизы. Редакциын ужазы Валентина Викторовна Андреева, Василий Леонидович Андреев, Павел Николаевич Баженов, Ильтимир Минтимирович Байметов, Светлана Николаевна Иванова, Виолетта Маратовна Набиева, Елена Владимировна Назарова, Анатолий Аркадьевич Перевозчиков, Ирина Фёдоровна Тимирзянова, Надежда Васильевна Хайдарова, Рашит Осипович Хайдаров. Журналлэн валтӥсь редакторез — Ильтимир Минтимирович Байметов.

2011-2020-тӥ аръёс: выль ӧръёслы усьтӥськон

«Вордскем кыл» журналлэн туала вакытэз 2011-тӥ арысен кутске. Со герӟаськемын дышетон удысын воштӥськонъёсын. Воштӥськонъёслэн инъетсы — выль федерал кун дышетон стандартъёс. 2010-2011-тӥ дышетскон арын улонэ пыӵаны кутскиз покчи ёзо школалэн стандартэз. Берло бӧрсьысь бӧрсе инъет ёзо но шор ёзо школаослэн стандартъёссы кутӥськыны кутскизы. Нош нылпи садъёс 2011-тӥ арысен федерал кун куронъёсъя ужзэс радъязы, берлогес нимысьтыз федерал кун дышетон стандарт пыӵаны кутскиз.

Пусъем ужкагазъёслэн валтӥсь куронзы — дышетонэз но визьноданэз ужпӧро подход вылэ инъяськыса радъян, куке нылпи тодон-валан басьтонэ ачиз мыло-кыдо пыриське. Нош 2012-тӥ арын Кун Думаен «Россия Федерациын дышетон сярысь» 273-тӥ номеро кат кутэмын но Президентлэн Косэтэныз Россия Федерациысь 2025-тӥ арозь кун йӧскалык политикая стратегия юнматэмын. Соос кыкез ик туала улонамы воштӥськонъёсын но улонмылэсь ӟечлыксэ будэтонэн герӟаськемын. Таин валче 2011-тӥ арысен «Вордскем кыл» амалтодослыко журналлэн редакциез нылпиослы удмуртлыкез, удмурт кылэз пыӵатӥсь ӧнерчиосты дышетон удысысь валтӥсь ӧръёсын но ужан амалъёсын тодматэ, озьы предметэз дышетонэн герӟаськем тодон-быгатонъёс сяна, пӧртэм удысъёсъя нуналмысь кулэ луись тодон-валанъёс сётон сярысь сюлмаське.

Нылпи садын проект амалэз кутонлы бадӟым саклык висъяське. Школалы чаклам выль федерал кун дышетон стандартъёсын валче валтӥсь интые потӥзы ужпӧро подходэн герӟаськем ужан амалъёс. Журналлэн редакциез со амалъёслы нимысьтыз саклык висъяны кутскиз. Удмурт кылъя но литературая урокъёсын туала технологиосты кутонлы 2000-тӥ аръёслэн кыкетӥ ӝыныязы но саклык висъяськиз. Но со вакытысь дышетон стандартъёс урокез ужпӧрлэсь радлыксэ лыдэ басьтыса ортчытъяны ӧз курылэ на. Нош куд-огез дышетӥсьёс — «Вордскем кыл» журналлэн авторъёсыз — дырез азьпалтыса вамышъязы, угось элькунысьтымы «Новое образование» огазеяськонлэн ужаз мыло-кыдо пыриськизы. Та огазеяськон тодон-валан сётонэз выль сямен радъян сярысь сюлмаськиз. Соин ӟеч кусыпъёс возиз «Вордскем кыл» журналлэн редакциез но.

2011-2020-тӥ аръёсы покчи классъёсын ужась дышетӥсьёс но удмурт кылъя но литературая дышетӥсьёс пӧртэм технологиосты кутыса радъям урокъёсынызы тодматонзэс азьланьтӥзы. Азьвыл возьматъям технологиос борды ватсаськизы кейс-метод, пайдалыко лыдӟиськон технология но проектной задача. Нимысьтыз саклык висъяськыны кутскиз ивортодэтэз радъян амалъёслы: валатонъёсын карталы но интеллект-карталы. Лыдӟисьёс кие пӧртэм кабен радъям урокъёслэн тунсыко но узыр пуштросо конспектъёссы вуизы:

• утчаськон-эскерон урок,
• урок-мастерской,
• урок-шудон,
• урок-экскурсия,
• урок-кенешон,
• урок-конференция,
• урок-квест,
• урок-инсценировка.

Тужгес но бадӟым саклык висъяськиз утчаськон-эскерон уроклы: печатласькизы амалтодослыко кылужъёс, дэмланъёс но конспектъёс. Та аръёсы визьнодасьёс но дышетӥсьёс пӧртэм темаосъя инноваци площадкаослэн но проектъёслэн ужъёсазы пыриськизы. Соос ужзэс быгатыса но пайдалыко радъяны, ужъемышъёссэс статья но разработка пыр возьматыны дышизы. Озьы «Вордскем кыл» журналлэн выль мыло-кыдо авторъёсыз будӥзы. Соослэн материалъёссы ӟеч юрттэт сёто мукет ӧнерчиослы.

Удмурт Элькунысь ёросъёсъя чаклано ке, берло 10 ар ӵоже тужгес но трос печатласькизы Алнаш, Дэри, Шаркан но Пичи Пурга ёросъёсысь визьнодасьёс но дышетӥсьёс. Нош мукет улосвылъёс пӧлысь редакциен тужгес но ӟеч кусып возё Татарстанысь ӧнерчиос.

Удмурт кылъя но литературая сяна, журналлэн бамъёсаз мукет предметъёсъя но материалъёс печатласькизы: ӟуч кылъя но литературая, историяя, шаертодонъя, математикая, крезьгуръя. Дышетӥсьёс-авторъёс разработкаоссы пыр возьмато, кызьы соос урокъёсазы но внеурочной ужпӧразы улосвылэн но удмуртлыкен герӟаськем материалэз быгатыса но пайдалыко куто.

2015-тӥ арын «Вордскем кыл» журналэз азинтонъя кыкетӥез Концепция кутэмын. Та ужкагазъя журналлэн туннэ нуналыз радъяськиз. Редакция вань ужзэ сӥзиз удмуртлыкез, удмурт кылэз нылпиослы дышетон удыс пыр пыӵатон бордын тыршись ӧнерчиослы вис карытэк юрттон вылысь туала сӧзнэтэз кылдытонлы. Нимысьтыз саклык висъяськиз журнал котыре азинскыны юрттӥсь узыр пуштросо пӧл (среда) лэсьтонлы. Визьнодасьёслы но дышетӥсьёслы пӧртэм ресурсъёс чакламын вал: журнал, нимысьтыз методикая юрттэтъёс, редакцилэн вотэсбамез но мерлыко вотэсъёсын огинъёсыз, конференциос, семинаръёс, котырес ӝӧкъёс, эчешонъёс, вожвылъяськонъёс. Редакция пӧртэм ужпумъёслы саклык висъяз: йӧскалык дышетон бордын тыршись тодосчиослэсь-методистъёслэсь но практикъёслэсь ӧнерлыко дэменлыксэс кылдытон но юнматон, удмурт кылосбур но амалтодос удысъёсысь утчаськон-эскеронъёслэсь емышъёссэс вӧлмытон, удмурт кыллы но литературалы дышетон удысысь пайдалыко амалъёсты кылужъёс но разработкаос пыр вӧлмытон, мукет улосвылъёсысь но кунъёсысь вордскем кылэз но лулчберетэз дышетон амалъёсты возьматон.

Журналлэн пуштросаз туала вакытэ таӵе ӧръёс висъясько: удмурт кыл но литература, калыккылос, лингвокультурология, шаертодон удысъёсын утчаськон-эскеронъёс, удмурт кыллы дышетонын, удмуртлыкез нылпиослы пыӵатонын утчаськонъёс, удмурт кыллы но удмурт литературалы школаын дышетон амалъёс, шаертодон удысын тодон-валан сётон, пӧртэм предметъёслэн (нырысь ик ӟуч кыл, ӟуч литература) пуштросазы, внеурочной уже но ватсаса тодон-валан сётон удысэ йӧскалык пуштрос пыртон.

Журналын кылдытэм ӟеч сямъёс но улонлэн куремезъя выль тулкымъёслэн пыӵамзы адӟисько весь ужась но кулэлыксыя кутӥськись рубрикаос пыр. Кемалась дырысен но номерысь номере потӥсь рубрикаос пӧлы пыро:

• «Иворъёс»,

• «Нылпи садын»,
• «Покчи классъёсын»,
• «Шор ёзо школаын»,
• «Тодосчи эскере».

Соос журналлэн лысьӧмыз, сюрлыез, аслыз гинэ тупась тусбуйзэ возьыны юрттӥсь тодметъёс-маркеръёс луо. Котькуд номерын кутӥськисьтэм рубрикаос пӧлы пыро: «Лэчыт ужпум», «Милям юбиляръёсмы», «Шаертодон», «Тон сярысь, Дышетӥсь», «Книга ӝажы», «Тодосэ нырысетӥ вамышъёс», «Квалификациез будэтон», «Егит ӧнерчилы», «Дасяськиськом аттестацилы», «Ватсаса тодон-валан сётон», «Ӧтиськом адӟытонэ», «Тунсыко пумиськонъёс», «Редакциын пумиськонъёс», «Быгатӥсьлэн сэрегез». Ваньзы соос журналлэсь пуштроссэ узыргес, тунсыкогес карыны, дышетон удысысь пӧртэм воштӥськонъёсты лыдэ басьтыны юртто. Озьы номерысь номере кутӥськись но дырын-дырын кутӥськись рубрикаос яркыт но пайдаё, туала пуштросо огъя медиапродукт кылдыто.

«Вордскем кыл» журналлэн инлыкез кылдэмез дырысен амалтодослыко (научно-методической) луэ. Редакциын ужасьёс журналлэн бамъёсаз огазеяны быгатӥзы тодосэз но практикаез. Озьы журнал удмурт кыллы но литературалы дышетон методикаез азинтыны но узырмытыны юрттэ. Выль сямлы пӧрмиз тодосчи-методистлэсь но практиклэсь кыӵе ке тема бордын ӵош материал дасямзэс радъян: методист статья дася, нош дышетӥсь уроклы разработка лэсьтэ. Таӵе амалэн редакция ужа Дышетонэз азинтонъя институтысь но Дышетон удысысь йӧскалык ужпумъёсты эскеронъя тодос институтысь ӧнерчиосын.

Выль авторъёс будо инноваци площадкаосысь, вылӥ категорилы аттестациез ортчем педагогъёс пӧлысь. Соослэсь амалтодослыко быгатонлыкъёссэс азинтонлы редакция бадӟым саклык висъя. Журналлэсь туала тусбуйзэ кылдытыны юрттӥзы тодосчиос но методистъёс: Удмурт Элькунысь Дышетонъя но наукая министерствоен, пӧртэм тодослыко но дышетон ужъюртъёсын кусыпъёс. 2011-2020-тӥ аръёсы журналлэсь пуштроссэ дышетон удысысь пӧртэм ӧръёсъя ужъёсынызы узырмытӥзы:

• Дышетонэз азинтонъя институтысь Елена Рудольфовна Блинова, Марина Викторовна Чикурова, Роза Аркадьевна Кузнецова, Андрей Александрович Клементьев, Рустам Нуруллович Касимов, Вера Борисовна Сергеева, Вероника Григорьевна Ширманова, Венера Васильевна Евсеева, Татьяна Вячеславовна Прохорова, Андрей Геннадьевич Никитин,
• Дышетон удысысь йӧскалык ужпумъёсты эскеронъя тодос институтысь Надежда Ивановна Ураськина, Вера Григорьевна Пантелеева, Любовь Васильевна Вахрушева, Антонина Михайловна Комарова, Юлия Тихоновна Байтерякова, Надежда Прохоровна Боталова, Людмила Васильевна Бусыгина, Светлана Николаевна Чернова,
• Удмурт кун университетысь Галина Витальевна Горбушина, Виктор Леонидович Шибанов, Любовь Петровна Фёдорова, Светлана Тимофеевна Арекеева,
• Глазкарысь В. Г. Короленко нимо педагогикая кун институтысь (али инженеръёсты но дышетон удыслы ӧнерчиосты дасянъя университет) Светлана Леонидовна Скопкарёва,
• Историяя, кылъя но литературая удмурт институтысь Василий Михайлович Ванюшев, Алексей Александрович Арзамазов,
• Трокай Борисов нимо педагогикая Можга колледжысь Татьяна Сергеевна Иванова но Маргарита Анатольевна Пискунова.

Удмурт кылъя но литературая дышетӥсьёслы ӟеч юрттэт сётӥзы инъет ёзо но шор ёзо школаослэсь стандартъёссэс вазь пыӵатӥсь школаосын ужась дышетӥсьёслэн выль куронъёсъя лэсьтэм разработкаоссы. Озьы кусыпъёс юнмазы Дэри ёросысь Изгурт но Ягул школаосын, Якшур-Бодья гимназиен, Ижкарысь 56-тӥ гимназиен, Кез ёросысь Юски школаен. Пайдалыко материалъёссы печатласько Кузебай Герд нимо Удмурт кун йӧскалык гимназиын ужась ӧнерчиослэн, ужан амалъёсынызы тужгес но мыло-кыдо тодмато нылпи садысьтыз визьнодасьёс.

Визьнодасьёслы но дышетӥсьёслы азинскыны, тунсыко но пайдалыко ужан амалъёссэс вӧлмытыны юртто нимысьтыз ёросысь но дышетон ужъюртъёсысь йӧскалык дышетонлы сӥзем номеръёс. Пусъем дыр ӵоже тужгес но трос номеръёс дасямын Алнаш ёросысь дышетон ужъюртъёсын ӵош. Лыдӟисьёслэсь кулэяськонъёссэс но куронъёссэс лыдэ басьтыса, нимысьтыз темаосъя номеръёс кылдылӥзы: «Удмуртиысь самодеятельной художникъёс» (2011), «Писательёс — нылпиослы» (2011), «Удмурт литератураен герӟаськем интыостӥ» (2015).

Нимысьтыз саклык висъяськыны кутскиз методикая юрттэтъёс дасянлы. Лыдӟисьёс кие вуизы «Ӧтиськом удмурт литературая уроке» сузьетэ пырись 5-9-тӥ классъёслы конспектъёсын юрттэтъёс (2013, дасязы Ирина Фёдоровна Тимирзянова но Андрей Александрович Клементьев), «Ӧтиськом удмурт кылъя уроке» сузьетэ пырись 5-тӥ но 6-тӥ классъёслы конспектъёсын юрттэтъёс (2018, дасязы Ирина Фёдоровна Тимирзянова но Андрей Александрович Клементьев), «Ӧтиськом литературной лыдӟиськонъя уроке» сузьетэ пырись 1-тӥ но 2-тӥ классъёслы конспектъёсын юрттэтъёс (2019, дасяз Ирина Фёдоровна Тимирзянова), «Внеурочная деятельность этнокультурного содержания» (2016, дасяз Андрей Александрович Клементьев), Ижкарысь пиналъёсты удмуртлыко будэтонлы сӥзем сценарийёсын «Пӧлэстӥськем вапумъёс» бичет (2013, дасяз Надежда Васильевна Хайдарова), нылпи кырӟанъёсын «Лэйкась гуръёс» нотаосын книга (2013, дасяз Надежда Васильевна Хайдарова), «Выж ми доры, Выжыкыл» (2018, дасяз Надежда Васильевна Хайдарова), «Нылпи садын шулдыръяськонъёс» бичет (2019, дасяз Надежда Васильевна Хайдарова), «Чиньы но Пӧлы эшъяськизы» юрттэт (2019, дасяз Надежда Васильевна Хайдарова), «Ресурсъёсын каталог: удмурт кыл но лулчеберет» справочной издание (2019, огъя редакциез Андрей Александрович Клементьевлэн), «Ӟеч-а, бур, удмурт кыл!» сузьетъя 1-тӥ классы «Ӧтиськом удмурт кылъя уроке» конспектъёсын юрттэт (2021, дасяз Ирина Фёдоровна Тимирзянова). Вань юрттэтъёсты лэсьтонэ пыриськизы визьнодасьёс но дышетӥсьёс. Озьы журналлэн редакциез пособиослэсь авторъёссэс будэтон бордын но мыло-кыдо ужа.

Туннэ нуналэ «Вордскем кыл» журнал огсыр азинске. Сое возьмато журналлэн лыдӟисьёс пӧлын кулэлыкез, пӧртэм улосъёсы вӧлмемез, печатлам материалъёслэн, юрттэтъёслэн вылӥ ӟечлыксы но пайдалыко луэмзы, визьнодасьёслэн но дышетӥсьёслэн дунъямзы.

Редакциын ужазы ас ужзэс ӟеч тодӥсь-валась методистъёс, дышетон удысын пайдалыко ужась специалистъёс: Ольга Фёдоровна Антонова, Павел Николаевич Баженов, Ильтимир Минтимирович Байметов, Ирина Витальевна Вахрушева, Андрей Александрович Клементьев, Александр Юрьевич Корепанов, Елена Владимировна Назарова, Ирина Фёдоровна Тимирзянова, Надежда Васильевна Хайдарова. Журналлэн валтӥсь редакторез — Ильтимир Минтимирович Байметов. Редакцилэн кенешаз пыриськизы дышетон удысын, удмурт кылосбурын бадӟымесь азинсконъёс басьтэм ӧнерчиос. Валтӥсь редактор луыса ужазы Ильтимир Минтимирович Байметов, Павел Николаевич Баженов, Александр Юрьевич Корепанов.

2021-2024-тӥ аръёс: BANI вакытэ ас тустэ утён

Берло аръёсы журнал азинске туала трендъёс (цифровизация, индивидуализация, вис карытэк тодон-валан люкан, средовой подход, ас коже тодон-валан люкан, информальной но горизонтальной дышетскон) но Россия Федерациысь но Удмурт Элькунысь иворъёсты вӧлмытон но дышетон удысъёсысь катрадлык, журналэз 2021-2025-тӥ аръёсы азинтон Концепция вылэ инъяськыса. Редакция лыдэ басьтэ кунысьтымы дышетон политикалэсь валтӥсь ӧръёссэ: выльдэм стандартъёслэсь куронъёссэс улонэ пыӵатон, педагогъёслэн ужудысазы будонзылэсь йӧскалык сӧзнэтсэ кылдытон, «Дышетон» йӧскалык ӵектосэз радъян, цифровизация, иворъёсты вӧлмытон ёзъёсын дышетон удысысь емышо проектъёсты возьматон.

Йӧскалык прессалэн юртаз бирюза кабен кивалтон улсын редакциын ужасьёс журнал котырысь азинскыны юрттӥсь вӧлмытлыкез (средаез) юнматыны но узырмытыны тыршо. Таин валче берло аръёсы кылдытэмын быдэс экосӧзнэт, кытчы пыро печатлам контент (журнал но методикая юрттэтъёс), электрон пуштрос (вотэсбам, мер вотэсъёсысь бамъёс) но событиос (конференциос, семинаръёс, котырес ӝӧкъёс, вожвылъяськонъёс). Вань та ресурсъёс удмуртлыкез, удмурт кылэз пыӵатон бордын тыршись ӧнерчиослы асьсэлэсь будон сюрессэс радъяны, горизонтальной карьера лэсьтыны юртто: лыдӟись — мыло-кыдо лыдӟись — автор — эксперт. «Вордскем кыл» журналлэн экосӧзнэтэз — со озьы ик редакциын ужасьёслэн дышетон удысысь кивалтон ёзъёсысь ӧнерчиосын, педагогъёсын, тодосчиосын, методистъёсын, учебникъёслэн авторъёсынызы кусыпъёссы.

Редакциын тыршо Андрей Александрович Клементьев, Елена Владимировна Назарова, Нина Васильевна Никитина, Андрей Геннадьевич Никитин, Ирина Фёдоровна Тимирзянова, Надежда Васильевна Хайдарова. 2021-тӥ арысен журналэн кивалтэ Андрей Александрович Клементьев.

Огъя вераса, журнал азинске, дышетон удысысь журналистикалэсь туала тодметъёссэ, кунысьтымы дышетон удысысь куронъёсты, йӧскалык дышетонысь кылдэм ӟеч сямъёсты но выль тулкымъёсты (трендъёсты) чакласа.

Валэктонъёс

Литература

• Баженов П. Н. Дышетон удысын йӧскалык журналистикалэн туала югдурез но азинскон сюресъёсыз («Вордскем кыл» амалтодослыко журнал вылын) / П. Н. Баженов, А. А. Клементьев // Вордскем кыл: амалтодослыко журнал. — 2015, № 10. — С. 4—7.
• «Вордскем кыл» / И. М. Байметов // Удмуртская Республика: Энциклопедия / гл. ред. В. В. Туганаев. — Ижевск: Удмуртия, 2008. — С. 243—244.
• Вуоноез ачиз уз лыкты: справочной издание / дасязы И. Ф. Тимирзянова но мук.; огъя редакциез А. А. Клементьевлэн. — Ижкар: «Вордскем кыл» журналлэни редакциез, 2020. — 64 б.
• Клементьев А. А. Научно-методический журнал «Вордскем кыл» («Родное слово») как ресурс для профессионального развития учителей удмуртского языка и литературы // Правовые основы функционирования государственных и региональных языков в условиях дву- и многоязычия (мировой опыт реализации языковой политики в федеративных государствах): междунар. науч.-практ. конф. 13 декабря 2021 года, г. Казань: сб. материалов / сост.: Л. М. Гиниятуллина, Г. Н. Мухарлямова, Д. М. Абдуллина, М. М. Шакурова. — Казань: ИЯЛИ, 2021. — С. 161—164.